មុខរបរបណ្តុះកូនស្វាយចន្ទីលក់ ជួយលើកកម្ពស់សេដ្ឋកិច្ចគ្រួសារកសិករ

2018-09-04 07:24:34
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

គ្រួសារកសិករចំនួនពី ៦០ ទៅ ៧០ ភាគរយរស់នៅភូមិដីក្រហម ឃុំសូភាស ស្រុកស្ទឹងត្រង់ខេត្តកំពង់ចាម បាននាំគ្នាជ្រើសរើសយកមុខរបរបណ្ដុះកូនស្វាយចន្ទីលក់។ ការបណ្ដុះកូនដើមឈើនេះបានចែកចាយដល់អតិថិជនគ្រប់ទិសទីដែលនិយមដាំដំណាំឧស្សាហកម្មមួយនេះ។

កសិករ កំពុងធ្វើការងារបណ្ដុះកូនស្វាយចន្ទី

លោក ប៉ោ ស៊ុតធី មេភូមិដីក្រហមបានឲ្យដឹងនៅថ្ងៃទី៤ ខែកញ្ញា ឆ្នាំ២០១៨នេះថា រយ:ពេលប្រហែលជិត១០ឆ្នាំហើយដែលប្រជាពលរដ្ឋ ជាកសិកររស់នៅក្នុងភូមិដីក្រហម នៅតាមបណ្ដោយផ្លូវប្រវែង ៣ គីឡូម៉ែត្រ។ ពួកគាត់បាននាំគ្នាប្រកបរបរបណ្ដុះកូនស្វាយចន្ទីលក់ក្នុងមួយគ្រួសារចាប់ពី ១ ម៉ឺន ដល់ជាង ១០ម៉ឺនដើម ក្នុងមួយឆ្នាំ។ ក្នុងនោះ មានគ្រួសារចន្លោះពី ៦០ទៅ៧០គ្រួសារនៃចំនួនគ្រួសារក្នុងភូមិទាំងអស់ចំនួន ៤៣០គ្រួសារ។

លោកមេភូមិបានឲ្យដឹងទៀតថា សល់ប្រមាណជាង ៣០ ភាគរយផ្សេងទៀតនៃគ្រួសារប្រជាពលរដ្ឋនោះ គឺពួកគាត់បានធ្វើជាអ្នកជួយបណ្តុះកូនស្វាយចន្ទីតាមកន្លែងគ្រួសារដែលបើកកន្លែងផលិតបណ្តុះកូនស្វាយចន្ទីលក់។ តាមរយ:មុខរបរមួយនេះ អាចធ្វើឲ្យគ្រួសារកសិករនីមួយៗ ទទួលបានចំណូលចាប់ពី ១ម៉ឺន ទៅ ២ម៉ឺនដុល្លារ ក្នុងមួយឆ្នាំ។

លោកស៊ុនធីបានបន្តថា ប៉ុន្តែនៅ ២ឆ្នាំចុងក្រោយនេះ របរបណ្ដុះកូនស្វាយចន្ទី ហាក់បានធាក់ថយតម្លៃ គឺកូនស្វាយចន្ទីមួយដើម ធ្លាប់លក់បាន ២០០០រៀល ធ្លាក់ថ្លៃមកនៅត្រឹម ១០០០ ទៅ ១៥០០រៀល។ នេះគឺ ដោយសារតែមានអ្នកចេះមុខរបរបណ្តុះកូនស្វាយចន្ទីច្រើន ជាពិសេសបានថយចុះអតិថិជនជាអ្នកនិយមដាំដំណាំស្វាយចន្ទីច្រើនជាងគេ មានខេត្តមណ្ឌលគិរី ខេត្តស្ទឹងត្រែង ជាដើមនោះ។

កូនស្វាយចន្ទី

អ្នកស្រី ម៉ាន់ ធីណា ជាអ្នកបណ្តុះកូនស្វាយចន្ទីលក់ម្នាក់ក្នុងភូមិដីក្រហមបាននិយាយថា នេះជារដូវដែលកសិករលក់កូនស្វាយចន្ទី នាំគ្នាបណ្តុះនិងបំបៅកូនស្វាយចន្ទីដើម្បីត្រៀមបម្រុងទុកលក់ឲ្យអតិថិជន ជាអ្នកដាំដំណាំស្វាយចន្ទីនៅចន្លោះខែឧសភាទៅខែកក្កដា។ ជាក់ស្តែងសម្រាប់គ្រួសារអ្នកស្រីបានបណ្តុះពូជស្វាយចន្ទីចំនួន ២ប្រភេទ គឺពូជអឹម២៣ និងពូជ០៩ សរុបជាងមួយម៉ឺនដើម។

អ្នកស្រីធីណាបានបន្តថា រដូវកាលលក់កូនស្វាយចន្ទីឆ្នាំ២០១៨កន្លងទៅនេះគឺគ្រួសារអ្នកស្រីលក់អស់កូនស្វាយចន្ទីចំនួន ៥ម៉ឺន ដើម។ ក្នុងមួយដើមលក់បានតម្លៃពី ១៤០០ ទៅ ១៦០០ រៀល។ ក្នុងនោះមានអតិថិជន ជាអ្នកទិញ និងបញ្ជាទិញក្នុងខេត្តកំពង់ចាម និងខេត្តក្រៅមាន ខេត្តមណ្ឌល,ខេត្តរតនគិរី, ខេត្តស្ទឹងត្រែង និងខេត្តកោះកុងជាដើម។ ដោយម្នាក់ៗ ទិញដឹកតាមរថយន្តពី ២០០០ ទៅ៤០០០ ដើម ហើយពូជស្វាយចន្ទីដែលអតិថិជននិយមចូលចិត្តដាំច្រើន គឺអឹម២៣ ដោយសារពូជនេះ ផ្តល់ផ្កា ផ្លែច្រើនដង យូរជាងពូជ ០៩ ៕

រូបថត៖ រស្មីកម្ពុជា

ប្រភព៖ រស្មីកម្ពុជា ប្រែសម្រួល៖ លាភ.