អាមេរិក គ្រោងបញ្ជូនពលរដ្ឋខ្មែរ ៣០នាក់ទៀតមកកម្ពុជា នៅសប្តាហ៍ក្រោយ

2018-08-17 04:28:04
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អាជ្ញាធរសហរដ្ឋអាមេរិក នឹងបញ្ជូនពលរដ្ឋខ្មែរដែលបានប្រព្រឹត្តបទល្មើសនៅអាមេរិក ៣០នាក់បន្ថែមទៀតមកកាន់ប្រទេសកម្ពុជា នៅថ្ងៃទី២២ ខែសីហាខាងមុខ។ នេះបើតាមឱ្យដឹងពីលោក តាន់ សូនិក នាយកប្រតិបត្តិអង្គការគាំពារពលរដ្ឋខ្មែរគ្មានទីពឹង កាលពីថ្ងៃទី១៦សីហាម្សិលមិញ។ ទោះជាយ៉ាងណា លោកថា អង្គការរបស់លោកនៅមិនទាន់បានទទួលបញ្ជីឈ្មោះ ពីអាជ្ញាធរអាមេរិកនៅឡើយទេរហូតមកដល់ពេលផ្សាយនេះ។

លោក តាន់ សូនិក បញ្ជាក់ថា រហូតមកដល់ពេលនេះ មានពលរដ្ឋខ្មែរចំនួន ៦៣៩នាក់ហើយ ដែលត្រូវបានអាជ្ញាធរអាមេរិកបញ្ជូនមកដល់កម្ពុជាវិញ ក្នុងនោះមានបុរស៦២៣នាក់ និងស្ត្រី ១៦នាក់។

លោកបន្ថែមថា ការប្រឈមខ្លាំងនោះ គឺពលរដ្ឋខ្មែរមួយចំនួនដែលត្រលប់មកកម្ពុជាវិញហើយនោះ ខ្វះការជួយជ្រោមជ្រែងពីគ្រួសារនៅអាមេរិក និងនៅស្រុកខ្មែរ នៅពេលអ្នកត្រូវបញ្ជូនត្រលប់មកវិញមានចំនួនកាន់តែច្រើនឡើង។ ពលរដ្ឋខ្មែរទាំងនេះខ្វះចំណេះដឹងផ្នែកវប្បធម៌ និងភាសាខ្មែរ ដែលធ្វើឱ្យពួកគេមានការលំបាកក្នុងការធ្វើសមាហរណកម្ម សម្របខ្លួនចូលទៅក្នុងសង្គមខ្មែរ។

យោងតាមកិច្ចព្រមព្រៀងរវាងរដ្ឋាភិបាលអាមេរិក និងរាជរដ្ឋាភិបាលកម្ពុជាកាលពីឆ្នាំ២០០២ សហរដ្ឋអាមេរិកនឹងបញ្ជូនពលរដ្ឋខ្មែរ ដែលបានប្រព្រឹត្តបទឧក្រិដ្ឋនៅសហរដ្ឋអាមេរិកមកកាន់ប្រទេសកំណើតវិញ ក្រោយពីពួកគេបានជាប់ពន្ធនាគារនៅអាមេរិកតាមការកំណត់របស់តុលាការរួចហើយ។ អ្នកដែលត្រូវបាននិរទេសចេញពីអាមេរិកទាំងនោះ គឺត្រូវតែជាអ្នកមិនទាន់មានសញ្ជាតិអាមេរិក ទោះបីជាពួកគេបានមករស់នៅក្នុងទឹកដីសហរដ្ឋអាមេរិកអស់រយៈពេលជាច្រើនឆ្នាំយ៉ាងណាក្តី។ ពួកគេភាគច្រើនមករស់នៅសហរដ្ឋអាមេរិកតាំងពីវ័យកុមារ មកជាមួយឪពុកម្ដាយក្នុងឋានៈជាជនភៀសខ្លួនក្រោយរបបខ្មែរក្រហមបានដួលរលំ។ ក្នុងករណីពលរដ្ឋខ្មែរដែលមានសញ្ជាតិអាមេរិកហើយ ក្រោយពេលជាប់ទោស ពួកគេនឹងមិនអាចត្រូវបានបញ្ជូនចេញពីប្រទេសអាមេរិកឡើយ នេះបើផ្អែកតាមច្បាប់អាមេរិក។

លោក អេរិន ឆ្វាតជេស (Arend Zwartjes) អ្នកនាំពាក្យស្ថានទូតអាមេរិកប្រចាំនៅរាជធានីភ្នំពេញ បានប្រាប់អាស៊ីសេរីតាមសារអេឡិកត្រូនិចកាលពីពេលថ្មីៗនេះថា សហរដ្ឋអាមេរិកនឹងបន្តធ្វើការជាមួយរាជរដ្ឋាភិបាលកម្ពុជា ដើម្បីទទួលយកពលរដ្ឋកម្ពុជាដែលពុំមានសិទ្ធិរស់នៅក្នុងសហរដ្ឋអាមេរិក។

បុរសម្នាក់ដើរកាត់មុខស្ថានទូតអាមេរិកប្រចាំរាជធានីភ្នំពេញ នាពេលកន្លងមក។ រូបថត៖ Reuters

លោកបន្ថែមទៀតថា ស្ថានទូតសហរដ្ឋអាមេរិក បានផ្តល់ជំនួយឧបត្ថម្ភដល់អង្គការក្រៅរដ្ឋាភិបាលមួយឈ្មោះថា អង្គការគាំពារពលរដ្ឋខ្មែរគ្មានទីពឹង ឬហៅកាត់ថាខ្វាវ (KVAO) ដើម្បីជួយដល់ពលរដ្ឋខ្មែរដែលត្រូវបានបញ្ជូនមកវិញទាំងនេះ ធ្វើការសម្របខ្លួនក្នុងការរស់នៅក្នុងសង្គមកម្ពុជា។

លោកឧត្ដមសេនីយ៍ ម៉ៅ ចាន់តារា អគ្គនាយកនៃអគ្គនាយកដ្ឋានអត្តសញ្ញាណកម្ម ក្រសួងមហាផ្ទៃ ថ្មីៗនេះ ត្រូវបានកាសែតភ្នំពេញប៉ុស្តិ៍ ស្រង់សំដីចុះផ្សាយថា សមត្ថកិច្ចកម្ពុជាមានការខ្វះខាតសម្ភារៈនិងអាគារសម្រាប់ទទួលជនជាតិខ្មែរដែលអាជ្ញាធរអាមេរិកបញ្ជូនមកវិញ ដួចនេះធ្វើឱ្យមានការលំបាកខ្លាំង ក្នុងការធ្វើសមាហរណកម្មពួកគេទៅក្នុងសង្គមកម្ពុជា។ លោកថា ភាគីកម្ពុជាបានស្នើទៅខាងភាគីអាមេរិកអោយជួយផ្ដល់នូវអ្វីដែលកម្ពុជាត្រូវការ តែរហូតមកដល់ពេលនេះ កម្ពុជានៅតែមិនទាន់បានទទួលការឆ្លើយតបណាមួយពីភាគីសហរដ្ឋអាមេរិកនោះនៅឡើយទេ៕

ប្រភព៖ Radio Free Asia ប្រែសម្រួល៖ សំភី