គ្រូបឹងកេត រងពិន័យមិនឱ្យចូលរួមប្រកួត ១ខែ និងពិន័យជាប្រាក់ ៥០ម៉ឺនរៀល

2018-07-27 08:20:43
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សហព័ន្ធកីឡាបាល់ទាត់កម្ពុជា (FFC) បានសម្រេចពិន័យលោក ហៅ សុជាតិ គ្រូបង្គោលរបស់ក្លឹបបឹងកេត មិនឱ្យចូលរួមប្រកួតក្នុងព្រឹត្តិការណ៍កីឡាបាល់ទាត់នានាដែលរៀបចំដោយ FFC រយៈពេល១ខែ និងពិន័យជាប្រាក់ ៥០ម៉ឺនរៀលផងដែរ។

ក្នុងសេចក្តីសម្រេចចុះហត្ថលេខាដោយលោក អេង ពៅទិត្យ ប្រធានគណៈកម្មការវិន័យ នៃ FFC កាលពីថ្ងៃទី២៦កក្កដា បានឱ្យដឹងថា ការសម្រេចពិន័យលោក ហៅ សុជាតិ គឺយោងមាត្រា ៤៧ ចំណុច "ក" និងមាត្រា ៤៩ "ក/ខ" នៃក្រមវិន័យរបស់ FFC ពីបទប្រើប្រាស់ឥរិយាបទមិនសមរម្យដាក់មន្រ្តីការប្រកួត គឺរុញ ព្រមទាំងប្រើសម្តីមិនសមរម្យ ដាក់មន្រ្តីការប្រកួត។

លោក ហៅ សុជាតិ ថ្លែងក្នុងសន្និសីទសារព័ត៌មាន១ កាលខែធ្នូ ឆ្នាំ២០១៧

FFC បញ្ជាក់ថា លោក ហៅ សុជាតិ មានសិទ្ធិប្តឹងទៅគណៈកម្មការឧទ្ធរណ៍ FFC ក្នុងរយៈពេល ៥ថ្ងៃក្រោយចេញសេចក្តីសម្រេចនេះ។ បើពុំមានប្តឹងឧទ្ធរណ៍ទេ នោះសេចក្តីសម្រេចនេះ នឹងចូលជាធរមាន។

សូមរំលឹកថា ឥរិយាបថរបស់លោក ហៅ សុជាតិ ដែលត្រូវបាន FFC ចោទប្រកាន់ខាងលើនេះ គឺកើតឡើងនៅក្នុងជំនួបរវាង បឹងកេង និងសូលទីឡូអង្គរ ក្នុងលីគកំពូលកម្ពុជាសប្តាហ៍ទី១៥ កាលពីថ្ងៃទី២១ ខែកក្កដា ឆ្នាំ២០១៧ នៅពហុកីឡដ្ឋានជាតិ។ ពេលនោះ បឹងកេត យកឈ្នះ សូលទីឡូអង្គរ ដោយលទ្ធផល ២-១។

លោក ហៅ សុជាតិ នឹងមិនមានវត្តមានឡើយ ក្នុងពេលដែលបឹងកេត នឹងត្រូវប្រកួតជាមួយក្រសួងការពារជាតិ នៅស្តាតចាស់ នាម៉ោង ៦ល្ងាចថ្ងៃទី២៧កក្កដានេះ ក្នុងលីគកំពូលកម្ពុជាប្រចាំសប្តាហ៍ទី១៦៕

អត្ថបទ៖ សំភី