នូវែលហ្សេឡង់ ចេញច្បាប់ហាមឃាត់ការលក់ផ្ទះទៅឲ្យជនបរទេស

2018-08-16 12:36:57
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សភានូវែលហ្សេឡង់ កាលពីថ្ងៃទី១៥ សីហាម្សិលមិញ បានអនុម័តច្បាប់មួយស្ដីពី ការហាមឃាត់ជនបរទេស មិនឲ្យទិញផ្ទះក្នុងប្រទេសរបស់ខ្លួន។

ច្បាប់ដែលទទួលបានសំឡេងអនុម័ត ៦៣ ទល់នឹង ៥៧នេះ គឺត្រូវបានបង្កើតឡើង ក្នុងគោលបំណងធ្វើឲ្យផ្ទះក្នុងប្រទេសនេះមានតម្លៃសមរម្យ ដែលអាចឲ្យប្រជាជននូវែលហ្សេឡង់ មានលទ្ធភាពទិញសម្រាប់រស់នៅបាន។

ដំបូលផ្ទះ ថតពីលើអាកាស នៅក្នុងប្រទេសនូវែលហ្សេឡង់ (រូបថត៖ Reuters)

ច្បាប់ថ្មីនេះដែរ គឺអនុវត្តតែទៅលើជនបរទេសដែលមិនមានសញ្ជាតិនូវែលហ្សេឡង់ប៉ុណ្ណោះ ប៉ុន្តែលើកលែងចំពោះប្រជាជនមកពីប្រទេសចំនួន ២ គឺសិង្ហបុរី និងអូស្ត្រាលី។ ការលើកលែងនេះ គឺដោយសារតែ ប្រទេសទាំង៣ (នូវែលហ្សេឡង់-អូស្ត្រាលី-សិង្ហបុរី) មានកិច្ចព្រមព្រៀងពាណិជ្ជកម្មសេរីជាមួយគ្នា។

គួរបញ្ជាក់ដែរថា សព្វថ្ងៃនេះ ប្រទេសនូវែលហ្សេឡង់ កំពុងប្រឈមមុខនឹងវិបត្តិលំនៅឋាន ដែលនាំឲ្យប្រជាជនរបស់ខ្លួនខ្វះលទ្ធភាពក្នុងការទិញផ្ទះសម្រាប់រស់នៅបាន។

តើអ្វីជាមូលហេតុចម្បង ដែលនៅពីក្រោយការបង្កើតច្បាប់ថ្មីនេះ?

ការហាមឃាត់នេះ គឺធ្វើឡើង បន្ទាប់ពីរដ្ឋាភិបាលនូវែលហ្សេឡង់ នាពេលកន្លងមក បានបង្ហាញក្ដីព្រួយបារម្ភថា ជនបរទេសដែលទៅទិញផ្ទះនៅក្នុងប្រទេសខ្លួន បាន និងកំពុងដាក់សម្ពាធយ៉ាងខ្លាំងទៅលើតម្លៃផ្ទះ និងហេដ្ឋារចនាសម្ព័ន្ធ។

យោងតាមស្ថិតិរបស់រដ្ឋាភិបាលនូវែលហ្សេឡង់ បានឲ្យដឹងថា ភាគច្រើននៃអ្នកទិញផ្ទះដែលជាជនបរទេស គឺមកពីប្រទេសចិន និងបណ្តាប្រទេសជិតខាងអូស្ត្រាលី។

បើពិតទៅ តម្លៃផ្ទះជាមធ្យមនៅក្នុងប្រទេសនូវែលហ្សេឡង់ បានកើនឡើងយ៉ាងគំហុក គឺដល់ជាង ៦០% គិតត្រឹមរយៈពេល ១០ឆ្នាំចុងក្រោយនេះ។ ខណៈដែលតម្លៃផ្ទះនៅក្នុងទីក្រុង Auckland ដែលជាទីក្រុងធំបំផុត បានកើនឡើងដល់ទៅជិត ២ដងឯណោះ។

យោងតាមរបាយការណ៍របស់វិទ្យាស្ថានអចលនទ្រព្យនូវែលហ្សេឡង់ បានបង្ហាញថា តម្លៃផ្ទះមធ្យមនៅក្នុងទីក្រុង Auckland គឺមានតម្លៃ ៥៤៧ ០០០ដុល្លារ ខណៈតម្លៃផ្ទះមធ្យមនៅទូទាំងប្រទេស មានតម្លៃ ៣៦២ ១៧៥ដុល្លារ៕

ប្រភព៖ BBC | Straits Times ប្រែសម្រួល៖ អឹុម ម៉េងស៊ាង