Duterte ឆ្លើយតប​​នឹង​​ចិន ដែល​​អះអាង​ពីកម្មសិទ្ធិ​នៅ​ជុំវិញ​កោះសិប្បនិមិត្ត​ក្នុងសមុទ្រចិនខាងត្បូង

  • 2018-08-15 05:38:17
  • ចំនួនមតិ 0 | ចំនួនចែករំលែក 0

ចន្លោះមិនឃើញ


លោក​ប្រធានាធិបតី​ហ្វីលីពីន Rodrigo Duterte បាន​និយាយ​កាល​ពី​ថ្ងៃ​អង្គារ​ម្សិលមិញ​ថា ការ​អះអាង​របស់​ចិន​ ដែល​ចាត់​ទុក​ដែន​អាកាស នៅ​ពី​លើ​កោះ​សិប្បនិមិត្ត និង​ដែន​ទឹក​ជុំវិញ ក្នុង​តំបន់​ជម្លោះ​សមុទ្រ​ចិន​ខាងត្បូង​ជា​របស់​កម្មសិទ្ធិខ្លួន​ គឺ​ «មិន​ត្រឹម​ត្រូវ​នោះ​ទេ»។

ការ​លើក​ឡើង​របស់​លោក​ Duterte គឺ​ធ្វើ​ឡើង​នៅ​ក្នុង​សន្ទរកថា​មួយ ដែល​ក្នុង​នោះ​អគ្គរដ្ឋទូត​អាមេរិក​ប្រចាំ​ហ្វីលីពីន ក៏​បាន​ចូល​រួម​ក្នុង​កម្មវិធី​នេះ​ផង​ដែរ។

លោក Duterte ថ្លែង​នាពេលកន្លងមក (រូបថត៖ Reuters)
បើ​តាម​ការ​ចុះផ្សាយ​របស់​ទីភ្នាក់ងារ AP នៅ​ថ្ងៃ​ទី ១៥ សីហា​នេះ លោក Duterte បាន​និយាយ​បែប​នេះ​ថា​៖ «អ្នក[ចិន] មិន​អាច​សាងសង់​កោះ​សិប្បនិមិត្ត​ ហើយ​និយាយ​ថា ដែន​អាកាស​នៅ​ពី​លើ​កោះ​នោះ​ ជា​របស់​អ្នក​បាន​ទេ។ ការ​អះអាង​នេះ​ គឺ​មិន​ត្រឹម​ត្រូវ​​នោះ​ឡើយ ដោយ​ហេតុ​ថា ​ដែន​សមុទ្រ​ទាំង​នោះ​ គឺ​យើង​ចាត់​ទុក​វា​ថា ​ជា​ ***ដែន​សមុទ្រ​អន្តរជាតិ*** »។ សូម​បញ្ជាក់​បន្តិច​ដែរ​ថា យោង​តាម​ច្បាប់​អន្តរជាតិ ដែន​សមុទ្រ​ជម្លោះ​ដែល​មិន​ទាន់​ដោះ​ស្រាយ​រួច​រាល់ គឺ​ត្រូវ​បាន​គេ​ចាត់​ទុក​វា​ថា ជា​ «ដែន​សមុទ្រ​អន្តរជាតិ» ។ នេះ​មាន​ន័យ​ថា បណ្ដា​ប្រទេស​ក្នុង​តំបន់​ជម្លោះ គ្មាន​សិទ្ធិ​អះអាង​តំបន់​ទាំង​នោះ ជា​កម្មសិទ្ធិ​របស់​ខ្លួន​ជាដាច់​ខាត។ ។

លោក​នាយករដ្ឋមន្ត្រី​វ័យ៧៣ឆ្នាំ​រូប​នេះ បាន​បន្ថែម​ទៀត​ថា សិទ្ធិ​នៃ​ការ​ធ្វើ​ចរាចរ​ ត្រូវ​បាន​ធានា​ ដោយ​ពុំ​ចាំ​បាច់​ទទួល​ការអនុញ្ញាត​ពី​ប្រទេស​ណា ដើម្បី​បរ​ឆ្លង​កាត់​ដែន​សមុទ្រ​នោះ​ឡើយ។

កោះសិប្បនិមិត្តចិន ថតពីលើ​អាកាស (រូបថត៖ scmp)

ទន្ទឹម​នឹង​នេះ បុរស​ខ្លាំង​ហ្វីលីពីន​រូប​នេះ បាន​រិះ​គន់​ធ្ងន់​ៗ​ទៀត​ថា ជម្លោះ​អាច​នឹង​ផ្ទុះ​ឡើង ដោយសារ​ចិន​ទាមទារ​ឲ្យ​យន្តហោះ​ និង​នាវា​ហ្វីលីពីន ​ចាក​ចេញ​ពី​ដែន​សមុទ្រ​ចិន​ខាង​ត្បូង ខណៈ​ដែល​ពួក​គេ​ កំពុង​បរ​ល្បាត​ជុំវិញ​តំបន់​នោះ។

គួរ​រម្លឹក​ដែរ​ថា កាល​ពី​ដើម​ខែ​សីហា​កន្លង​ទៅ រដ្ឋាភិបាល​ក្រុង​ម៉ានីល បាន​បង្ហាញ​ក្ដី​កង្វល់​កាន់​តែ​ខ្លាំង​​ ចំពោះ​រដ្ឋាភិបាល​ក្រុង​ប៉េកាំង​ ជុំវិញ​ការ​កើន​ឡើង​សញ្ញា​ព្រមាន​យន្តហោះ និង​នាវា​ហ្វីលីពីន ឲ្យ​ស្ថិតនៅ​ឆ្ងាយ​ពី​កោះ និង​ទឹកដី​ក្នុង​សមុទ្រ​ចិន​ខាងត្បូង ដែល​កំពុង​ទាមទារ​ដោយ​ប្រទេស​ទាំង​ពីរ៕

អត្ថបទ​ទាក់​ទង៖ ហ្វីលីពីន​ព្រួយ​បារម្ភ​កាន់​តែ​ខ្លាំង​ឡើង ក្រោយ​ទទួល​សញ្ញា​ព្រមាន​ពី​ចិន​កាន់​តែ​ច្រើន​ឡើង

ប្រភព៖ South China Morning Post ប្រែ​សម្រួល៖ អឹុម ម៉េងស៊ាង

;