អាមេរិកគំរាមចាប់ខ្លួនចៅក្រមតុលាការព្រហ្មទណ្ឌអន្ដរជាតិ ដែលហ៊ានស៊ើបលើពលរដ្ឋអាមេរិក

2018-09-11 03:26:42
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សហរដ្ឋអាមេរិក កាលពីថ្ងៃទី១០ ខែកញ្ញា ២០១៨ ម្សិលមិញ បានគំរាមចាប់ខ្លួន និងដាក់ទណ្ឌកម្មលើចៅក្រម និងមន្រ្តីនានារបស់តុលាការព្រហ្មទណ្ឌអន្ដរជាតិ ប្រសិនបើមានការចោទប្រកាន់ជនជាតិអាមេរិកណាមួយ ពាក់ព័ន្ធនឹងឧក្រឹដ្ឋកម្មសង្រ្គាមនៅប្រទេសអាហ្វហ្គានីស្ថាន។

លោក John Bolton ទីប្រឹក្សាសន្ដិសុខជាតិអាមេរិក

លោក John Bolton ទីប្រឹក្សាសន្ដិសុខជាតិអាមេរិក បានចាត់ទុកតុលាការព្រហ្មទណ្ឌអន្តរជាតិថា គ្មានគណនេយ្យភាព និងមានគ្រោះថ្នាក់ទាំងស្រុង ដល់អាមេរិក អ៊ីស្រាអែល និងសម្ព័ន្ធមិត្ត។ លោកបន្ថែមថា រាល់ការស៊ើបអង្កេតលើសមាជិកកងទ័ពអាមេរិកនានា គឺជាការស៊ើបអង្កេតគ្មានមូលដ្ឋាន និងគ្មានយុត្តិធម៌។

លោកសង្គត់ធ្ងន់ថា "ប្រសិនបើតុលាការមកស៊ើបអង្កេតយើង អ៊ីស្រាអែល និងសម្ព័ន្ធមិត្តរបស់យើង យើងនឹងមិនអង្គុយស្ងៀមនោះទេ"។

លោកថា អាមេរិកបានរៀបចំទណ្ឌកម្ម និងការចោទប្រកាន់នានាលើមន្រ្តីតុលាការ ប្រសិនបើពួកគេដំណើរការស៊ើបអង្កេតលើជនជាតិអាមេរិកណាមួយ។ "យើងនឹងដាក់បម្រាមលើចៅក្រម និងរដ្ឋអាជ្ញានានា មិនឲ្យចូលទឹកដីអាមេរិកនោះទេ។ យើងនឹងដាក់ទណ្ឌកម្មលើប្រាក់របស់ពួកគេនៅក្នុងប្រព័ន្ធហិរញ្ញវត្ថុអាមេរិក ហើយយើងនឹងកាត់ទោសពួកគេនៅក្នុងប្រព័ន្ធព្រហ្មទណ្ឌអាមេរិក”។ លោកទីប្រឹក្សាសន្ដិសុខអាមេរិកបន្ថែម។

លោកបញ្ជាក់ទៀតថា “យើងនឹងធ្វើដូចគ្នា សម្រាប់ក្រុមហ៊ុន ឬរដ្ឋនានា ដែលជំរុញឲ្យមានការស៊ើបអង្កេតណាមួយលើពលរដ្ឋអាមេរិក”៕

ប្រភព៖ Channelnewsasia ប្រែសម្រួល៖ វាសនា