ទឹកជំនន់ពីឡាវ និងជំនន់ទឹកភ្លៀង នៅតែបន្តគំរាមកំហែងខេត្តស្ទឹងត្រែង

2018-07-30 04:27:10
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

រដ្ឋបាលខេត្តស្ទឹងត្រែង នៅថ្ងៃទី ៣០ ខែកក្កដានេះ បានចេញសេចក្តីជូនដំណឹងមួយ តាមរយៈ ទំព័រហ្វេសប៊ុកផ្លូវការរបស់ខ្លួនថា ទឹកទន្លេមេគង្គក្នុងខេត្តស្ទឹងត្រែង បានបន្តកើនឡើងកម្ពស់ លើសកម្រិតប្រកាសអាសន្នហើយ។ មកដល់ម៉ោង ១០:០០ នាទីព្រឹកថ្ងៃទី ៣០ ខែកក្កដានេះ ទឹកទន្លេមេគង្គក្នុងខេត្តស្ទឹងត្រែង បានបន្តកើនឡើងដល់កម្ពស់ ១០,៧៧ ម៉ ខណៈកម្រិតកម្ពស់ដែលត្រូវប្រកាសឱ្យប្រុងប្រយ័ត្នត្រឹមតែ ១០,៧០ ម៉ ប៉ុណ្ណោះ ។ រដ្ឋបាលខេត្តស្ទឹងត្រែង បន្តថា ពេលនេះទឹកទន្លេបានចាប់ផ្តើមលិចចូលតំបន់ទំនាបមួយចំនួនដែលនៅតាមដងទន្លេជាបណ្តើរៗហើយដែរ។

តំបន់ទំនាបមួយក្នុងក្រុងស្ទឺងត្រែង ដែលទឹកទន្លេមេគង្គហូរចូលលិច (រូបភាព៖ក្រសួងធនធានទឹកនិងឧតុនិយម)

ទាក់ទងនឹងស្ថានភាពកម្ពស់ទឹក និង ករណីគ្រោះទឹកជំនន់នេះដែរ រដ្ឋបាលខេត្តស្ទឹងត្រែងបានចេញសេចក្តីជូនដំណឹងដាច់ដោយឡែកមួយផ្សេងទៀត ដោយឱ្យប្រជាពលរដ្ឋនៅក្នុងខេត្តស្ទឹងត្រែង តាមបណ្តោយដងទន្លេមេគង្គ ទន្លេកុង មានការប្រុងប្រយ័ត្នខ្ពស់ ចំពោះករណីគ្រោះទឹកជំនន់នេះ។

ជាមួយគ្នានេះដែរ រដ្ឋបាលខេត្តស្ទឹងត្រែងក៏បានស្នើឱ្យអាជ្ញាធរមានសមត្ថកិច្ច និង កងកម្លាំងគ្រប់ផ្នែកទាំងអស់ ដាក់ចេញនូវផែនការត្រៀមបង្ការ និងត្រៀមជួយសង្គ្រោះប្រជាពលរដ្ឋ ដែលកំពុងរស់នៅក្នុងមូលដ្ឋាន ដែលអាចនឹងរងផល់ប៉ះពាល់ពីគ្រោះធម្មជាតិនេះ ឱ្យបានទាន់ពេលវេលា ផងដែរ។

ព័ត៌មានចុងក្រោយ ពីក្រសួងធនធានទឹកនិងឧតុនិយម បានឱ្យដឹងថា សង្កាត់ចំនួន ៤ របស់ក្រុងស្ទឺងត្រែង ត្រូវបានទឹកជំនន់ទន្លេមេគង្គ លិចចូលជាបណ្តើរៗហើយ។

មកដល់ម៉ោង ១១ ព្រឹកថ្ងៃទី ៣០ ខែកក្កដា ឆ្នាំ ២០១៨ នេះ ទឹកទន្លេមេគង្គ ក្នុងខេត្តស្ទឹងត្រែង បានបន្តកើនឡើងដល់កម្ពស់ ១០,៨០ ម (កម្ពស់ប្រកាសឲ្យប្រុងប្រយ័ត្ន ១០,៧០ ម) ។ ទឹកទន្លេបានលិចចូលតំបន់ទំនាបមួយចំនួនក្នុងសង្កាត់ចំនួន ០៤ របស់ក្រុងស្ទឺងត្រែង ជាបណ្តើរៗហើយ ក្នុងនោះមានសង្កាត់ព្រះបាទ សង្កាត់ស្រះឫស្សី សង្កាត់ស្ទឹងត្រែង និងសង្កាត់សាមគ្គី ៕