Modric យកឈ្នះ CR7 និង Salah ក្លាយជាកីឡាករល្អបំផុតនៅអឺរ៉ុប

2018-08-31 02:20:40
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

Luka Modric បានជាប់ជាកីឡាករល្អបំផុតប្រចាំទ្វីបអឺរ៉ុប ឬ UEFA Men's Player of the Year ក្រោយទទួលសំឡេងឆ្នោតគាំទ្រលើសបេក្ខភាពចុងក្រោយ ២រូបទៀត គឺ អតីតមិត្តរួមក្រុម Cristiano Ronaldo និងខ្សែប្រយុទ្ធ Mohamed Salah របស់ Liverpool។

Modric ទទួលពាន UEFA Men's Player of the Year ពីប្រធាន UEFA លោក Aleksander Ceferin (រូបភាព៖ Reuters)

ខ្សែបម្រើជម្រើសជាតិក្រូអាតរូបនេះ បានជួយឲ្យ Real Madrid ឈ្នះពាន UEFA Champions League ៣រដូវកាលជាប់ៗគ្នា ហើយថែមទាំងជួយក្រុមជម្រើសជាតិក្រូអាត ឡើងដល់វគ្គផ្ដាច់ព្រ័ត្រ FIFA World Cup ឆ្នាំ២០១៨ ជាប្រវត្តិសាស្រ្ដថែមទៀតផង។

សូមបញ្ជាក់ថា Modric បានពិន្ទុពីការបោះឆ្នោត ចំនួន ៣១៣ពិន្ទុ ខណៈ Ronaldo ឈរនៅលេខ២ ទទួលបាន ២២៣ពិន្ទុ និង Salah ទទួលបាន ១៣៤ពិន្ទុ។ អ្នកដែលចូលរួមបោះឆ្នោត រួមមានគ្រូបង្វឹក ៨០រូប ដែលដឹកនាំក្រុមនៅ Champions League និង Europa League វគ្គចែកពូលកាលពីរដូវកាលមុន និងអ្នកកាសែតតំណាងឲ្យប្រទេសសមាជិក FIFA នីមួយៗ ចំនួន ៥៥រូប។

គួររំលឹកផងដែរថា ក្រៅពី Modric គឺមានតែកីឡាករ ៤រូបទៀតប៉ុណ្ណោះ ដែលធ្លាប់ឈ្នះពាន UEFA Men's Player of the Year (ពីមុនឈ្មោះ UEFA Best Player in Europe Award។ កីឡាករទាំង ៤រូបនោះ គឺ Cristiano Ronaldo (ឈ្នះ ៣ដង ឆ្នាំ២០១៧, ២០១៦, ២០១៤), Lionel Messi (ឈ្នះ២ដង ឆ្នាំ២០១៥, ២០១១) Franck Ribéry (ឈ្នះម្ដង ឆ្នាំ២០១៣) និង Andres Iniesta (ឈ្នះម្ដង ឆ្នាំ២០១២)៕

អត្ថបទ៖ សុខ សុវត្ថិ