ពូទីន៖ រុស្ស៊ី អាចបង្រៀនអាមេរិកឲ្យធ្វើជាម្ចាស់ផ្ទះ World Cup បានល្អ

2018-06-28 09:35:22
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រធានាធិបតីរុស្ស៊ី លោក វ្ល៉ាាឌីមៀ ពូទីន បាននិយាយថា រុស្ស៊ី អាចចែករំលែកបទពិសោធរបស់ខ្លួនក្នុងការធ្វើម្ចាស់ផ្ទះ World Cup ទៅឲ្យសហរដ្ឋអាមេរិក។ ការលើកឡើងរបស់លោកពូទីន បានធ្វើឡើង អំឡុងពេលលោក ជួបជាមួយលោក John Bolton ទីប្រឹក្សាជាន់ខ្ពស់របស់លោកប្រធានាធិបតីអាមេរិក ដូណាល់ ត្រាំ នៅក្នុងវិមានKremlin ប្រទេសរុស្ស៊ី កាលពីថ្ងៃទី ២៧ មិថុនាម្សិលមិញ។

លោក ពូទីន ចាប់ដៃគ្នាជាមួយលោក Bolton នៅក្នុងវិមាន Kremlin រដ្ឋធានី មូស្កូ ប្រទេសរុស្ស៊ី កាលពីថ្ងៃទី ២៧ មិថុនាម្សិលមិញ។ រូបភាព៖ AP

ក្នុងជំនួបនេះ លោកពូទីន ក៏បានបង្ហាញនូវមោទនភាពរបស់ប្រទេសខ្លួន ក្នុងធ្វើជាម្ចាស់ផ្ទះនៃកីឡាបាល់ទាត់World Cup ២០១៨ ព្រមទាំងស្នើឲ្យមន្ត្រីអាមេរិក សិក្សាស្វែងយល់ពីបទពិសោធរបស់រុស្ស៊ីផងដែរ។

ជាមួយគ្នានេះ លោកពូទីន ក៏បានសាទរចំពោះការទទួលបានសិទ្ធិរបស់សហរដ្ឋអាមេរិក ក្នុងការរៀបចំកីឡាបាល់ទាត់ពិភពលោក World Cup នាឆ្នាំ២០២៦ខាងមុខ។

ឆ្លើយតបនឹងសំណើនេះ លោក Bolton បាននិយាយថា លោក នឹងទន្ទឹងរងចាំស្វែងយល់អំពីការធ្វើជាម្ចាស់ផ្ទះ World Cup ឲ្យបានជោគជ័យពីរុស្ស៊ី។

គួរបញ្ជាក់ដែរថា ទស្សនកិច្ចរបស់លោក Bolton ទៅកាន់រដ្ឋធានី មូស្កូ កាលពីថ្ងៃពុធម្សិលមិញ គឺជាជំនួបកម្រិតខ្ពស់បំផុតរវាងមន្ត្រីរុស្ស៊ី និងសហរដ្ឋអាមេរិក ក្រោមអាណត្តិប្រធានាធិបតីរបស់លោកដូណាល់ ត្រាំ៕

ប្រភព៖ RT ប្រែសម្រួល៖ អឹុម ម៉េងស៊ាង