មេ SpaceX៖ ជនជាតិអង់គ្លេសដែលសង្គ្រោះក្មេងៗថៃ ជា "អ្នកចាប់រំលោភក្មេង"

2018-09-06 08:42:53
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

រឿងថ្នាំងថ្នាក់គ្នារវាងលោក Elon Musk ម្ចាស់ក្រុមហ៊ុនអវកាស SpaceX និងលោក Vernon Unsworth អ្នកសង្គ្រោះសញ្ជាតិអង់គ្លេស ដែលទើបជួយក្រុមកីឡាករវ័យក្មេងថៃ១៣នាក់ពីល្អាងថាមហ្លួង បានកើតឡើងជាថ្មីម្ដងទៀតហើយ។

កាលពីខែកក្កដា ឆ្នាំ២០១៨កន្លងទៅ លោកElon បានហៅលោក Unsworth ថាជាមនុស្ស "ដែលបំពានផ្លូវភេទកុមារ (Pedo)" ក្រោយពីអ្នកសង្គ្រោះរូបនេះបានបដិសេធមិនប្រើប្រាស់នាវាមុជទឹកខ្នាតតូចនៅក្នុងប្រតិបត្តិការជួយក្មេងៗថៃចេញពីល្អាងភ្នំថាមហ្លួង។ យ៉ាងណាមិញ រឿងនេះត្រូវបានស្ងប់ស្ងាត់ទៅវិញ បន្ទាប់ពីម្ចាស់ SpaceX ចេញមុខសុំទោសលោក Unsworth ជាសាធារណៈ។

ដោយមិនដឹងមូលហេតុអ្វីឲ្យប្រាកដ ស្រាប់តែភ្លើងសង្គ្រាមពាក្យសម្ដីរវាងអ្នកទាំង២ក៏ចាប់ផ្ដើមឆេះចេញផ្កាភ្លើងជាថ្មីម្ដងទៀត។ លើកនេះ លោក Elon បានសរសេរតាមរយៈអ៊ីម៉ែលផ្ញើឲ្យសារព័ត៌មាន BuzzFeed ដោយហៅលោក Unsworth ថាជា "អ្នកចាប់រំលោភក្មេង"។

BuzzFeed កាលពីថ្ងៃទី៤ ខែកញ្ញា ឆ្នាំ២០១៨ បានចុះផ្សាយថា លោក Elon បានប្រើពាក្យមិនល្អ (fcking asshol) ជេរបុគ្គលិកសារព័ត៌មានម្នាក់ដែលសរសេរពីរឿងជម្លោះនេះ។ បន្ថែមពីនេះ BuzzFeed បានបញ្ជាក់បន្តថា នៅក្នុងអ៊ីម៉ែល លោក Elon បានចោទប្រកាន់លោក Unsworth ដោយគ្មានភស្តុតាង និងមូលដ្ឋានច្បាស់លាស់ជាសម្អាង ដោយថា អ្នកសង្គ្រោះអង់គ្លេសរូបនេះធ្លាប់បានទៅរស់នៅទីក្រុងឈៀងរ៉ៃ ប្រទេសថៃអស់រយៈពេល ៣០ ទៅ ៤០ឆ្នាំមកហើយ។ ចំពោះការទៅរស់នៅនេះ គឺដើម្បីរៀបការជាមួយនឹងអនីតិជន ដែលមានអាយុប្រហែលជា ១២ឆ្នាំ។ លោក Elon ថែមទាំងថា ឈៀងរ៉ៃ គឺជាទីក្រុងដែលល្បីខាងជួញដូរផ្លូវភេទកុមារទៀតផង។

ពាក់ព័ន្ធនឹងការចោទប្រកាន់នេះ លោក Unsworth ថា លោកកំពុងស្វះស្វែងរកមើលវិធានការច្បាប់តទល់នឹងលោក Elon។ មេធាវីលោក Unsworth បានប្រាប់សារព័ត៌មាន Guardian ថា រឿងដែលម្ចាស់ក្រុមហ៊ុន SpaceX ចោទលោក Unsworth មិនមែនជារឿងដែលចេះតែដោះសាយករួចខ្លួននោះទេ ហើយលោក Elon នឹងត្រូវទទួលរងបណ្ដឹងជាក់ជាមិនខាន។

ជាការឆ្លើយតប លោក Elon បាននិយាយថា៖ "ខ្ញុំសូមស្នើឲ្យអ្នកហៅមនុស្សដែលស្គាល់នៅក្នុងប្រទេសថៃ ដើម្បីដឹងរឿងច្បាស់ពីអ្វីដែលកើតឡើង ហើយឈប់ការពារមនុស្សដែលចាប់រំលោភកុមារបន្តទៅទៀត"៕

ប្រភព៖ theguardian ប្រែសម្រួល៖ ឈាង.