អាជ្ញាធររាជធានី ដាក់ឱសានវាទសម្រាប់អាជីវកម្មដែលដាក់ស្លាកយីហោជាភាសាបរទេស

2018-08-31 07:03:48
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

រដ្ឋបាលរាជធានីភ្នំពេញ បានទុកឱសានវាទ សម្រាប់ម្ចាស់អាជីវកម្ម ដែលបានដាក់តាំងស្លាកយីហោ ជាភាសាបរទេស ដូចជាអង់គ្លេស ចិន និងកូរ៉េជាដើម ដោយពុំបានដាក់អក្សរខ្មែរ ឬអក្សរខ្មែរនៅពីខាងលើ ត្រូវរុះរើចេញក្នុងរយៈពេល ២សប្តាហ៍។

លោក ហួត ហៃ អភិបាលរងរាជធានីភ្នំពេញ បានបញ្ជាក់ថា បន្ទាប់ពីដាក់ឱសានវាទនេះ រដ្ឋបាលរាជធានី នឹងចាត់ក្រុមការងារចុះពិនិត្យមើល និងចាត់វិធានការតាមផ្លូវច្បាប់ ប្រសិនបើរកឃើញម្ចាស់អាជីវកម្មណា ដែលមិនគោរព និងអនុវត្តតាមទេនោះ។ ការថ្លែងនេះ ធ្វើឡើងក្នុងកិច្ចប្រជុំស្តីពីការណែនាំ និងការលុបបំបាត់ ការប្រើប្រាស់ ការជួញដូរ និងការចែកចាយគ្រឿងញៀន តាមក្លឹបកម្សាន្ត និងអាជីវកម្មដ្ឋានក្នុងវិស័យទេសចរណ៍ នាព្រឹកថ្ងៃទី៣១ ខែសីហា ឆ្នាំ២០១៨។

ក្រៅពីនោះ លោក ហួត ហៃ ក៏បានជំរុញឲ្យមានការស្នើសុំអាជ្ញាបណ្ណសម្រាប់បង្កើតអាជីវកម្ម និងបន្តសុពលភាពសម្រាប់អ្នកដែលបានស្នើសុំរួចហើយ រួសរាន់ដោយទៅដាក់ពាក្យស្នើសុំនៅតាមច្រកចេញចូលតែមួយនៃរដ្ឋបាលរាជធានីភ្នំពេញ និងត្រូវបង់កម្រៃទៅតាមច្បាប់កំណត់។

សូមរំលឹកថា កន្លងមកនេះ ក្រសួងទេសចរណ៍ ក៏ដូចជារដ្ឋបាលរាជធានីភ្នំពេញ ធ្លាប់បានចេញសារាចរណែនាំ អំពីការដាក់តាំងស្លាកយីហោអាជីវកម្មដ្ឋាននេះផងដែរ ប៉ុន្តែនៅមានម្ចាស់អាជីវកម្មដ្ឋានមួយចំនួន មិនព្រមគោរពអនុវត្តតាម៕

ប្រភព៖ ដើមអម្ពិល ប្រែសម្រួល៖ សំភី