លោក សុខ ឥសាន ជំរុញឱ្យ Aljazeera ដាក់ភស្តុតាងបន្ថែម លើករណីអគ្គនាយកពន្ធដារ

2018-07-15 02:04:01
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អ្នកនាំពាក្យគណបក្សប្រជាជនកម្ពុជា លោក សុខ ឥសាន កាលពីថ្ងៃទី១៣កក្កដា ឆ្នាំ២០១៨ បានជំរុញឱ្យទូរទស្សន៍ Aljazeera ដាក់ភស្តុតាងបន្ថែមទៅកាន់សមត្ថកិច្ចដើម្បីបើកការស៊ើបអង្កេតលើករណី លោក គង់ វិបុល អគ្គនាយកនៃអគ្គនាយកដ្ឋានពន្ធដារ។

លោក សុខ ឥសាន បានបញ្ជាក់យ៉ាងដូច្នេះថា៖ «ប្រសិនបើមានភស្តុតាងអោយគេបញ្ជូនមកអោយអង្គភាពប្រឆាំងអំពើពុករលួយទៅ។ ហើយសម្ដេចតេជោ ហ៊ុន សែន លោកនឹងមិនកាន់ជើងជនខិលខូចនោះទេ»។

ការលើកឡើងរបស់មន្រ្តីរាជរដ្ឋាភិបាលខាងលើនេះ គឺបន្ទាប់ពីទូរទស្សន៍បរទេស Aljazeera រាយការណ៍កាលពីថ្ងៃទី១២ ខែកក្កដាថា លោក គង់ វិបុល មានក្រុមហ៊ុនមួយចំនួនក្នុងទីក្រុងមែលប៊ន (Melbourne) ប្រទេសអូស្ត្រាលី ក្នុងតម្លៃរាប់លានដុល្លារ ទោះបីជាលោក គង់ វិបុល មានប្រាក់ខែ ត្រឹមតែប្រមាណ១ពាន់ដុល្លារក៏ដោយ។

លោក គង់ វិបុល ថ្លែងទៅកាន់អ្នកសារព័ត៌មាននាពេលកន្លងមក

ទូរទស្សន៍បរទេស Aljazeera បានរកឃើញថាក្រុមហ៊ុនរបស់ លោក គង់ វិបុល ក្នុងប្រទេសអូស្ត្រាលី ដែលដាក់ឈ្មោះថា ផាណារិទ្ធិ ភីធីវ៉ាយ (Phanhariddh PTY) បានបង្កើតឡើងកាលពីឆ្នាំ២០១១ កំពុងរំលោភច្បាប់ពាណិជ្ជកម្មរបស់ប្រទេសអូស្ត្រាលី ដោយសារតែម្ចាស់ក្រុមហ៊ុននេះ មិនបានរស់នៅជាអចិន្ត្រៃយ៍ក្នុងប្រទេសអូស្ត្រាលីតាមច្បាប់កំណត់។

ប៉ុន្តែលោក គង់ វិបុល បានផ្ដល់បទសម្ភាសន៍ដល់ទូរទស្សន៍ Aljazeera ជាភាសាអង់គ្លេស ដោយបដិសេធថា លោកមិនមានការជាប់ពាក់ព័ន្ធជាមួយក្រុមហ៊ុនណាមួយដែលមានតម្លៃរាប់លាន ដុល្លារនេះឡើយ៖ «ខ្ញុំបានផ្ទេរក្រុមហ៊ុននេះទៅឲ្យមនុស្សផ្សេងទៀតអស់ទៅហើយ ប្រហែលឯកសារដែលអ្នកបានទទួលនោះ មិនបានធ្វើបច្ចុប្បន្នភាព ឬការកែតម្រូវនោះឡើយ។ ក្រុមហ៊ុននេះខ្ញុំបានបិទជាយូរមកហើយ ហើយខ្ញុំក៏គ្មានអ្វីជាប់ពាក់ព័ន្ធនៅក្នុងប្រទេសអូស្ត្រាលីនោះដែរ»៕

ប្រភព៖ Radio Free Asia ប្រែសម្រួល៖ សំភី