អចលនទ្រព្យនៅជាយរាជធានីភ្នំពេញ រីកលូតលាស់ពីតំបន់ណាមុនគេ?

2018-06-19 02:36:23
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អ្នកជំនាញអចលនទ្រព្យ បានលើកឡើងថា និន្នាការនៃការអភិវឌ្ឍទីក្រុងមុនអំឡុងឆ្នាំ២០១២ ពោលគឹចលនានៃការរីកលូតលាស់អចលនទ្រព្យបានចាប់ផ្តើមមុនគេពីភាគខាងលិចនៃរាជធានីភ្នំពេញ។ នេះបើតាមការឲ្យដឹងពីលោក សន សៀប ស្ថាបនិក និងជាអគ្គនាយកក្រុមហ៊ុន Key Real Estate Co.,Ltd។

លោក សន សៀប ស្ថាបនិក និងជាអគ្គនាយកក្រុមហ៊ុន Key Real Estate Co.,Ltd ថ្លែងទៅកាន់អ្នកសារព័ត៌មាន នាពេលកន្លងទៅ (រូបថត៖ ផ្ដល់ឲ្យ)

បន្ទាប់ពី អចលនទ្រព្យមានភាពរីកចម្រើនមុនគេនៅទិសខាងលិច អ្នកជំនាញអចលនទ្រព្យរូបនេះបានសង្កេតឃើញថា ពីឆ្នាំ២០១២ ដល់ឆ្នាំ២០១៥ ការអភិវឌ្ឍនៃទីផ្សារមួយនេះបានធ្វើដំណើរដល់ទិសខាងជើងឈៀងខាងលិច ហើយទិសខាងជើងបានបន្តរីកលូតលាស់រហូតមកដល់ឆ្នាំ២០១៨នេះ។ ក្នុងឆ្នាំ២០១៨ ដដែលនេះ ការអភិវឌ្ឍអចលនទ្រព្យក៏បានធ្វើដំណើររហូតមកដល់ទិសខាងត្បូង ហើយសម្រាប់រយៈពេលខាងមុខ នឹងធ្វើដំណើរ ទៅទិសខាងកើត ពោលគឺនៅពេលដែលស្ពាននឹងត្រូវបានតភ្ជាប់ពីរាជធានីភ្នំពេញទៅអរិយក្សត្រ។

លោក សន សៀប បានមានប្រសាសន៍ថា ភាគខាងត្បូងនាពេលបច្ចុប្បន្ននេះបានក្លាយជាទិស(ឬតំបន់) ទីបីនៃការរីកលូតលាស់លើវិស័យអចលនទ្រព្យបន្ទាប់ពីភាគជើង។ លោកបានពន្យល់ថា ភាពរីកចម្រើននៃភាគខាងត្បូងក្នុងឆ្នាំ២០១៨នេះ ដោយសារតែមានគម្រោងជាច្រើនកំពុងត្រូវបានអភិវឌ្ឍ ហើយរួមទាំងភាពល្អប្រសើរនៃហេដ្ឋារចនាសម្ព័ន្ធ។

ផ្ទះល្វែង នៅបុរីមួយកន្លែង

សូមជម្រាបផងដែរថា គម្រោងដែលកំពុងត្រូវបានអភិវឌ្ឍនាពេលបច្ចុប្បន្ន និងសម្រាប់ការសាងសង់នាពេលអនាគតមានដូចជា គម្រោងសាងសង់មជ្ឈមណ្ឌលពាណិជ្ជកម្មពហុបំណងរបស់ក្រុមហ៊ុនចិន R&F Properties ស្ថិតនៅតាមបណ្តោយមហាវិថីសម្តេច ហ៊ុន សែន។ គម្រោងសាងសង់ទីក្រុងរណប ING City របស់ក្រុមហ៊ុន ING Holding ដែលនឹងអភិវឌ្ឍនៅលើបឹងចំនួនពីរ គឺបឹងទំពុន និងបឹងជើងឯក និងគម្រោងសាងសង់ព្រលានយន្តហោះថ្មីតម្លៃ ១,៥ពាន់លានដុល្លារអាមេរិក ស្ថិតនៅស្រុកកណ្តាលស្ទឹង ខេត្តកណ្តាល ដែលជាព្រំប្រទល់ខណ្ឌដង្កោ នៃភាគខាងត្បូងរាជធានីភ្នំពេញ។

មិនតែប៉ុណ្ណោះ ភ្លាមៗបន្ទាប់ពីផ្សារទំនើបអ៊ីអនម៉លទី២ បានបើកសម្ពោធកាលពីចុងខែឧសភា ក៏មានពត៌មានក្នុងស្រុក បានចុះផ្សាយជាបន្តបន្ទាប់ថា នាពេលអនាគតនឹងមានគម្រោងសាងសង់អ៊ីអនម៉លទី៣ នៅតាមបណ្តោយមហាវិថីសម្តេច ហ៊ុន សែន ផងដែរ៕