អ្នករត់ម៉ូតូកង់បី ទាំងក្នុងនិងក្រៅប្រព័ន្ធ បានរួមចំណែកជាង ៦ពាន់លានដុល្លារក្នុង១ឆ្នាំ ដល់សេដ្ឋកិច្ចជាតិ

2018-06-28 03:25:32
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោកទេសរដ្ឋមន្ត្រី ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន បានលើកឡើងថា ប្រជាពលរដ្ឋដែលប្រកបរបរដឹកជញ្ជូនទាំងក្នុងប្រព័ន្ធ និងក្រៅប្រព័ន្ធ បានរួមវិភាគទានយ៉ាងធំធេងក្នុងសេដ្ឋកិច្ចជាតិប្រមាណ ៦ ពាន់លានដុល្លារក្នុងមួយឆ្នាំ។ ការថ្លែងនេះ ធ្វើឡើងក្នុងពិធីរួមគ្នាដើម្បីលើកកម្ពស់ជីវភាពប្រជាពលរដ្ឋ ប្រកបរបរដឹកជញ្ជូនក្រៅប្រព័ន្ធ កាលពីរសៀលថ្ងៃទី២៧ ខែមិថុនា ឆ្នាំ២០១៨។

លោក ស៊ុន ចាន់ថុល ថ្លែងក្នុងពិធីរួមគ្នាដើម្បីលើកកម្ពស់ជីវភាពប្រជាពលរដ្ឋ ប្រកបរបរដឹកជញ្ជូនក្រៅប្រព័ន្ធ កាលពីរសៀលថ្ងៃទី២៧ ខែមិថុនា ឆ្នាំ២០១៨

លោកបញ្ជាក់ថា កម្ពុជារក្សាបានកំណើនសេដ្ឋកិច្ច ៧%ក្នុងមួយឆ្នាំ គិតជាមធ្យមក្នុងរយៈពេល ២០ឆ្នាំចុងក្រោយ បង្កើតការងារបានជាង៣,៦លាននាក់ក្នុងវិស័យឧស្សាហកម្ម និងសេវាកម្ម ក្នុងនោះផ្នែកសេដ្ឋកិច្ចក្នុងប្រព័ន្ធមានចំនួនជាង ១,៤លាននាក់ និងផ្នែកសេដ្ឋកិច្ចក្រៅប្រព័ន្ធប្រមាណ ២,៤លាននាក់។

នៅក្នុងឱកាសនោះផងដែរ ប្រធានសមាគមរួមគ្នាដើម្បីអភិវឌ្ឍន៍កម្ពុជា លោក ឯ សុ ភាល់ បាននិយាយថា បច្ចុប្បន្ននេះ សមាគមមានសមាជិកជាង ១,៧ម៉ឺននាក់ ដោយក្នុងនោះ មានសមាជិក ជាង ១,១ម៉ឺននាក់ បានចុះបញ្ជី និងបានទទួលបណ្ណមូលនិធិសមធម៌ ពីបេឡាជាតិរបបសន្ដិសុខសង្គម ។

លោកអះអាងថា ប្រជាពលរដ្ឋប្រកបរបរដឹកជញ្ជូនក្រៅប្រព័ន្ធម៉ូតូកង់បី កាលពីឆ្នាំ២០១៧ បានជួយគ្នាទៅវិញទៅមក ប្រមាណ ២០០លានរៀលផងដែរ។

អ្នករត់ម៉ូតូកង់បី ក្នុងរាជធានីភ្នំពេញ

សូមជម្រាបថា កម្មវិធីខាងលើនេះរៀបចំឡើងក្រោមគំនិតផ្តួចផ្តើមរួមរបស់ក្រសួងសាធាណការ និងដឹកជញ្ជូន រួមសហការជាមួយ ក្រុមហ៊ុនសូគីមិច ក្រុមហ៊ុនGrab អង្គការUNDP សហភាពសហព័ន្ធយុវជនកម្ពុជា និងសមាគមរួមគ្នាដើម្បីអភិវឌ្ឍន៍កម្ពុជា ដើម្បីគំាទ្រដល់សមាជិកសមាជិកាសមាគមរួមគ្នាដើម្បីអភិវឌ្ឍន៍កម្ពុជា ដែលកំពុងប្រកបរបរដឹកជញ្ជូនសេដ្ឋកិច្ចក្រៅប្រព័ន្ធ(អ្នករត់ម៉ូតូកង់បី) និងផ្តោតជាសំខាន់លើការគិតគូរពីផលប្រយោជន៍ សុវត្ថិភាពចរាចរណ៍ ការដឹកជញ្ជូន សោភ័ណភាព និងសេចក្តីថ្លៃថ្នូររបស់បងប្អូនដែលប្រកបរបរនេះ៕