ប្រៀបធៀបអ្នកចាំទីថ្មីរបស់ Liverpool ជាមួយអ្នកចាំទីល្អប្រចាំឆ្នាំ (De Gea)

2018-07-21 03:12:39
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្លឹបហង្សក្រហម Liverpool បានសម្រេចទិញយកអ្នកចាំទីជម្រើសជាតិប្រេស៊ីល Alisson ក្នុងទឹកប្រាក់ ៦៦,៨លានផោន (ជាង ៨៧លានដុល្លារអាមេរិក) ពីក្លឹប Roma ។ កីឡាករនេះ ត្រូវបានចាត់ទុកជាអ្នកចាំទីឆ្នើមប្រចាំក្របខ័ណ្ឌ Serie A នៅអ៊ីតាលី កាលពីឆ្នាំមុន។ យ៉ាងណាមិញ អ្នកចាំទីវ័យ២៥ឆ្នាំរូបនេះ ល្អជាង David de Gea របស់ Manchester United ដែលជាអ្នកចាំទីឆ្នើមរដូវកាល២០១៧-១៨ នៅ EPL ឬយ៉ាងណា?

Alisson អោបលោក Jurgen Klopp គ្រូបង្វឹក Liverpool (រូបថត៖ Liverpool FC)

បើក្រឡេកមើលការបង្ហាញខ្លួនរវាងកីឡាករទាំងពីរ គឺ Alisson លេងបាន ៣៧ប្រកួត ស្មើ De Gea ដែរ (៣៣៣០នាទី)។ ក៏ប៉ុន្តែ Alisson ធ្វើបាន Clean Sheet ចំនួន ១៧លើក តិចជាង De Gea ចំនួន ១លើក។ រីឯការរបូតគ្រាប់បាល់វិញ Alisson ស្មើជាមួយ De Gea គឺ ២៨គ្រាប់ដូចគ្នា។

ចំពោះភាគរយនៃការជួយសង្គ្រោះ Alisson ចាញ់ De Gea តែបន្តិចប៉ុណ្ណោះ ពោលគឺ ៧៩% ទល់នឹង ៨០% ខណៈការបង្កើតកំហុសឲ្យគូប្រកួតស៊ុតបញ្ចូលទី គឺអ្នកចាំទីទាំងពីរ មិនមាននោះទេ។

De Gea (រូបថត៖ givemesport.com)

ចំណុចដែល Alisson ឈរលើ De Gea គឺការបញ្ជូនបាល់ជោគជ័យ ដោយបញ្ជូនជោគជ័យ ៨៥៤លើកក្នុង ១០៨២លើក ទល់នឹង ៥៤២លើកក្នុង ៩៤២លើក។ គិតជាភាគរយ Alisson បញ្ជូនបាល់ច្បាស់ជាង De Gea ដោយមានអត្រា ៧៨% ទល់នឹង ៥៧%។

សូមជម្រាបថា Alisson ជាអ្នកចាំទីដែលមានតម្លៃខ្លួនខ្ពស់បំផុតក្នុងប្រវតិ្តសាស្ត្របាល់ទាត់ បន្ទាប់ពីបំបែកកំណត់ត្រារបស់ Ederson របស់ក្លឹប Manchester City ដែលបានផ្លាស់ពី Benfica ក្នុងតម្លៃត្រឹមតែ ៣៤,៩លានផោនប៉ុណ្ណោះ៕

ប្រភព៖ Dailymail ប្រែសម្រួល៖ លាភ.