កំណែសន្លឹកកិច្ចការបេក្ខជនប្រឡងបាក់ឌុប ត្រូវបានបញ្ចប់ទាំងស្រុង

2018-08-29 07:12:10
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រសួងអប់រំ យុវជន និងកីឡា បានប្រកាសថា ដំណើការកំណែសន្លឹកកិច្ចការបេក្ខជនប្រឡងសញ្ញាបត្រមធ្យមសិក្សាទុតិយភូមិសម័យប្រឡង ២០ សីហា ២០១៨ ត្រូវបានបញ្ចប់ទាំងស្រុងហើយ នៅព្រឹកថ្ងៃទី២៩ សីហា ២០១៨ ក្រោមការបំពេញភារកិច្ចរបស់ប្រធាន អនុប្រធានមណ្ឌលកំណែ គណៈកម្មការទាំងអស់ ព្រមទាំងការចូលរួមសង្កេតការណ៍ជាប្រចាំពីមន្ត្រីអង្គភាពប្រឆាំងអំពើពុករលួយផងដែរ។

សន្លឹកកិច្ចការរបស់បេក្ខជនបាក់ឌុប ដែលត្រូវបានដឹកមករក្សាទុកនៅវិទ្យាល័យព្រះស៊ីសុវត្ថិ (រូបថត៖ ក្រសួងអប់រំ)

ក្រសួងបានបន្តថា បន្ទាប់ពីបញ្ចប់ដំណើរការកំណែ ប្រធាន អនុប្រធានមណ្ឌលទាំងអស់ បានដឹកសន្លឹក MCS និងឯកសារផ្សេងៗមករក្សាទុកនៅនាយកដ្ឋានកិច្ចការប្រឡង ដើម្បីចាប់ផ្ដើមរៀបចំដំណើរការស្រង់ បូកពិន្ទុដោយកុំព្យូទ័រ។ ដោយឡែក សន្លឹកកិច្ចការរបស់បេក្ខជន ត្រូវបានដឹកមករក្សាទុកនៅវិទ្យាល័យព្រះស៊ីសុវត្ថិ។

សកម្មភាពបញ្ចូលពិន្ទុសាកល្បងនៃអនុគណៈកម្មការបញ្ចូលពិន្ទុ មុនដំណើរការស្រង់ បូកពិន្ទុដោយកុំព្យូទ័រលើសន្លឹកកិច្ចការប្រឡង (រូបថត៖ ក្រសួងអប់រំ)

សូមបញ្ជាក់ថា ក្រសួងអប់រំ នឹងប្រកាសលទ្ធផលប្រឡងសញ្ញាបត្រមធ្យមសិក្សាទុតិយភូមិ សម័យប្រឡង៖ ២០ សីហា ២០១៨ នៅរសៀលថ្ងៃទី១១ កញ្ញា ឆ្នាំ២០១៨ ចំពោះមណ្ឌលប្រឡងនៅ រាជធានីភ្នំពេញ និងខេត្តកណ្ដាល។ ចំណែកឯបណ្ដាខេត្តផ្សេងៗទៀត នឹងត្រូវប្រកាសនៅព្រឹកថ្ងៃទី១២ កញ្ញា ឆ្នាំ២០១៨។

ការប្រឡងនេះ មានបេក្ខជន បានចុះឈ្មោះប្រឡងសរុបចំនួន ១១៥ ២៦៨ នាក់ (ស្រី ៥៨ ១៥៨នាក់) និងមានមណ្ឌលប្រឡងចំនួន ១៨៦ មណ្ឌល។ ក្នុងនោះបេក្ខជនអវត្តមាន មានចំនួន ១៨៩៩នាក់ (ស្រី ៧៤៤នាក់) ស្មើនឹង ១,៦៥%៕

អត្ថបទ៖ សំភី