លោក មហាធៀ ចង់ឲ្យម៉ាឡេស៊ី រៀនសូត្រពីចិន ទៅលើវិស័យមួយ

2018-08-20 03:05:32
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោកនាយករដ្ឋមន្ត្រីម៉ាឡេស៊ី មហាធៀ មហាម៉ាត់ បាននិយាយកាលពីថ្ងៃទី ១៩ សីហាម្សិលមិញ ថា លោក មានបំណងចង់ឲ្យម៉ាឡេស៊ី រៀនសូត្រពីចិន ទៅលើវិស័យបច្ចេកវិទ្យា។

ថ្លែងនៅក្នុងកិច្ចសម្ភាសន៍ជាមួយទីភ្នាក់ងារសារព័ត៌មានចិន CGTN លោកមហាធៀ បានលើកឡើងថា «ចិន បានបង្កើតនូវប្រព័ន្ធ និងបច្ចេកវិទ្យាថ្មីៗជាច្រើន ដែលពួកវា បានជួយលើកកម្ពស់ដល់ដំណើរការសេដ្ឋកិច្ច និងធនធានទ្រព្យសម្បត្តិរបស់ចិន។ យើងចង់រៀនសូត្រពីចិន ទៅលើវិស័យនេះ។ ដូច្នេះយើងក៏អាចសម្រេចជោគជ័យសម្រាប់ប្រទេសយើងផងដែរ»។

លោក មហាធៀ ថ្លែងនៅក្នុងកិច្ចសម្ភាសន៍ជាមួយទីភ្នាក់ងារសារព័ត៌មានចិន CGTN កាលពីថ្ងៃទី ១៩ សីហា ឆ្នាំ២០១៨ (រូបថត៖ CGTN)

ជាមួយគ្នានេះ លោកនាយករដ្ឋមន្ត្រីវ័យ ៩៣ឆ្នាំរូបនេះ បានលើកសរសើរដល់លោក Jack Ma ស្ថាបនិកក្រុមហ៊ុន Alibaba ថា គំនិតរបស់លោក Ma បានផ្ដល់វិភាគទានជាច្រើនដល់វិស័យជំនួញ ជាពិសេស គឺបានជួយទៅដល់ឧស្សាហកម្មធនតូច។ លោក រំពឹងថា សហគ្រាសធនតូច និងមធ្យមរបស់ម៉ាឡេស៊ី អាចទទួលបានផលប្រយោជន៍ពីយុទ្ធសាស្ត្ររបស់ក្រុមហ៊ុន Alibaba ដើម្បីអភិវឌ្ឍន៍សេដ្ឋកិច្ចឌីជីថល ក្នុងប្រទេសនេះ។

គួររម្លឹកដែរថា កាលពីខែមិថុនាកន្លងទៅ ក្រុមហ៊ុន Alibaba បានបើកការិយាល័យថ្មីមួយ នៅក្នុងប្រទេសម៉ាឡេស៊ី ដែលជាការិយាល័យដំបូងគេបង្អស់ នៅក្នុងតំបន់អាស៊ាន។

សូមជម្រាបបន្តិចថា មុនធ្វើដំណើរទៅកាន់ទីក្រុងប៉េកាំង លោកមហាធៀ ដែលកំពុងបំពេញទស្សនកិច្ចនៅក្នុងប្រទេសចិន បានអញ្ជើញទៅកាន់ក្រុមហ៊ុនបច្ចេកវិទ្យាយក្ស Alibaba និងក្រុមហ៊ុនផលិតយានយន្តឈានមុខមួយរបស់ចិន គឺ Geely កាលពីថ្ងៃសៅរ៍កន្លងទៅ៕

ប្រភព៖ CGTN ប្រែសម្រួល៖ អឹុម ម៉េងស៊ាង