ក្មេងៗថៃដែលទើបរកឃើញកាលពីយប់មិញ អាចនឹងត្រូវបន្តនៅក្នុងរូងរយៈពេលយូរ

2018-07-03 03:19:59
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្មេងៗទាំង១២រូប រួមទាំងគ្រូបង្វឹករបស់ពួកគេដែលបានជាប់គាំងនៅក្នុងល្អាងភ្នំថៃ នឹងត្រូវផ្ដល់ឲ្យនូវការផ្គត់ផ្គង់អាហារ និងបង្រៀនហែលទឹករយៈពេល ៤ ខែសិន មុននឹងអាចចេញមកក្រៅបាន។ នេះបើតាមបញ្ជាក់របស់យោធាថៃនៅថ្ងៃទី០៣កក្កដា ឆ្នាំ២០១៨នេះ។

សកម្មភាពរុករកក្មេង ដោយក្រុមជួយសង្គ្រោះ

ប្រភពដដែលបានបញ្ជាក់ទៀតថា គ្រូពេទ្យមួយរូបនឹង ត្រូវបានបញ្ជូនទៅកាន់ល្អាងភ្នំនោះ ដើម្បីធ្វើការពិនិត្យសុខភាពដល់ពួកគេ។

«យើងនឹងធ្វើការរៀបចំបញ្ជូនអាហារបន្ថែម ដែលត្រូវបានបន្តយ៉ាងហោចណាស់រយៈពេល ៤ ខែ ព្រមទាំងបង្ហាត់កីឡាករបាល់ទាត់ទាំង ១៣ រូបនោះ ឲ្យចេះច្រមុជទឹក ខណៈដែលទឹកនៅតែបន្តជន់លិចយ៉ាងខ្លាំងនៅក្នុងល្អាង។» នេះបើការឲ្យដឹងពីប្រធានកងទ័ពជើងទឹកថៃ លោក Anand Surawan នៅក្នុងសេចក្តីថ្លែងការណ៍ ពីកងទ័ពប្រដាប់អាវុធថៃ។

ក្មេងទាំង១២ នាក់ និងគ្រូបង្វឹក ត្រូវបានរកឃើញនៅមានជីវិត ដោយក្រុមជួយសង្គ្រោះ។ រូបថត៖ FB Thai Navy Seal

ជាមួយគ្នានេះ អ្នកចាត់ចែងប្រតិបត្តិការសង្គ្រោះអាមេរិក លោក Anmar Mirza បាននិយាយថា ការសម្រេចចិត្តជាបឋមនោះ គឺគួរតែព្យាយាមជម្លៀសពួកគេចេញពីល្អាងភ្នំ ឬក៏ផ្គត់ផ្គង់អាហារដល់ពួកគេនៅនឹងកន្លែង។

លោក បានបន្តទៀតថា «ការផ្គត់ផ្គង់អាហារដល់ពួកគេនៅក្នុងល្អាងភ្នំ អាចនឹងប្រឈមមុខនឹងឧបសគ្គជាច្រើន ពោលគឺអាស្រ័យថាតើការច្រមុជទឹកនៅក្នុងល្អាងពិបាកដល់កម្រិតណា។» លោក បន្ត «ការព្យាយាមជម្លៀសអ្នកដែលមិនចេះច្រមុជទឹកចេញពីល្អាងភ្នំ គឺជាវិធីមួយដែលគ្រោះថ្នាក់បំផុត បើទោះបីជាការច្រមុជទឹក មិនសូវពិបាកក្តី។»

លោក Anmar បន្ថែមទៀតថា «បើសិនជាការច្រមុជទឹកពិតជាពិបាក នោះការផ្គត់ផ្គង់អាហារ ក៏រឹតតែពិបាកទៅទៀត ប៉ុន្តែហានិភ័យនៃការព្យាយាមរំដោះក្មេងៗទាំងនោះចេញពីល្អាង រឹងរឹតតែខ្ពស់ទៅទៀត»។

គួរបញ្ជាក់ថា ក្មេងៗទាំង១២នាក់ ព្រមទាំងគ្រូបង្វឹករបស់ពួកគេ ត្រូវបានរកឃើញនៅក្នុងល្អាងភ្នំ ថាមលួង កាលពីយប់ថ្ងៃទី០២ កក្កដា ដោយពួកគេនៅមានជីវិតនៅឡើយ៕