គណបក្សប្រជាជនកម្ពុជា ប្រកាសមិនបែងចែកអាសនៈឱ្យទៅគណបក្សដទៃឡើយ

2018-08-16 04:18:34
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

គណបក្សប្រជាជនកម្ពុជា បានប្រកាសថា ខ្លួនមិនបែងចែកអាសនៈក្នុងរដ្ឋសភា ទៅឱ្យគណបក្សផ្សេងទៀត ដែលមិនទទួលបានអាសនៈនោះឡើយ។ នេះបើតាមការថ្លែងបញ្ជាក់របស់លោក សុខ ឥសាន អ្នកនាំពាក្យគណបក្សប្រជាជនកម្ពុជា ក្នុងសន្និសីទសារព័ត៌មាននាព្រឹកថ្ងៃទី១៦ ខែសីហា ឆ្នាំ២០១៨នេះ នៅសណ្ឋាគារសូហ្វីតែល។

លោកបានបញ្ជាក់យ៉ាងដូច្នេះថា៖ «គណបក្សប្រជាជនកម្ពុជា មិនក្បត់ឆន្ទៈប្រជាពលរដ្ឋនោះទេ ប្រជាពលរដ្ឋបោះឆ្នោតគាំទ្រគណបក្សប្រជាជនកម្ពុជា ទទួលបានអាសនៈចំនួន១២៥ នៅក្នុងរដ្ឋសភា ហេតុនេះមិនអាចយកឆន្ទៈប្រជាពលរដ្ឋទៅបែងចែកឱ្យគណបក្សផ្សេងដែលមិនទទួលបានអាសនៈនោះទេ»។

លោក សុខ ឥសាន (កណ្តាល) ថ្លែងក្នុងសន្និសីទសារព័ត៌មាននាព្រឹកថ្ងៃទី១៦ ខែសីហា ឆ្នាំ២០១៨នេះ នៅសណ្ឋាគារសូហ្វីតែល។

សូមជម្រាបថា លទ្ធផលផ្លូវការនៃការបោះឆ្នោតជ្រើសតាំងតំណាងរាស្ត្រ នីតិកាលទី៦ ដែលប្រកាសដោយ គ.ជ.ប កាលពីយប់ថ្ងៃទី១៥ ខែសីហា បានបង្ហាញថា គណបក្សប្រជាជនកម្ពុជា ទទួលបានសំឡេងឆ្នោតសរុបចំនួន ៤ ៨៨៩ ១១៣សំឡេង ដោយទទួលបានអាសនៈទាំង ១២៥នៅក្នុងរដ្ឋសភា។

ទោះជាយ៉ាងណា មន្រ្តីអ្នកនាំពាក្យរូបនេះ លើកឡើងថា គណបក្សប្រជាជនកម្ពុជា នឹងបន្តធ្វើការសហការជាមួយបណ្តាគណបក្សនយោបាយ សង្គមស៊ីវិល និងគ្រប់មជ្ឈដ្ឋានដើម្បីការរីកចម្រើនជឿនលឿនក្នុងសង្គម តាមគោលការណ៍នៃលទ្ធិប្រជាធិបតេយ្យ នីតិរដ្ឋ និងអភិបាលកិច្ចល្អ និងឈរលើស្មារតីបង្រួបបង្រួមជាតិ សំដៅពង្រឹង និងពង្រីកកម្លាំងជាតិទាំងមូល៕

អត្ថបទ៖ សោភា