ការកំណត់ប្រាក់ឈ្នួលអប្បបរមាឆ្នាំ២០១៩ អាចនឹងចេញលទ្ធផល នៅក្នុងអំឡុងបុណ្យភ្ជុំបិណ្ឌ

2018-09-03 09:23:30
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក អ៊ិត សំហេង រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ បានឱ្យដឹងថា ការកំណត់ប្រាក់ឈ្នួលអប្បបរមាសម្រាប់ឆ្នាំ២០១៩ អាចនឹងចេញលទ្ធផលនៅពិធីបុណ្យភ្ជុំបិណ្ឌ ឬដើមខែតុលា ឆ្នាំ២០១៨ខាងមុខនេះ។ ការថ្លែងនេះ ក្រោយបញ្ចប់កិច្ចប្រជុំគណៈកម្មការប្រឹក្សាការងារ អំពីប្រាក់ឈ្នួលអប្បបរមា ផ្នែកវាយនភណ្ឌ កាត់ដេរ និងផលិតស្បែកជើង សម្រាប់ឆ្នាំ២០១៨ នាព្រឹកថ្ងៃទី៣កញ្ញា នៅទីស្តីការក្រសួងការងារ។

លោក អ៊ិត សំហេង បាននិយាយថា គ្រប់ភាគីទាំងអស់នឹងពិភាក្សាគ្នាម្តងហើយម្តងទៀតរហូតទាល់តែមានការឯកភាពរួមគ្នាឡើង។ លោករំពឹងថា កិច្ចពិភាក្សាប្រាក់ឈ្នួលអប្បបរមានេះ នឹងមានភាពរលូនល្អ ពិសេសប្រាក់ឈ្នួលកម្មករ អាចនឹងបន្តឡើង និងល្អប្រសើរជាងឆ្នាំ២០១៨។

លោក អ៊ិត សំហេង ក្នុងកិច្ចប្រជុំគណៈកម្មការប្រឹក្សាការងារ នាព្រឹកថ្ងៃទី៣កញ្ញា ២០១៨។ រូបថត៖ FB ក្រសួងការងារ

បើតាមលោក ហេង សួរ អ្នកនាំពាក្យក្រសួងការងារនិងបណ្តុះបណ្តាលវិជ្ជាជីវៈ បានឱ្យដឹងថា ការកែសម្រួលប្រាក់ឈ្នួលអប្បបរមាសម្រាប់កម្មករនិយោជិតនៅឆ្នាំ២០១៩ធ្វើឡើងដោយផ្អែកលើអត្រាបម្រែបម្រួលនៃលក្ខខណ្ឌចំនួន៧ចំណុច។ ក្នុងនោះរួមមាន ស្ថានភាពគ្រួសារ អត្រាអតិផរណា ការចំណាយក្នុងការរស់នៅ ផលិតភាពភាពប្រកួតប្រជែង ស្ថានភាពទីផ្សារការងារ កម្រិតចំណេញរបស់វិស័យជាដើម។

មន្រ្តីរូបនេះ បានឱ្យដឹងបន្ថែមថា បើតាមច្បាប់ស្តីពីប្រាក់ឈ្នួលអប្បបរមា សម្រាប់ធាតុផ្សំយកមកពិចារណាក្នុងការកំណត់ប្រាក់ឈ្នួល គឺចាំបាច់ត្រូវផ្តោតសំខាន់ទៅលើលក្ខខណ្ឌសេដ្ឋកិច្ចតម្លៃជីវភាពរស់នៅនិងស្ថានភាពជាក់ស្តែងរបស់ប្រទេស។

សូមរំលឹកថា គិតចាប់ពីឆ្នាំ១៩៩៧ ដល់ឆ្នាំ ២០១៨ រាជរដ្ឋាភិបាលបានដំឡើងប្រាក់ឈ្នួលអប្បបរមា និងអត្ថប្រយោជន៍ផ្សេងៗ ដល់កម្មករនិយោជិតផ្នែកវាយនភណ្ឌ កាត់ដេរ និងផលិតស្បែកជើង បានចំនួន១៤លើកដោយកើនពី ៣០ដុល្លារអាមេរិកក្នុងឆ្នាំ១៩៩៧ ដល់១៧០ដុល្លារអាមេរិកក្នុងឆ្នាំ២០១៨៕