សមត្ថកិច្ចបង្ក្រាបទីតាំងស្តុក និងចែកចាយទឹកដោះគោម៉ាក Meiji ខុសច្បាប់

2018-07-04 07:42:43
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កម្លាំងសមត្ថកិច្ចនាយកដ្ឋាននគរបាលប្រឆាំងបទល្មើសសេដ្ឋកិច្ច នៃក្រសួងមហាផ្ទៃ បានចុះត្រួតពិនិត្យទីតាំងឃ្លាំងរបស់ក្រុមហ៊ុន នួនហ៊្វូត ខូ អិលធីឌី (Noun Food Co., Ltd.) សង្ស័យស្តុកទុកខុសច្បាប់ និងលួចចែកចាយទឹកដោះគោម៉ាក Meiji ដោយដឹកជញ្ជូនតាមរថយន្តគ្របតង់គ្មានប្រព័ន្ធទូត្រជាក់ (Chill Container) បណ្ដាលឲ្យប៉ះពាល់សុខភាពអ្នកទទួលទាន។

សមត្ថកិច្ច បង្ក្រាបទីតាំងស្តុកទុក និងលួចចែកចាយទឹកដោះគោម៉ាក Meiji នៅទីតាំងឃ្លាំង ស្ថិតនៅផ្ទះលេខ៩៧ ផ្លូវ ៦ CC សង្កាត់កាកាប ខណ្ឌពោធិ៍សែនជ័យ រាជធានីភ្នំពេញ (រូបថត៖ ដើមអម្ពិល)

ការបង្ក្រាបខាងលើ ត្រូវធ្វើឡើងក្រោមការបញ្ជាផ្ទាល់របស់លោកឧត្ដមសេនីយ៍ឯក ចាន់ វ៉ាន់ធឿន ប្រធាននាយកដ្ឋាននគរបាល ប្រឆាំងបទល្មើសសេដ្ឋកិច្ច នៅរសៀលថ្ងៃទី០៣ ខែកក្កដា ឆ្នាំ២០១៨ វេលាម៉ោង១:៣០នាទី កម្លាំងជំនាញនៃការិយាល័យប្រឆាំងបទល្មើសកម្មសិទ្ធិបញ្ញា ក្រោមការសម្របសម្រួល នីតិវិធីពីលោក ហ៊ឹង ប៊ុនថន ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ នៅទីតាំងឃ្លាំង ស្ថិតនៅផ្ទះលេខ៩៧ ផ្លូវ ៦ CC សង្កាត់កាកាប ខណ្ឌពោធិ៍សែនជ័យ រាជធានីភ្នំពេញ។

សមត្ថកិច្ចរកឃើញថា ទីតាំងខាងលើ បានចែកចាយដោយខុសច្បាប់ ពោលគឺរំលោភសិទ្ធិផ្តាច់មុខរបស់ក្រុមហ៊ុន សូណាវីទ្យ ។

ប្រតិបត្តិការនេះ ធ្វើឡើងដោយយោងតាមពាក្យបណ្តឹងរបស់ក្រុមហ៊ុន សូណាវីទ្យ ដែលជាក្រុមហ៊ុនទទួលបានសិទ្ធិចែកចាយផ្តាច់មុខ នូវផលិតផលទឹកដោះគោម៉ាក Meiji និងយ៉ាអួ Meiji ក្នុងព្រះរាជាណាចក្រកម្ពុជា និងមានការចុះបញ្ជីត្រឹមត្រូវ ។

ក្រោយពីការត្រួតពិនិត្យ សមត្ថកិច្ចបានរកឃើញនូវសម្ភារ វត្ថុតាងមួយចំនួនរួមមាន៖ យ៉ាអួរ ម៉ាក Meiji ចំនួន ៥៤០កំប៉ុង, ទឹកដោះគោម៉ាក Meiji ចំណុះ២០០០មីល្លីលីត្រ ចំនួន ៧១២ដប, ទឹកដោះគោម៉ាក Meiji ចំណុះ ៨៣០មីល្លីលីត្រ ចំនួន ៣៤ដប និងសម្ភារៈមួយចំនួនទៀត។ វត្ថុតាង ត្រូវបានដកហូតយកទៅរក្សាទុកជាបណ្តោះអាសន្ន និងតម្រូវឲ្យម្ចាស់ទីតាំង ចូលខ្លួនទៅបំភ្លឺនៅនាយកដ្ឋាននគរបាលប្រឆាំងបទល្មើសសេដ្ឋកិច្ចដើម្បីបន្តនីតិវិធី៕