សកម្មជនដីធ្លីបឹងកក់ចំនួន៤នាក់ ត្រូវបានលើកលែងទោស នៅថ្ងៃនេះ

2018-08-20 14:06:08
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា នៅថ្ងៃទី២០ ខែសីហា ឆ្នាំ២០១៨ នេះបានចេញព្រះរាជក្រឹត្យលើកលែងទោសសកម្មជនដីធ្លីបឹងកក់ចំនួន៤នាក់គឺ អ្នកស្រី ទេព វន្នី អ្នកស្រី ហេង មុំ អ្នកស្រី បូ ឆវី និងអ្នកស្រី ហេង ចន្ថា។

អ្នកទាំង៤ ត្រូវបានតុលាការផ្តន្ទាទោសដាក់ពន្ធនាគារពីបទ ប្រមាទអ្នករាជការសាធារណៈ និង បទប្រឆាំងអ្នករាជការសាធារណៈមានស្ថានទម្ងន់ទោស កាលពីចុងឆ្នាំ ២០១៧។

ភ្លាមៗក្រោយព្រះមហាក្សត្រចេញព្រះរាជក្រឹត្យ លោក គុជ គឹមឡុង ព្រះរាជអាជ្ញារងអយ្យការអមសាលាដំបូងរាជធានីភ្នំពេញ បានចេញដីកាបង្គាប់ឱ្យដោះលែងអ្នកស្រី ទេព វន្នី ដែលកំពុងជាប់ពន្ធនាគារព្រៃ ស ផងដែរ។

សកម្មជនដីធ្លីបឹងកក់បាននាំគ្នាទៅទទួលអ្នកស្រី ទេព វន្នី ពីពន្ធនាគារព្រៃស នៅយប់នេះ។

សូមរំលឹកថា កាលពី ឆ្នាំ២០១៧ តុលាការក្រុងភ្នំពេញ បានសម្រេចផ្ដន្ទាទោស អ្នកស្រី ទេព វន្នី ឲ្យជាប់ពន្ធនាគារចំនួន ២ឆ្នាំកន្លះ និងពិន័យប្រាក់បង់ចូលរដ្ឋចំនួន ៥លានរៀល ព្រមទាំងសងជំងឺចិត្តសន្តិសុខពីរនាក់ជាដើមបណ្ដឹង ចំនួន ៩លានរៀល ពីបទហិង្សាដោយចេតនាមានស្ថានទម្ងន់ទោស លើសន្តិសុខសណ្ដាប់ធ្នាប់សាលាខណ្ឌដូនពេញ ដែលអាជ្ញាធរចោទថា បានប្រព្រឹត្តនៅក្បែរផ្ទះលោកនាយករដ្ឋមន្ត្រី ហ៊ុន សែន កាលពីថ្ងៃទី១៣ ខែមីនា ឆ្នាំ២០១៣៕

អត្ថបទ៖ ឃុត សុខឿន