សមត្ថកិច្ច បាន​រកឃើញ​សារធាតុ​គីមី​ហាមឃាត់​បូរ៉ាក់ នៅក្នុង​នំ​ស្លឹក​ស្រស់ និង​នំស្រួយ នៅផ្សារ​អូឫស្សី ក្នុង​ខណ្ឌ ៧​មករា។ ការចុះ​ត្រួត​ពិនិត្យ​ទំនិញ​នេះ ធ្វើឡើង​ដោយ​មន្រ្តី​សាខា​កាំកុងត្រូល​ផែស្ងួត​ចុងទី​ភ្នំពេញ និង​មន្រ្តី​សាខា​កាំកុងត្រូល​រាជធានី​ភ្នំពេញ សហការ​ជាមួយ​មន្រ្តី​មន្ទីរ​ពាណិជ្ជកម្ម និង​គណៈ​កម្មការ​ផ្សារ​អូឫស្សី នៅ​ថ្ងៃទី​១១ ខែ​មិថុនា ឆ្នាំ​២០១៨​នេះ។

កាំកុងត្រូល បាន​ធ្វើការ​ដកហូត នំស្លឹក​ស្រស់ និង​នំស្រួយ សរុប​៨៦​គីឡូក្រាម និង​កម្ទេច​ចោល​នៅនឹង​កន្លែង ថែម​ទាំងបាន​អញ្ជើញ​អាជីវករ​ចំនួន ៦​នាក់ និង​ម្ចាស់​សិប្បកម្ម​ចំនួន​២នាក់ មកធ្វើ​កិច្ចសន្យា​បញ្ឈប់​ការ​ទទួល​លក់​ និង​ផ្អាកការ​ផលិត​ជា​បណ្តោះ​អាសន្ន រហូត​ដល់​ធ្វើការ​កែប្រែ​គុណភាព​ហើយ។

សូម​បញ្ជាក់​ថា កាំកុងត្រូល ក៏​បាន​ធ្វើតេស្ត​បឋម​រក​សារធាតុ​គីមី​ហាមឃាត់​ទៅលើ​ទំនញ​ក្នុង​ផ្សារនេះ​ដែល​សង្ស័យ​ថា​មាន​ហានិភ័យខ្ពស់​ផ្សេងទៀត​ផងដែរ​ដូចជា អំបិល​អ៊ីយ៉ូដ សរសៃ​មីលឿង ប្រហិត​សាច់គោ ជ្រក់​ស្ពៃ ជ្រក់​ត្រសក់ មឹក បង្គារ ត្រីងៀត ត្រី​បង្ហើម សាច់ក្រក បាញ់កាញ់ លត គុយទាវ​សរសៃ​ធំ គុយទាវ​សរសៃ​តូច និង​គ្រឿង​សមុទ្រ។ ប៉ុន្តែ​ទំនិញ​ទាំងនេះ មិនមាន​ផ្ទុក​សារធាតុ​គីមី​ហាមឃាត់​ទេ៕