នៅ​ថ្ងៃ​ទី​១៤ ខែ​មិថុនា ​ឆ្នាំ​២០១៨​នេះ ក្លឹប​បាល់ទាត់​ភ្នំពេញ​ក្រោន​ បាន​សម្រេច​ចុះ​កិច្ច​សន្យា​ជាមួយ​ខ្សែប្រយុទ្ធ Valci Teixeira Junior ជនជាតិ​ប្រេស៊ីល។ កីឡាករ​វ័យ​៣១ឆ្នាំរូបនេះ មាន​បទ​ពិសោធ​ជោគជាំ​ក្នុង​តំបន់​អាស៊ី​ ជាពិសេស​នៅ​ក្នុង​ប្រទេស​ថៃ ដូច​ជា​នៅ​ក្លឹប Thai Port, Nakhon Ratchasima ជាដើម។ នេះ​ជា​ការ​ចុះផ្សាយ​របស់​វេបសាយ​ផ្លូវការ​របស់​ភ្នំពេញ​ក្រោន។​

នា​ឆ្នាំ​២០១៧ Valci Teixeira Junior ប្ដូរ​ទៅ​ក្លឹប Udon Thani ហើយ​ជួយ​ឲ្យ​ក្រុម​នេះ​ឡើង​ពី​ក្របខ័ណ្ឌ​លីគ​ទី​៣ ថៃ មក​លេង​នៅ​​លីគ​ទី២។ ក្នុង​នោះ គេ​រក​បាន ១៥​គ្រាប់។ ជាមួយ​គ្នា​នេះ Valci ក៏ធ្លាប់​ជាប់​ឈ្មោះ​ជា​កីឡាករ​ដែល​ទាត់​បញ្ចូលទី​បាន​ច្រើន​ជាង​គេ​នៅ​លីគ​ទី២ រយៈ​ពេល ២​ឆ្នាំ​ជាប់​ៗគ្នា ពោល​គឺ​ក្នុង​ពេល​លេង​ជាមួយ​ក្រុម Bangkok FC (២០១៤) បន្ទាប់ពី​រក​បាន ១៦គ្រាប់ និង​ Ayuthaya FC (២០១៥) ដោយ​រកបាន ២៤​គ្រាប់។ ជាងនេះទៅទៀត គេធ្លាប់​ប្រកប​អាជីព​នៅ​លីក​ទី៣​ជប៉ុន ជាមួយ​ក្រុម Gainare Tottori នា​ឆ្នាំ​២០១៦ ក៏​ដូចជា​នៅ​ក្នុង​ប្រទេស​អូម៉ង់ ជាមួយ​ក្លឹប Al Nahda Club កាលពី​ឆ្នាំ២០១២ ថែម​ទៀត​ផង​។

សូម​បញ្ជាក់​ថា កីឡាករ​ប្រេស៊ីល​រូបនេះ ទើបតែ​បាន​បញ្ចប់​កិច្ចសន្យា​ពាក់កណ្ដាល​រដូវ​កាល​ជាមួយ​ក្លឹប​ Samut Sakhon នា​ដើម​ឆ្នាំ​២០១៨​នេះ ដោយ​បាន​បង្ហាញ​ខ្លួន ១៥​ប្រកួត​ និង​ទាត់​បញ្ចូល​ទី​បាន ៨គ្រាប់​ផងដែរ​៕