ប្រទេស៣រួមគ្នាជំរុញហេដ្ឋារចនាសម្ពន្ធនៅឥណ្ឌូ-ប៉ាស៊ីហ្វិក ដើម្បីតទល់នឹងឥទ្ធិពលចិន

2018-07-31 06:29:42
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សហរដ្ឋអាមេរិក អូស្ត្រាលី និងជប៉ុន នឹងរួមគ្នាវិនិយោគលើគម្រោងហេដ្ឋារចនាសម្ពន្ធនៅឥណ្ឌូ-ប៉ាស៊ីហ្វិក ក្នុងគោលបំណងប្រឆាំងនឹងមហិច្ឆតាចិន ដែលព្យាយាមជះឥទ្ធិពលទៅលើតំបន់។

រដ្ឋាភិបាលក្រុងប៉េកាំង បានផ្ដល់កម្ចីឲ្យបណ្ដាប្រទេសជាច្រើននៅអាស៊ី ក្នុងចំនួនរាប់ពាន់លានដុល្លារអាមេរិក ដែលជាយុទ្ធសាស្ត្រអភិវឌ្ឍន៍នៃគម្រោង "គំនិតផ្ដួចផ្ដើមផ្លូវមួយ ខ្សែក្រវាត់មួយ" ហើយក្នុងនោះក៏មានប្រទេសដីកោះមួយចំនួននៅក្នុងតំបន់ប៉ាស៊ីហ្វិកផងដែរ។

ពាក់ព័ន្ធនឹងរឿងនេះ រដ្ឋាភិបាលអូស្ត្រាលី បានបង្ហាញពីក្ដីបារម្ភ កាលពីប៉ុន្មានខែថ្មីៗកន្លងទៅដែលថ ប្រទេសតូចៗមួយចំនួនប្រហែលជាអាចជាប់អន្ទាក់របស់ចិន ជ្រុលខ្លួនក្នុងបំណុលដែលសងមិនចេះចប់មិនហើយ។ លោកស្រី Julie Bishop រដ្ឋមន្ត្រីការបរទេសអូស្ត្រាលី បាននិយាយថា ការចាប់ដៃគូជាត្រីភាគី (អូស្ត្រាលី-អាមេរិក-ជប៉ុន) នឹងជំរុញចលនាគម្រោងវិនិយោគ ហើយអាចបង្កើតជាកំណើនសេដ្ឋកិច្ច និងឱកាសជាច្រើននៅឥណ្ឌូ-ប៉ាស៊ីហ្វិក។ "ការវិនិយោគល្អៗកើតចេញពីតម្លាភាព ការប្រកួតប្រជែងបើកចំហ និរន្តរភាព ការប្រកាន់ខ្ជាប់ខ្ជួននូវស្ដង់ដារពិភពលោក និងការប្រើប្រាស់កម្លាំងពលកម្មក្នុងប្រទេស ដោយជៀសវាងនូវរនាំងបំពុលដែលគ្មានដែនកំណត់" នេះជាការរៀបរាប់របស់លោកស្រីរដ្ឋមន្ត្រី។

សូមបញ្ជាក់ថា កាលពីដើមខែកក្កដា ឆ្នាំ២០១៨ នេះ ចិនបានប្រកាសថា ខ្លួនកំពុងរៀបចំគម្រោងកិច្ចប្រជុំជាលើកដំបូងមួយ រវាងលោក ស៊ី ជីនពីង និងបណ្ដាមេដឹកនាំប៉ាស៊ីហ្វិក មុននឹងការប្រព្រឹត្តទៅនៃវេទិកាកិច្ចសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក (APEC) នៅក្នុងប្រទេសប៉ាពួញហ្គីណេ នៅពាក់កណ្ដាលខែវិច្ឆិកាខាងមុខ៕

ប្រភព៖ Business Times ប្រែសម្រួល៖ ឈាង.