ក្រសួងប្រកាសឲ្យប្រុងប្រយ័ត្នជំងឺឆ្លង និងគ្រោះថ្នាក់ជាយថាហេតុ ក្នុងពេលទឹកជំនន់

2018-07-18 12:00:31
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

នាយកដ្ឋានប្រយុទ្ធនឹងជំងឺឆ្លង នៃក្រសួងសុខាភិបាល បានបង្ហាញសារអប់រំសំខាន់ៗ ក្នុងការបង្ការជំងឺឆ្លង និងវិធានការប្រុងប្រយ័ត្ន ជៀសវាងគ្រោះថ្នាក់ជាយថាហេតុ ក្នុងអំឡុងពេលទឹកជំនន់។ ការផ្សព្វផ្សាយនូវសារជាបន្ទាន់នេះ ខណៈដែលខេត្តមួយចំនួន ដូចជា ខេត្តព្រះសីហនុ កោះកុង កំពត កំពង់ស្ពឺ ជាដើម កំពុងប្រឈមមុខនឹងជំនន់ទឹកភ្លៀង ក្នុងរយៈពេលប៉ុន្មានថ្ងៃនេះ។

កុមារ កំពុងលេងទឹកទន្លេ នៅម្ដុំជ្រោយចង្វា

នាយកដ្ឋានប្រយុទ្ធនឹងជំងឺឆ្លង បានលើកឡើងថា ដើម្បីបង្ការការឆ្លងជំងឺផ្សេងៗ និងគ្រោះថ្នាក់នានាជាយថាហេតុ ក្នុងអំឡុងពេលទឹកជំនន់នេះ ប្រជាពលរដ្ឋត្រូវតាមដានស្ថានភាពទឹកជំនន់, ត្រៀមរកទួលសុវត្ថិភាព, ផ្តាច់ចរន្តអគ្គិសនី និងការពារកុំឲ្យឆក់, ជាតិពុលនានាត្រូវដាក់ឲ្យខ្ពស់ពីទឹកលិច និងត្រូវប្រើប្រាស់ទឹកស្អាតនិងពិសាទឹកឆ្អិនជានិច្ច។

ក្រៅពីវិធានការទាំងនេះ នាយកដ្ឋានប្រយុទ្ធនឹងជំងឺឆ្លងរបស់ក្រសួងសុខាភិបាល ក៏បានណែនាំប្រជាពលដ្ឋ ត្រូវបង្ការ កុំឲ្យឆ្លងជំងឺផ្សេងៗ ដូចជា ជំងឺរាករូស, ពុលចំណីអាហារ, ជំងឺគ្រុនចាញ់ គ្រុនឈាម, ផ្តាយសាយធំ, រមាស់ស្បែក និងជំងឺភ្នែកក្រហមជាដើម។

នាយកដ្ឋានប្រយុទ្ធនឹងជំងឺឆ្លង បានបញ្ជាក់ដែរថា ក្នុងករណីប្រជាពលរដ្ឋឃើញមានជំងឺរាតត្បាត ឬកើតឡើងច្រើនខុសធម្មតា សូមរាយការណ៍ ឬទាក់ទងលេខ ទូរសព្ទទាន់ហេតុការណ៍ដោយមិនគិតថ្លៃពីគ្រប់ប្រព័ន្ធលេខ ១១៥ ដើម្បីឲ្យមន្ត្រីជំនាញចុះទប់ស្កាត់ និងព្យាបាលឲ្យបានទាន់ពេលវេលា៕

អត្ថបទ៖ លីហៀង