ជយលាភី ICT Award 2018 ត្រូវបានរកឃើញហើយ!

2018-06-22 00:33:04
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ទីបំផុត ក្រុមហ៊ុនដែលឈ្នះពានកម្មវិធី Cambodia ICT Award 2018 ត្រូវបានរកឃើញហើយ ក្រោមការប្រកាសលទ្ធផលរបស់ក្រសួងប្រៃសណីយ៍ និងទូរគមនាគមន៍ កាលពីយប់ថ្ងៃទី២១ ខែមិថុនា ឆ្នាំ២០១៨។

ម្ចាស់ជយលាភីចំនួន ៣ នៃកម្មវិធីប្រកួតប្រជែងពានរង្វាន់បច្ចេកវិទ្យា គមនាគមន៍ និងព័ត៌មានកម្ពុជា ២០១៨ រួមមាន៖

-ជយលាភីលេខ ១៖ បានទៅលើក្រុមហ៊ុន Morakot VB (Core Banking System) បង្កើតឡើងដោយក្រុមហ៊ុន Morakot Technology ។ ពានរង្វាន់លេខ ១ដែលមានប្រាក់រង្វាន់ ១ម៉ឺនដុល្លារ បានទៅលើក្រុមហ៊ុន Morakot ដែលជាក្រុមហ៊ុនបច្ចេកវិទ្យាហិរញ្ញវត្ថុ ដែលផ្ដោតសំខាន់លើប្រព័ន្ធធនាគារ សម្រាប់គ្រឹះស្ថានហិរញ្ញវត្ថុ ធនាគារ ហាងបញ្ចាំ និងប្រតិបត្តិការឥណទាន។

-ជយលាភីលេខ២៖ បានទៅលើក្រុមហ៊ុន Soyo Entertainment Co.,Ltd។ រង្វាន់លេខ ២នេះ ទទួលបានប្រាក់រង្វាន់ ៣ពាន់ដុល្លារ និងពានមួយទៀតឈ្មោះថា ពានរង្វាន់ល្អបំផុតតាមវិស័យ ដោយបានចាត់ទុក ក្រុមហ៊ុន Soyo សម្រាប់មាតិកាផ្នែកឌីជីថល។ ក្រុមហ៊ុន Soyo ជាកម្មវិធីទស្សនាភាពយន្តដំបូងក្នុងប្រទេសកម្ពុជា ដែលបណ្ដុំទៅដោយភាពយន្តខ្មែរ ថៃ ចិន កូរ៉េ ហូលីវូដ រាប់ពាន់រឿងជាមួយនឹងការប្រែសម្រួលជាភាសាខ្មែរ។ មិនត្រឹមតែប៉ុណ្ណោះកម្មវិធី Soyo បានផលិត និងនាំយកនូវទស្សនីយភាពប្លែកៗ ដែលអាចទស្សនាបាននៅក្នុងកម្មវិធីតែមួយគត់។ Soyo ផ្ដល់ភាពងាយស្រួល និងសំបូរបែបក្នុងការទស្សនាបាននៅក្នុងលើឧបករណ៍គ្រប់ប្រភេទ ដោយប្រិយមិត្តអាចរីករាយបានគ្រប់វេលា គ្រប់ទីកន្លែង។

-ជយលាភីលេខ ៣៖ បានទៅលើក្រុមហ៊ុន BanhJi បង្កើតឡើងដោយក្រុមហ៊ុន PCG & Partner Co., Ltd. ពានរង្វាន់លេខ ៣ មានប្រាក់រង្វាន់ ២ពាន់ដុល្លារ។ ក្រុមហ៊ុននេះ ជាក្រុមហ៊ុនបច្ចេកវិទ្យាហិរញ្ញវត្ថុ (FinTech) ដែលផ្ដោតសំខាន់នៅក្នុងការគាំទ្រ សហគ្រាសធុនតូច និងមធ្យម ដើម្បីឲ្យពួកគេអាចរៀបចំរបាយការណ៍ហិរញ្ញវត្ថុត្រឹមត្រូវ ទទួលបាន និងធ្វើការទូទាត់វិក្កយបត្រលឿន ព្រមទាំងអាចទទួលបានកម្ចី ដោយផ្អែកលើរបាយការណ៍ហិរញ្ញវត្ថុតែប៉ុណ្ណោះ។

ក្រុមហ៊ុនដែលទទួលបានជយលាភីទាំង៣ ខាងលើនេះ នឹងត្រូវបានអញ្ជើញឲ្យចូលរួមពិព័រណ៍ ក្នុងកម្មវិធី Ehelon Summit 2018 នៅប្រទេសសិង្ហបុរី និងចូលរួមប្រកួតបន្ត សម្រាប់ពានរង្វាន់់ បច្ចេកវិទ្យាគមនាគមន៍ និងព័ត៌មានអាស៊ាន (ASEAN ICT Award)។

ក្រៅពីជ័យលាភីខាងលើកម្មវិធីក៏បានផ្ដល់ពានរង្វាន់ល្អបំផុតតាមវិស័យ ដែលបានទៅលើ៖ ក្រុមហ៊ុនន BanhJi សម្រាប់ផ្នែកការចាប់ផ្ដើមធុរកិច្ច, ក្រុមហ៊ុន Soyo សម្រាប់មាតិកាផ្នែកឌីជីថល, ក្រុមហ៊ុន Morakot VB សម្រាប់វិស័យឯកជន អង្គការ ODC សម្រាប់ផ្នែកមាតិកាទទួលខុសត្រូវក្នុងសង្គម និងក្រសួងសាធារណការ និងដឹកជញ្ជូនសម្រាប់វិស័យសាធារណៈ៕

ប្រភព៖ Sabay News អត្ថបទ៖ ប៊ិន ប៊ុណ្ណា