ក្លឹបអ៊ីតាលី១ គ្រោងប្ដឹង Malcom ជុំវិញរឿងនៅពីក្រោយការផ្ទេរទៅកាន់ Barcelona

2018-07-25 08:29:08
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្លឹបបាល់ទាត់អ៊ីតាលី Roma បានបង្ហើបថា ខ្លួនកំពុងពិនិត្យទៅលើជម្រើសដើម្បីប្ដឹងក្លឹបបាល់ទាត់ Bordeaux និងកីឡាករ Malcom បន្ទាប់ពីខ្សែប្រយុទ្ធរូបនេះ បានក្បត់ពាក្យសន្យាហើយលួចចរចាយ៉ាងសម្ងាត់ដើម្បីផ្លាស់ទៅក្លឹប Barcelona ។ នេះជាការបញ្ជាក់ពីលោក Monchi នាយកផ្នែកកីឡារបស់ Roma នាពេលថ្មីៗកន្លងទៅ ។

Malcom (រូបថត៖ Barcelona)

ក្លឹបបារាំង Bordeaux បានយល់ព្រមលក់ Malcom ទៅឲ្យ Barcelona ។ ដើមឡើយ ក្លឹបបារាំងនេះបានយល់ព្រមជាមួយ Roma កាលពីថ្ងៃចន្ទ ទី២៣កក្កដា ប៉ុន្តែក្លឹបនេះបានប្រែក្រឡាស់ហើយបែរជាលក់ទៅឲ្យក្លឹបយក្សនៅអេស្ប៉ាញទៅវិញ ក្រោយរយៈពេលត្រឹមតែ១១ម៉ោងប៉ុណ្ណោះ។

យ៉ាងណាមិញ ទាំងភាគី Bordeaux និង Roma មិនទាន់បានធ្វើលិខិតស្នាមណាមួយ ទាក់ទងនឹងការផ្ទេររបស់ Malcom នោះទេ។ ចំពោះតម្លៃដែល Roma ផ្ដល់ឲ្យ Bordeaux ក៏មិនមានការបញ្ជាក់ផងដែរ។

Malcom ពិនិត្យសុខភាពនៅ Barcelona នៅថ្ងៃទី២៥ កក្កដានេះ (រូបថត៖ Barcelona)

សូមជម្រាបថា Barcelona បានទិញ Malcom ក្នុងតម្លៃ ៤១លានអឺរ៉ូ (ជិត៥០លានដុល្លារអាមេរិក) ដែលកិច្ចព្រមព្រៀងរវាងក្លឹប និងសមាកីឡាករ បានធ្វើឡើងកាលពីថ្ងៃទី២៤ ខែកក្កដា៕

ប្រភព៖ ESPN FC ប្រែសម្រួល៖ លាភ.