សម្ដេចហ៊ុន សែន លើកឡើង៤ចំណុច ប្រាប់ទៅកាន់ក្រុមហ៊ុនធំៗចំនួន៦របស់ចិន

2018-09-11 09:51:33
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

បន្ទាប់ពីអញ្ជើញចូលរួមកិច្ចសន្ទនាតុមូល ជាមួយនាយកប្រតិបត្តិក្រុមហ៊ុនចិនរួចមក នៅទីក្រុងណាននីង ខេត្តក្វាងស៊ី សាធារណរដ្ឋប្រជាមានិតចិន នាថ្ងៃទី១១ ខែកញ្ញា ឆ្នាំ២០១៨នេះ សម្ដេច ហ៊ុន សែន បានអញ្ជើញឆ្លើយនូវសំណួរមួយចំនួនដែលលើកឡើងដោយក្រុមហ៊ុនធំៗចំនួន៦របស់ចិន ដែលកំពុងវិនិយោគក្នុងប្រទេសកម្ពុជា។

សម្ដេច ហ៊ុន សែន បានលើកឡើងចំនួន ៤ចំណុចដូចខាងក្រោម៖

សម្ដេច ហ៊ុន សែន ថ្លែងទៅកាន់អ្នកវិនិយោគ ក្រុមហ៊ុនធំៗរបស់ចិន នៅថ្ងៃទី១១ ខែកញ្ញា ឆ្នាំ២០១៨នេះ (រូបថត៖ ទំព័រហ្វេសប៊ុកផ្លូវការ សម្ដេច ហ៊ុន សែន)

១- រាជរដ្ឋាភិបាលថ្មីនីតិកាលទី៦ ដែលដឹកនាំដោយសម្តេចផ្ទាល់ នឹងបន្តជំរុញលើកទឹកចិត្ត និងផ្តល់នូវការគាំពារខ្ពស់ចំពោះអ្នកវិនិយោគទុនបរទេសទាំងអស់ ក្នុងនោះរាប់ទាំងវិនិយោគទុនចិនដែលមានវត្តមាននៅទីនេះ និង ដែលមានគម្រោងទៅវិនិយោគក្នុងប្រទេសកម្ពុជា នៅថ្ងៃអនាគតផងដែរ។

២- សម្ដេច បានគូសបញ្ជាក់ដល់អ្នកវិនិយោគទុនចិន ពីគម្រោងដែលរាជរដ្ឋាភិបាលកម្ពុជា គ្រោងស្នើដល់រដ្ឋាភិបាលចិន ក្នុងការផ្តល់កម្ចីសម្បទានដល់ការសាងសង់ហេដ្ឋារចនាសម្ព័ន្ធរូបវ័ន្ត ក្នុងប្រទេសកម្ពុជា ដែលក្នុងនោះមានការតភ្ជាប់ផ្ទៃក្នុងប្រទេស និងការតភ្ជាប់ជាមួយនឹងបណ្តាប្រទេសក្នុងតំបន់អាស៊ាន ក៏ដូចជាការតភ្ជាប់ទៅកាន់ប្រទេសចិន តាមរយៈផ្លូវទឹក ផ្លូវគោក និងផ្លូវអាកាស។

៣- សម្ដេចនាយករដ្ឋមន្ត្រី បានគូសបញ្ជាក់ទៅកាន់បណ្តាក្រុមហ៊ុនចិន កុំមានការភ័យខ្លាចទៅលើការលុបកុងត្រាចាស់ណាមួយ ពីសំណាក់ក្រុមហ៊ុនវិនិយោគទុន តែផ្ទុយទៅវិញ រាជរដ្ឋាភិបាលថ្មី នីតិកាលទី៦ នឹងបន្តការពារនូវរាល់ផលប្រយោជន៍របស់ក្រុមហ៊ុនទាំងអស់ ក្នុងប្រទេសកម្ពុជា។

៤- ពាក់ព័ន្ធនឹងការបណ្ដាក់ទុនក្នុងប្រទេសកម្ពុជា សម្ដេចបានអំពាវនាវដល់បណ្ដាក្រុមហ៊ុនវិនិយោគចិនទាំងអស់ បន្តបណ្ដាក់ទុនឲ្យបានកាន់តែច្រើនឡើង ព្រោះកម្ពុជានៅមានសក្តានុពលជាច្រើន ក្នុងការវិនិយោគ ដើម្បីជំរុញកំណើនសេដ្ឋកិច្ច និងការអភិវឌ្ឍប្រទេសកម្ពុជាឲ្យកាន់តែមានការរីកចម្រើនថែមទៀត៕

អត្ថបទ៖ លាភ.