Pogba ដាក់លក្ខខ័ណ្ឌជាមួយ Man Utd បើចង់ឲ្យគេបន្តនៅយូរទៀត

2018-08-08 07:14:43
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ខ្សែបម្រើ Paul Pogba បានប្រាប់ដល់ម្ចាស់ក្លឹបបិសាចក្រហម Manchester United ឲ្យដំឡើងប្រាក់ឈ្នួលរបស់ខ្លួនទ្វេដង ពី ១៨ម៉ឺនផោន ទៅដល់ ៣៨ម៉ឺនផោនក្នុងមួយសប្ដាហ៍ ដើម្បីឲ្យខ្លួនបន្តស្នាក់នៅជាមួយក្លឹបនេះយូរទៀត។ នេះបើតាមការចុះផ្សាយរបស់វេបសាយ The Sun នៅថ្ងៃទី៨ ខែសីហា ឆ្នាំ២០១៨។

Pogba (រូបថត៖ Reuters)

The Sun បានឲ្យដឹងថា Pogba នឹងជួបជាមួយលោក Ed Woodward នាយកប្រតិបត្តិ Man Utd ក្នុងសប្ដាហ៍នេះ ដើម្បីប្រាប់ពីបំណងក្នុងការចាកចេញពីក្លឹបបិសាចក្រហម មុនការចាប់ផ្ដើមរដូវកាល២០១៨-១៩។

ប្រភពដដែលបានបន្តថា កីឡាករវ័យ២៥ឆ្នាំខាងលើ បានប្រាប់មិត្តរួមក្រុមរបស់ខ្លួនថា គេចង់ចេញពី Man Utd ។ ចំណែកភ្នាក់ងាររបស់ Pogba គឺលោក Mino Raiola បានទៅដល់ក្លឹប Man Utd កាលពីថ្ងៃចន្ទ ទី៦ សីហាកន្លងទៅ ដើម្បីពិភាក្សាពីការផ្លាស់ទ្រនំរបស់ Pogba ។

បើតាមរបាយការណ៍ ក្លឹប Barcelona និង Juventus កំពុងតាមចែចង់ ដើម្បីនាំយកកីឡាករសញ្ជាតិបារាំងនេះទៅចូលរួមក្លឹបរបស់ពួកគេ នៅរដូវកាលថ្មី។

ទំនាក់ទំនងរវាង Pogba និងលោក Jose Mourinho អ្នកចាត់ការ Man Utd ជួបវិបត្តិ កាលពីរដូវកាលមុន (រូបថត៖ Reuters)

គួរបញ្ជាក់ថា ពីឆ្នាំ២០១៦-១៨ Pogba បានលេងឲ្យ Man Utd ចំនួន ៨៨ប្រកួត ស្មើ ៧២២៨នាទី។ ក្នុងនោះ Pogba រកបាន ១៥គ្រាប់ Assist ១៨ ។ តាមកិច្ចសន្យាដែលក្លឹប និងសាមីកីឡាករ បានចុះកាលពីឆ្នាំ២០១៦ Pogba ទទួលបាន ១៨ម៉ឺនផោនក្នុងមួយសប្ដាហ៍ និងផុតសុពលភាពនៅឆ្នាំ២០២១៕

អត្ថបទ៖ លាភ.