ធនាគារអភិវឌ្ឍន៍ជនបទ ត្រៀមទម្លាក់កម្ចី ដល់រោងម៉ាស៊ីនកិនស្រូវ និងសហគមន៍កសិកម្ម

2018-07-13 10:01:11
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក កៅ ថាច អគ្គនាយកនៃធនាគារអភិវឌ្ឍន៍ជនបទ បានលើកឡើងថា តាមរយៈអន្តរាគមន៍របស់រាជរដ្ឋាភិបាល ធនាគារអភិវឌ្ឍន៍ជនបទ បានត្រៀមរួចរាល់ក្នុងការទម្លាក់កម្ចី ដល់រោងម៉ាស៊ីនកិនស្រូវ ដើម្បីប្រមូលទិញស្រូវពីកសិករនៅតាមទីផ្សារ នារដូវប្រមូលផលខាងមុខនេះ។ លោកលើកឡើងដូច្នេះក្នុងសិក្ខាសាលាស្តីពីកិច្ចពិភាក្សា និងពិគ្រោះ យោបល់អំពីទីផ្សាររវាងសហគមន៍កសិកម្ម និងដៃគូពាណិជ្ជកម្មកសិកម្ម នាថ្ងៃទី១៣ ខែកក្កដា ឆ្នាំ២០១៨នេះ នៅសាលាខេត្តកំពង់ធំ។

លោក កៅ ថាម ថ្លែងក្នុងសិក្ខាសាលាស្តីពីកិច្ចពិភាក្សា និងពិគ្រោះ យោបល់អំពីទីផ្សាររវាងសហគមន៍កសិកម្ម និងដៃគូពាណិជ្ជកម្មកសិកម្ម នាថ្ងៃទី១៣ ខែកក្កដា ឆ្នាំ២០១៨នេះ នៅសាលាខេត្តកំពង់ធំ។ រូបថត៖ ដើមអម្ពិល

ជាមួយគ្នានេះ លោកអគ្គនាយក បានថ្លែងថា ធនាគារអភិវឌ្ឍន៍ជនបទ ក៏បានដាក់ចេញនូវគោលការណ៍ ក្នុងការផ្តល់ឥណទាន សម្រាប់សហគមន៍កសិកម្មផងដែរ។ តាមរយៈយន្តការនេះ អត្រាការប្រាក់ ត្រូវបានសិក្សា និងទម្លាក់ទៅតាមស្ថានភាពទីផ្សារ និងលើកទឹកចិត្តដល់ការចងក្រងពង្រីកសហគមន៍តាមរយៈខ្សែចង្វាក់ផលិតកម្ម។

លោកបន្តថា បញ្ហាទីផ្សារស្រូវកន្លងមកនេះ រាជរដ្ឋាភិបាលកម្ពុជា បានខិតខំដោះស្រាយជូនបាន ដោយជោគជ័យ និងទប់ស្កាត់បាននូវបញ្ហាធ្លាក់ចុះ នៃតម្លៃស្រូវក្រោមទីផ្សារ តាមរយៈយន្តការ នៃការផ្តល់ឥណទានពិសេសដែលផ្តល់ជូនតាមរយៈធនាគារអភិវឌ្ឍន៍ជនបទ។

លោក កៅ ថាច បន្ថែមថា រាជរដ្ឋាភិបាល បានបង្កើនឥណទានជាទុនបង្វិល ដល់ ៥០លានដុល្លារ (កញ្ចប់ថវិកាពិសេសរបស់រាជរដ្ឋាភិបាល ចំនួន ៤៣លានដុលារ និងប្រើប្រាស់មូលនិធិផ្ទាល់របស់ ធនាគារអភិវឌ្ឍន៍ជនបទ ចំនួន ៧ លានដុល្លារ) ដល់រោងម៉ាស៊ីនកិនស្រូវ ក្រុមហ៊ុនកែច្នៃ និងនំាចេញអង្ករ និងមជ្ឈមណ្ឌលឬអ្នកប្រមូលទិញស្រូវ សម្រាប់ប្រមូលទិញស្រូវ នារដូវប្រមូលផល៕

ប្រភព៖ ដើមអម្ពិល ប្រែសម្រួល៖ សំភី