Ronaldo, Klopp, Stones ផ្ញើសារដល់ក្មេងៗដែលកំពុងជាប់ក្នុងល្អាងភ្នំ នៅថៃ

2018-07-07 03:26:11
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

តារាបាល់ទាត់ជុំវិញពិភពលោក បានផ្ញើសារលើកទឹកចិត្តដល់ក្មេងៗ១២នាក់ និងគ្រូបង្វឹកម្នាក់ ដែលកំពុងជាប់ក្នុងល្អាងភ្នំថាមហ្លួង នៅខេត្តឈៀងរ៉ៃ ប្រទេសថៃ ឲ្យមានការអត់ធ្មត់ រឹងមាំ ស្របពេលដែលក្រុមអ្នកជួយសង្គ្រោះកំពុងព្យាយាមជួយពួកគេចេញពីក្នុងល្អាងភ្នំនោះ។

Ronaldo ប្រេស៊ីល (រូបថត៖ The Telegraph)

Ronaldo អតីតវីរបុរសរបស់ក្រុមជម្រើសជាតិប្រេស៊ីល បាននិយាយក្នុងព្រឹត្តិការណ៍សារព័ត៌មានរបស់ FIFA មួយថា៖ ***«នេះជាដំណឹងដ៏អាក្រក់មួយ ហើយពិភពបាល់ទាត់ទាំងមូល សង្ឃឹមថា នរណាម្នាក់នឹងអាចជួយពួកគេចេញពីទីនោះបាន»***។

លោក Klopp អ្នកចាំការក្លឹប Liverpool (រូបថត៖ Reuters)

ចំណែក លោក Jurgen Klopp អ្នកចាត់ការក្លឹបបាល់ទាត់ Liverpool បានផ្ញើសារថា៖ «You'll never walk alone» ដែលគេតែងតែឮចេញពីមាត់អ្នកគាំទ្ររបស់ក្រុមហង្សក្រហម។ លោកបន្តថា៖ «ត្រូវរឹងមាំឡើង ហើយត្រូវដឹងថា ពួកយើងនៅជាមួយអ្នកជានិច្ច»។

រីឯ John Stones កីឡាកររបស់ក្រុមជម្រើសជាតិអង់គ្លេស បានបង្ហើបថា គេនិងមិត្តរួមក្រុមបាននិយាយគ្នាពីបញ្ហានៅថៃនេះ មុនវគ្គ៨ក្រុមចុងក្រោយ នៅ World Cup 2018 ទល់នឹងស៊ុយអែត។ «ខ្ញុំបាននិយាយរឿងនេះជាមួយបងប្អូនយើងដទៃទៀត... វាជារឿងដ៏គួរឲ្យសោកស្ដាយ សម្រាប់ពួកគេ ហើយពួកយើងសង្ឃឹមថា ពួកគេនឹងអាចចេញមកក្រៅ (ល្អាងភ្នំ) វិញដោយសុវត្ថិភាព»។

ចំពោះ សហព័ន្ធកីឡាបាល់ទាត់ក្រូអាតបានបង្ហោះនៅលើវេបសាយរបស់ខ្លួនថា៖ «ពួកយើងមានការភ្ញាក់ផ្អើលនឹងភាពរឹងមាំ និងសេចក្ដីក្លាហានរបស់ក្មេងៗ និងគ្រូបង្វឹករបស់ពួកគេ ដែលបានបង្ហាញឲ្យយើងបានឃើញក្នុងស្ថានភាពដ៏គួរឲ្យភ័យខ្លាចមួយនេះ... នេះជាស្ថានភាពដែលសំខាន់ជាងកីឡាទៅទៀត ប៉ុន្តែបទពិសោធក្នុងវិស័យកីឡារបស់ពួកគេនឹងជួយពួកគេឲ្យស៊ូទ្រាំនឹងភាពលំបាកនេះបាន»។

គួររំឭកថា តាមលិខិតរបស់សហព័ន្ធបាល់ទាត់ពិភពលោក (FIFA) កាលពីពេលថ្មីៗកន្លងទៅ លោក Gianni Infantino ប្រធានសហព័ន្ធបាល់ទាត់ពិភពលោក FIFA អញ្ជើញក្មេងៗកីឡាករ ១២នាក់ និងគ្រូបង្វឹកពួកគេ ដែលកំពុងជាប់ខ្លួនក្នុងល្អាងភ្នំថាមហ្លួង ឲ្យចូលទស្សនាការប្រកួតបាល់ទាត់វគ្គផ្តាច់ព្រ័ត្រនៃ World Cup 2018 នៅប្រទេសរុស្ស៊ី ប្រសិនបើពួកគេអាចចេញពីល្អាងភ្នំនោះទាន់ពេល។

ក្មេងៗ និងគ្រូបង្វឹកដែលជាប់ក្នុងល្អាងភ្នំ បានបង្កើតក្រុមបាល់ទាត់ដែលមានឈ្មោះថា "Wild Boars” ។ អ្នកទាំង១៣ បានជាប់ក្នុងល្អាងភ្នំ កាលពីថ្ងៃទី២៣ ខែមិថុនា ឆ្នាំ២០១៨៕

ប្រភព៖ Channelnewsasia ប្រែសម្រួល៖ លាភ.