ឈ្មួញវៀតណាម ទិញស្វាយខ្មែរ តាំងពីស្វាយចេញក្តឹបភ្លាម

2018-08-29 07:14:01
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អ្នកសមាគមស្វាយកែវរមៀតនៅស្រុកឱរ៉ាល់ ខេត្តកំពង់ស្ពឺ ដែលជាជង្រុកដំណាំស្វាយកែវរមៀតដ៏ធំមួយប្រចាំខេត្តនេះ បានឱ្យដឹងកាលពីថ្ងៃទី២៨សីហាថា ផ្លែស្វាយខុសរដូវ ដែលគេបង្កើនរដូវឲ្យផ្លែនាកណ្តាលឆ្នាំនេះ កំពុងរោយផ្កា បង្កើនក្តឹបស្វាយយ៉ាងច្រើនធំប៉ុនមេដៃ មេជើង។ ការណ៍នេះ បានធ្វើឱ្យឈ្មួញវៀតណាមភាគច្រើន បានចូលទៅតថ្លៃ កក់លុយ ហើយខ្ចប់ក្រដាស តាមផ្លែស្វាយប្រភេទលេខ១ និងលេខ២ ក្នុងតម្លៃ ១៨០០រៀលក្នុង១គីឡូក្រាម។

លោក ទុយ វរៈ តំណាងសមាគមស្វាយកែវរមៀតប្រចាំស្រុកឱរ៉ាល់បានបញ្ជាក់ថា ស្វាយដែលគេខ្ចប់ក្រដាសជាប់នឹងដើមនេះ ជាស្វាយល្អសម្រាប់នាំចេញទៅក្រៅប្រទេស គឺប្រទេសចិន ជាទីផ្សារធំ តែនាំចេញតាមឈ្មួញវៀតណាមដូចរាល់ឆ្នាំមុនៗ ពោលគឺមិនអាចនាំចេញទៅចិនដោយត្រង់នោះទេ។

ចំណែកស្វាយប្រភេទលេខ៣ ដែលគេមិនខ្ចប់នៅតាមដើម គឺមានតម្លៃពី៧០០ ទៅ៨០០រៀលក្នុង១គីឡូក្រាម។ ស្វាយនេះគេនិយមថាជាស្វាយចូលរោងចក្រ ឬជាស្វាយដែលថៃទិញយកទៅធ្វើជាតំណាប់សម្រាប់លក់ទីផ្សារ។

សកម្មភាពខ្ចប់ស្វាយសម្រាប់នាំចេញ នាពេលកន្លងមក (រូបថត៖ រស្មីកម្ពុជា)

លោកវរៈ បន្ដថា៖ «**ឥឡូវនៅស្រុកខ្មែរយើងក៏មានរោងចក្រកែច្នៃផ្លែស្វាយធ្វើជាតំណាប់ដែរ។ ទោះបីដំណាំស្វាយកែវរមៀតនៅមានទីផ្សារចង្អៀត មានទីផ្សារមិនច្បាស់លាស់ ផ្សងព្រេងតម្លៃពឹងលើមាត់ឈ្មួញកណ្តាលយ៉ាងណាក៏ដោយ ក៏ដំណាំនេះនៅតែបង្កើនការដាំដុះអត់រាថយឡើយ**»។

សូមបញ្ជាក់ថា សមាគមនេះមានការដាំដុះជាង ១០ម៉ឺនដើម ហើយជាង៨ពាន់ដើមកំពុងទទួលផលគឺកើន២០% បើធៀបទៅនឹងឆ្នាំ២០១៧៕

ប្រភព៖ រស្មីកម្ពុជា ប្រែសម្រួល៖ សំភី