ចិន​ជា​ប្រទេស​ទី​១ ដែល​សម្តេច ​ហ៊ុន សែន ​ត្រូវទៅ​បំពេញ​ទស្ស​នកិច្ច​ក្រោយ​ឈ្នះ​ឆ្នោត

  • 2018-09-07 07:25:16
  • ចំនួនមតិ 0 | ចំនួនចែករំលែក 0

ចន្លោះមិនឃើញ


ចាប់​តាំងពី​ថ្ងៃ​បោះឆ្នោត ថ្ងៃទី​២៩​ខែកក្កដា​មក សម្តេច​ហ៊ុន សែន​បាន​រក្សា​វត្តមាន​នៅក្នុង​ប្រទេស​រហូត​។ តែ​ក្រោយ​​រដ្ឋាភិបាល​ថ្មី​បាន​បង្កើត និង​រៀបចំ​រួចរាល់ សម្តេច​ ហ៊ុន សែន​នឹង​ចាប់ផ្តើម​បំពេញ​ទស្សនកិច្ច​ទៅ​ក្រៅប្រទេស​ជាលើកដំូង ដោយ​ផ្តើម​ពី​ប្រទេស​ចិន​។

តប​តាម​ការអញ្ជើញ​របស់​រដ្ឋាភិបាល​ទីក្រុ​ង​ប៉េកាំង សម្តេច​នាយករដ្ឋមន្ត្រី​នឹង​ធ្វើដំណើរ​ទៅ​ប្រទេស​ចិន ដើម្បី​ចូលរួម​ពិធី​តាំង​ពិព័រណ៍​ចិន​-​អាស៊ាន​លើក​ទី​១៥ ចាប់ពី​ថ្ងៃទី​១០-១២ ខែ​កញ្ញា ឆ្នាំ​២០១៨ នៅ​ទីក្រុង​ណាន​នី​ង ខេត្ត​ក្វាង​ស៊ី​។ 

​ទស្សនកិច្ច​លើកដំបូង​នៅ​ក្រៅប្រទេស ក្នុងនាម​នាយ​រដ្ឋមន្ត្រី​អាណត្តិ​ទី៦នេះ សម្តេច​ហ៊ុន សែន​ នឹងត្រូវ​អមដំណើរ​ដោយ​ឧបនាយករដ្ឋមន្ត្រី​ហោ ណាំហុង​, លោក ប៉ាន សូរ​ស័ក្តិ រដ្ឋមន្ត្រី​ក្រសួងពាណិជ្ជកម្ម ​លោក ថោង ខុន រដ្ឋមន្ត្រី​ក្រសួងទេសចរណ៍ ​ឥស្សរជន​រាជរដ្ឋាភិបាល​ដទៃទៀត និង​ធុរជន​ពី​សភាពាណិជ្ជកម្ម​កម្ពុជា​ផងដែរ​។ នេះ​បើតាម​សេចក្ដីប្រកាស របស់​ក្រសួងការបរទេស និង​សហប្រតិបត្តិការ​អន្តរជាតិ ដែល​ចេញផ្សាយ​នា​ថ្ងៃទី​៧ ខែកញ្ញា​នេះ​។

​ នៅក្នុង​ឱកាសនៃការបំពេញទស្សនកិច្ចនេះ ​សម្តេច ​ហ៊ុន សែន ​នឹង​ថ្លែង​សុន្ទរកថា​គន្លឹះ ក្នុង​គោល​បំណង​លើកស្ទួយ​ពាណិជ្ជកម្ម និង​វិនិយោគ​រវាង​អាស៊ាន និង​ចិន​រួមទាំង​ទាក់ទាញ​វិនិយោគិន និង​ភ្ញៀវទេសចរ​ចិន​ដែល​មាន​សក្តានុពល​មក​កាន់​តំបន់​អាស៊ាន​។

ក្នុងនាម កម្ពុជា​ជា​ប្រទេស​កិត្តិយស​នៅក្នុង​ព្រឹត្តិការណ៍​ឆ្នាំនេះ សម្តេច​ហ៊ុន សែន​និង​លោក​ហាន់ ចឹង ​ឧប​នាយករដ្ឋមន្ត្រី​ចិន នឹង​អញ្ជើញ​ជា​អធិបតី​ក្នុង​ពិធី​កាត់​ខ្សែបូ ដើម្បី​សម្ពោធ​ព្រះ​ពន្លា​ជាតិ​កម្ពុជា​។ បន្ថែម​លើ​នេះ សម្តេច ​ហ៊ុន សែន ​នឹង​ជួប​ពិភាក្សា​ដាច់ដោយឡែក​ពីគ្នា ជាមួយ​ឥស្សរ​ជន​ចិន​ និង​ទទួល​ជួប​សម្តែង​ការគួរសម ពី​ថ្នាក់ដឹកនាំ​ខេត្ត​ក្វាង​ស៊ី និង​ថ្នាក់ដឹកនាំ​ផ្នែក​ធុរកិច្ច​សំខាន់ៗ និង​នាយក​ប្រតិបត្តិ​នៃ​ក្រុមហ៊ុន​នានា​របស់​ចិន​ផងដែរ​។​

​គួរ​ជម្រាបជូន​ដែរថា ពិព័រណ៍​ចិន​-​អាស៊ាន​លើក​ទី​១៥ ប្រារព្ធ​ឡើង​ក្រោម​មូល​បទ « រួមគ្នា​កសាង​វិថី​សូត្រ​សមុទ្រ​សតវត្ស​ទី​២១ និង​ន​វា​នុវត្ត​សហគមន៍​ចិន​-​អាស៊ាន »​។ នៅក្នុង​ព្រឹត្តិការណ៍​នេះ នឹងដាក់​បង្ហាញ​នូវ​ផលិតផល​ផ្សេងៗ​គ្នា​ជាច្រើន​ពី​អាស៊ាន​និង​ចិន ដើម្បី​ជំរុញ​កិច្ច​សហប្រតិបត្តិកា​ររ​បស់​វិស័យ​ឯកជន នៅក្នុង​ផ្នែក​ពាណិជ្ជកម្ម ធុរកិច្ច វិនិ​យោគ និង​ទេសចរណ៍​ឲ្យ​កាន់តែ​ប្រសើរឡើង​។ 

​ពិព័រណ៍​ចិន​-​អាស៊ាន ត្រូវបាន​ប្រារព្ធ​ឡើងជា​រៀងរាល់ឆ្នាំ ក្នុង​គោល​បំណង​ពង្រឹង និង​ពង្រីក​បន្ថែមទៀត នូវ​កាលានុវត្តភាព​ធុរកិច្ច និង​ពាណិជ្ជកម្ម​ឲ្យ​កាន់តែ​ស៊ីជម្រៅ ដើម្បី​សម្រេច​ឲ្យបាន នូវ​គោលដៅ​វិនិយោគទុន​នូវ​ទំហំ​ទឹកប្រាក់ ១​ទ្រី​លាន​ដុល្លារ​អាមេរិក ពី​ប្រទេស​ចិន​មកកាន់​តំបន់​អាស៊ាន និង​១៥០​ពាន់​លា​ដុល្លារ​អាមេរិក ពី​តំបន់​អាស៊ាន​ទៅកាន់​ប្រទេស​ចិន នៅត្រឹម​ឆ្នាំ​២០២០៕

ប្រភព៖ Vayo Fm ប្រែ​សម្រួល៖ ឃុត សុខឿន​

;