បែក​ធ្លាយ​ថា កូរ៉េខាងជើង​កំពុង​ផលិត​មីស៊ីល​អន្តរទ្វីប​ជា​ថ្មី

  • 2018-07-31 01:26:07
  • ចំនួនមតិ 0 | ចំនួនចែករំលែក 0

ចន្លោះមិនឃើញ


សារព័ត៌មាន​អាមេរិក Washington Post កាលពី​ថ្ងៃ​ទី៣០ ខែ​កក្កដា ២០១៨ ម្សិលមិញ បាន​រាយការណ៍​ថា កូរ៉េខាងជើង​ហាក់​ដូច​ជា​កំពុង​ផលិត​សារធាតុ​ផ្សំ​មីស៊ីល​បាល្លីស្ទិក​អន្តរទ្វីប ក្នុង​រោងចក្រ​មួយ​កន្លែង នៅ​ក្រុង Sanumdong ដែល​មាន​ចម្ងាយ​ប្រមាណ ២៧​គីឡូម៉ែត្រ​ពី​ក្រុង​ព្យុងយ៉ាង។

មីស៊ីល Hwasong-14 ដែល​ត្រូវ​បាន​កូរ៉េខាងជើង​បាញ់​សាកល្បង​កាលពី​ខែ​កក្កដា ឆ្នាំ​២០១៧ កន្លង​ទៅ (រូបភាព៖ KCNA)

សារព័ត៌មាន​មួយ​នេះ​បញ្ជាក់​ថា ទីភ្នាក់ងារ​ចារកម្ម​អាមេរិក​ចាប់​បាន​សញ្ញាណ​ជាច្រើន​ក្នុង​សំណង់​រោងចក្រ​ស្រាវជ្រាវ​ដ៏​ធំ​មួយ នៅ​ក្រុង Sanumdong។ ការ​ចាប់​បាន​សញ្ញាណ​សង្ស័យ​ជុំវិញ​ការ​ផលិត​មីស៊ីល​នេះ គឺ​ក្រោយ​មេដឹកនាំ​កំពូល​កូរ៉េខាងជើង គីម ជុងអ៊ុន និង​លោក​ប្រធានាធិបតី​អាមេរិក ដូណាល់ ត្រាំ កាលពី​ថ្ងៃ​ទី១២ ខែ​មិថុនា ២០១៨ កន្លង​ទៅ បាន​ជួប​ជជែក​គ្នា​ស្ដី​ពី​បញ្ហា​សព្វាវុធ​កូរ៉េខាងជើង។

ចំណែក​លោក Mike Pompeo រដ្ឋមន្រ្តី​ការបរទេស​អាមេរិក កាលពី​សប្ដាហ៍​មុន​បាន​ប្រាប់​គណៈកម្មាធិការ​ទំនាក់ទំនង​អន្តរជាតិ​នៃ​ព្រឹទ្ធសភា​អាមេរិកថា កូរ៉េខាងជើង​កំពុង​បន្ដ​ចម្រាញ់​សារធាតុ​ផលិត​គ្រាប់បែក​នុយក្លេអ៊ែរ ក្រោយ​ពី​សន្យា​បញ្ឈប់​ការ​អភិវឌ្ឍ​កម្មវិធី​នុយក្លេអ៊ែរ។ លោក​បញ្ជាក់​ថា រដ្ឋបាល ដូណាល់ ត្រាំ នឹង​នៅ​តែ​បន្ដ​ជជែក​ជាមួយ​ក្រុង​ព្យុងយ៉ាង​ទៀត ពី​បញ្ហា​នេះ។

សូម​ជម្រាប​ថា ក្រោយ​ជំនួប​កំពូល ដូណាល់ត្រាំ-គីមជុងអ៊ុន នៅ​សិង្ហបុរី កាលពី​ថ្ងៃ​ទី១២ ខែ​មិថុនា ២០១៨ កន្លង​ទៅ លោក គីម ជុងអ៊ុន បាន​សន្យា​ជាមួយ​ភាគី​អាមរិក​ថា កូរ៉េខាងជើង​នឹង​រំលាយ​កម្មវិធី​អភិវឌ្ឍ​នុយក្លេអ៊ែរ​របស់​ខ្លួន ប៉ុន្ដែ​ពុំ​បាន​បញ្ជាក់​ពី​ព័ត៌មាន​លម្អិត​ស្ដី​ពី​ការ​រំលាយ​អាវុធ​នុយក្លេអ៊ែរ​នោះ​ទេ៕

ប្រភព៖ Channelnewsasia ប្រែ​សម្រួល៖ វាសនា

;