គ្រូ Real Madrid បង្ហើបពីកីឡាករសក្ដិសមបំផុត សម្រាប់ជំនួសតំណែង Ronaldo

2018-08-01 03:40:31
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក Julen Lopetegui គ្រូបង្វឹកថ្មីក្លឹបអធិរាជស Real Madrid បានអះអាងថា លោកបានសម្លឹងឃើញកីឡាករម្នាក់ដែលអាចជំនួសតំណែងរបស់ Cristiano Ronaldo គឺតារាបាល់ទាត់សញ្ជាតិវែល Gareth Bale ។

Gareth Bale

ការលើកឡើងនេះ ត្រូវបានធ្វើឡើងក្នុងសន្និសីទសារព័ត៌មាន មុនការជួបគ្នារវាង Real Madrid ជាមួយ Manchester United ក្នុងការប្រកួតពានរង្វាន់ International Champions Cup នៅក្រុង Miami កាលពីថ្ងៃទី៣១ ខែកក្កដា ឆ្នាំ២០១៨។

Ronaldo បានចែកផ្លូវពី Real Madrid ទៅចូលរួមជាមួយក្លឹប Juventus ក្រោយការតែងតាំងគ្រូបង្វឹកថ្មី Lopetegui ដែលជាអតីតគ្រូបង្វឹកក្រុមជម្រើសជាតិអេស្ប៉ាញ។ ចំពោះ Bale ដែលមិនសូវស្ថិតក្នុងក្រសែភ្នែករបស់លោក Zidane អតីតគ្រូបង្វឹក Real Madrid នោះ ត្រូវបានលោក Lopetegui សរសើរថា ជាកីឡាករដ៏អស្ចារ្យម្នាក់ និងមានសមត្ថភាពគ្រប់គ្រាន់ដើម្បីជំនួសតំណែងរបស់ Ronaldo ។

លោក Julen Lopetegui

Bale ដែលមានវ័យ ២៩ឆ្នាំ បានផ្លាស់ពី Tottenham Hotspur ទៅកាន់ Real Madrid កាលពីឆ្នាំ២០១៣ និងជួយឲ្យក្រុមអធិរាជស ក្លាយជាជើងឯក UEFA Champions League ចំនួន ៤លើក។ ប៉ុន្មានខែកន្លងទៅ Bale បានរួមចំណែកឲ្យ Real Madrid យកឈ្នះ Liverpool ក្នុងវគ្គផ្តាច់ព្រ័ត្រ UCL ដោយលទ្ធផល ៣-១ ផងដែរ ដោយគេរកបាន ២គ្រាប់។

ពេលកន្លងទៅ Bale ត្រូវបានរាយការណ៍ថា ចង់ចាកចេញពី Real Madrid ប៉ុន្តែអ្វីៗបានស្ងប់ស្ងាត់ បន្ទាប់ពីការតែងតាំងគ្រូបង្វឹកថ្មី៕

ប្រភព៖ BBC ប្រែសម្រួល៖ លាភ.