ជាង៦០ឆ្នាំហើយ ដែលចម្រៀងមួយបទនេះនៅលួងលោមភរិយារបស់លោកស៊ីន ស៊ីសាមុត រហូតមក

2018-08-23 09:43:24
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

នៅពេលលោកយាយ ខាវ ថងញ៉ុត ជាភរិយាមានផ្ទៃពោះជិតគ្រប់ខែកូនដំបូង លោក ស៊ីន ស៊ីសាមុត មានសេចក្តីបារម្ភជាខ្លាំង ព្រោះភរិយាត្រូវទៅសម្រាលកូនឆ្ងាយពីប្តី ។ ដើម្បីលួងចិត្តប្រពន្ធ លោកសន្យាថានឹងតែងបទ ចម្រៀង១បទឱ្យនាងស្តាប់។ ដូច្នេះហើយ នៅឆ្នាំ១៩៥៦ បទចម្រៀង "ឧត្តមដួងចិត្ត"របស់លោក ស៊ីន ស៊ីសាមុត បានបន្លឺសំឡេងតាមរលកអាកាសរបស់វិទ្យុជាតិកម្ពុជា ជូនភរិយារបស់គាត់មែន។ នេះបើតាមឯកសារបស់សមាគមស៊ីន ស៊ីសាមុត។

លោកយាយ ខាវ ថងញ៉ុត នៅលើផ្ទះឈើរបស់ខ្លួន នាទីរួមខេត្តស្ទឹងត្រែង កាលពីឆ្នាំ ២០១៦

នៅក្នុងកិច្ចសន្ទនាមួយ ជាមួយក្រុមការងារផ្លូវទៅស្រុក របស់សប្បាយ លោកយាយ ខាវ ថងញ៉ុត បានបញ្ជាក់ថា នៅពេលនោះលោកយាយសម្រាលកូនស្រីច្បងនៅខេត្តស្ទឹងត្រែង។ ឯប្តីរបស់លោកយាយនៅឯរាជធានីភ្នំពេញ។ លោកយាយមានប្រសាសន៍ថា ៖«ខ្ញុំមកឆ្លងទន្លេនៅស្ទឹងត្រែង ព្រោះអីចាស់ៗពីដើម ពេលឆ្លងទន្លេត្រូវអាំងភ្លើងតាមរបៀបបុរាណ។ គាត់ (ស៊ីន ស៊ីសាមុត) និយាយថា កុំឲ្យខ្ញុំក្តៅពេលអាំងភ្លើង គាត់តែងបទហ្នឹងឲ្យ។ គាត់ប្រាប់ខ្ញុំផ្ទាល់មាត់»។

បន្ទាប់មក "បទចម្រៀង ឧត្តមដួងចិត្ត" ត្រូវបានថតដាក់ថាសនៅឆ្នាំ ១៩៦៩ ដោយមានលោក មែ ប៊ុន ជាអ្នកសម្រួលតន្ត្រី។

លោកយាយ ខាវ ថងញ៉ុត និងអធិរាជសំឡេងមាស ស៊ីន ស៊ីសាមុត បានរួមរស់នឹងគ្នា ហើយបានផ្តល់កំណើតដល់កូន៤នាក់ក្នុងនោះ ស្រី១ និងប្រុស៣។ ប៉ុន្តែរហូតដល់ពេលនេះ តំណក់ឈាមទាំង៤របស់លោកយាយ និងប្តី នៅសល់តែកូនស្រីម្នាក់គត់ ខណៈកូនប្រុស៣បានស្លាប់អស់ហើយ។

លោកយាយ ខាវ ថងញ៉ុត និងកូនស្រី នៅលើផ្ទះឈើរបស់ខ្លួន នាទីរួមខេត្តស្ទឹងត្រែង កាលពីឆ្នាំ ២០១៦

លោក ស៊ីន ស៊ីសាមុត កើតនៅថ្ងៃទី២៣ ខែសីហា ឆ្នាំ១៩៣២ នៅទីរួមខេត្តស្ទឹងត្រែង។ លោក ទទួលមរណភាពក្នុងរបបកម្ពុជាប្រជាធិបតេយ្យ នៅថ្ងៃទី ១៨ ខែឧសភា ឆ្នាំ ១៩៧៦ នៅលើកោះថ្មី ក្នុងស្រុកកោះធំ ខេត្តកណ្តាល។

ជាង ៥០ឆ្នាំហើយ ដែលបទឧត្តមដួងចិត្ត របស់លោក ស៊ីន ស៊ីសាមុត បាននិងកំពុងបម្រើ អារម្មណ៍អ្នកស្តាប់ និងជាពិសេស គឺលោកស្រី ខាវ ថងញ៉ុត ដែលជាភរិយាទី១របស់លោក ។ រលកសម្លេងគ្មានគូប្រៀបនេះ នៅតែទទួលបានការកោតសសើរ និង ពេញចិត្តពីអ្នកស្តាប់ជារៀងរហូតមក៕

អត្ថបទ៖ ឃុត សុខឿន