តុលាការ កោះហៅលោក គឹម សុខ ឱ្យចូលបំភ្លឺជុំវិញរឿង "បរិហាកេរ្តិ៍ជាសាធារណៈ"

2018-09-03 06:22:54
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក លាង សំណាត់ ចៅក្រមស៊ើបសួរនៃសាលាដំបូងរាជធានីភ្នំពេញ បានចេញដីកាកោះហៅលោក គឹម សុខ ឱ្យចូលឆ្លើយបំភ្លឺ ពីដំណើររឿង "បរិហាកេរ្ត៍ជាសាធារណៈ ញុះញង់ឱ្យប្រព្រឹត្តបទឧក្រិដ្ឋជាអាទ៍" ប្រព្រឹត្តនៅរាជធានីភ្នំពេញ កាលពីថ្ងៃទី២៣កុម្ភៈ ២០១៧។ ដីកានេះ ត្រូវបានចុះហត្ថលេខាកាលពីថ្ងៃទី២៨ សីហា ២០១៨ និងទើបតែដល់ដៃអ្នកកាសែតនៅថ្ងៃទី៣ កញ្ញានេះ។

សាលាដំបូងរាជធានីភ្នំពេញ បានបង្គាប់ឱ្យលោក គឹម សុខ ចូលឆ្លើយបំភ្លឺអំពីករណីខាងលើនេះ នៅព្រឹកថ្ងៃទី១៤ ខែកញ្ញា ឆ្នាំ២០១៨។ លោកចៅក្រមស៊ើបសួរ នឹងចេញដីកាបង្គាប់ឱ្យនាំខ្លួន ប្រសិនបើលោក គឹម សុខ មិនចូលខ្លួនតាមការកំណត់នេះទេ។

យ៉ាងណាមិញ លោក គឹម សុខ អ្នកវិភាគនយោបាយ និងសង្គម បានរត់គេចខ្លួនទៅក្រៅប្រទេសបាត់ហើយ កាលពីថ្ងៃទី៣០ ខែសីហា ឆ្នាំ២០១៨។

លោក គឹម សុខ (ពាកកម្រងផ្កា) ក្រោយពេលចេញពីពន្ធនាគារ កាលពីថ្ងៃទី១៧ សីហា ២០១៨

សូមរំលឹកថា កាលពីថ្ងៃទី១៧ ខែសីហា លោក គឹម សុខ បានរួចទោស និងត្រូវបានដោះលែងចេញពីពន្ធនាគារ បន្ទាប់ពីលោកអនុវត្តទោសរយៈពេល ១ឆ្នាំកន្លះ ដោយសារសម្តេច ហ៊ុន សែន ប្តឹងរូបលោកថា បានចោទគណបក្សប្រជាជនកម្ពុជាជាអ្នកនៅពីក្រោយឃាតកម្មបាញ់សម្លាប់លោកបណ្ឌិត កែម ឡី។

ប៉ុន្តែលោក គឹម សុខ នៅជាប់ក្នុងសំណុំរឿងមួយទៀតពីការចោទថា រដ្ឋាភិបាលសម្តេច ហ៊ុន សែន បង្កើតប្រព័ន្ធសម្លាប់មនុស្ស តែរកឃាតកមិនឃើញ។ សម្តេចនាយករដ្ឋមន្រ្តី ហ៊ុន សែន កាលពីថ្ងៃទី២៩ខែសីហា អះអាងថា លោក គឹម សុខ នៅមិនទាន់បង់ប្រាក់សំណងចំនួន៨០០លានរៀល ឬស្មើនឹងប្រមាណ២០ម៉ឺនដុល្លារ ឲ្យគណបក្សប្រជាជនកម្ពុជានៅឡើយទេ ក្រោយពេលចេញពីពន្ធនាគារក្នុងសំណុំរឿងទីមួយនោះ៕

អត្ថបទទាក់ទង៖ លោក គឹម សុខ រត់គេចចេញទៅក្រៅប្រទេស ក្រោយត្រូវបានដោះលែងចេញពីពន្ធនាគារ

អត្ថបទ៖ សំភី