ភាគី​សហជីព​កំណត់​យក​តួ​លេខ ​១៩២​ដុល្លារ​ សម្រាប់​កិច្ច​ចរ​ចាប្រាក់​ឈ្នួល​អប្បបរមា​ឆ្នាំ​២០១៩ ​

  • 2018-09-12 01:34:44
  • ចំនួនមតិ 0 | ចំនួនចែករំលែក 0

ចន្លោះមិនឃើញ


បន្ទាប់ពី​កិច្ចប្រជុំ​ប្រាក់​ឈ្នួល​អប្បបរមា​ឆ្នាំ​២០១៩​ ក្នុង​វិស័យ​កាត់ដេរ​លើក​ទី​២​ បាន​បញ្ចប់​ដោយ​មិនទាន់​លេច​ជា​តួលេខ​ណាមួយ​នៅឡើយ​ ប្រធាន​សម្ព័ន្ធ​សហជីព​ជាតិ​បាន​លើកឡើង​ថា សម្រាប់​កិច្ចប្រជុំ​លើក​ទី​៣​ ​ក្រុម​សហជីព​តំណាង​ឲ្យ​កម្មករ​និយោជិត នឹង​លើកយក​តួលេខ​ចំនួន​១៩២​ដុល្លារ​អាមេរិក ដើម្បី​ធ្វើការ​ពិភាក្សា​បន្ត​។ កិច្ចប្រជុំលើកទី៣ នឹង​ប្រព្រឹត្តទៅ​នៅ​ថ្ងៃទី​១៤​ខែកញ្ញា​ខាងមុខ។

​លោក ហ្វា សាលី ប្រធាន​សម្ព័ន្ធ​សហជីព​ជាតិ បានបញ្ជាក់​ឲ្យ​ដឹង​កាលពី​ព្រឹក​ថ្ងៃទី​១១ ខែ​កញ្ញា ឆ្នាំ​២០១៨​​ថា ​តួលេខ​ដំបូង​ដែល​គ្រោង​នឹង​លើកយក​ពិភាក្សា​ក្នុង​កិច្ចប្រជុំ​ខាងមុខ​គឺ​ចំនួន​ ២១១,៦៧​ដុល្លារ​។​ ប៉ុន្តែ​ក្រោយពី​បាន​ប្រជុំ​ច្រើនលើកច្រើនសារ​រួចមក​ រ​វាង​ក្រុម​សហជីព​ក៏បាន​សម្រេច​យក​តួលេខ​ចំនួន​១៩២​ដុល្លារ​វិញ​។

លោក​បន្តថា ​សម្រាប់​កិច្ចប្រជុំ​លើក​ទី​៣​ខាងមុខ​ ​ភាគី​តំណាង​ឲ្យ​និយោជក​មិនទាន់​កំណត់​តួលេខ​ប្រាក់ឈ្នួល​​នៅឡើយ​ទេ។​ ចំណែក​ភាគី​រដ្ឋាភិបាល​គ្រោង​នឹង​លើកយក​តួលេខ​ចំនួន​ ១៧៧​ដុល្លារ​ដើម្បី​ធ្វើ​ការចចារ​បន្ត​។​

កិច្ចប្រជុំចរចាប្រាក់ឈ្នួលរវាងភាគីពាក់ព័ន្ធ នៅក្រសួងការងារ កាលពីថ្ងៃទី១០កញ្ញា ២០១៨។ រូបថត៖ ក្រសួងការងារ
ជាមួយគ្នានេះ ​លោកប្រធាន​សម្ព័ន្ធសហជីព ​បាន​ទទួលស្គាល់​ថា ​ការ​ដំឡើង​ប្រាក់​ឈ្នួល​បន្តបន្ទាប់​ក៏មាន​ផលប៉ះពាល់​ផងដែរ​ទៅដល់​ផ្នែក​សិប្បកម្ម​ខ្នាតតូច ​ក៏ដូចជា​កម្មករ​មួយ​ចំនួនធំ​ផ្សេងទៀត​។​ទន្ទឹមនេះ​លោក​បាន​ថ្លែងអំណរគុណ​ដល់​រដ្ឋាភិបាល​ដែលមាន​ការយកចិត្តទុកដាក់​និង​តែងតែ​គិតគូរ​ដល់​កម្មករនិយោជិត​ផ្នែក​វិស័យ​កាត់ដេរ​។ ​​ ​ ​តាម​ការបញ្ជាក់​របស់​លោក ហេង សួរ អនុប្រធាន​លេខាធិការដ្ឋាន​គណៈកម្មកា​រ​ប្រឹក្សា​ការងារ ក្រោយ​ចប់​កិច្ចប្រជុំ​លើក​ទី​២​កន្លងទៅនេះ​ បាន​ឲ្យ​ដឹងថា​ រៀងរាល់​ពេល​ច​ចារ​ដំណាក់​ដំបូង​ភាគី​នីមួយៗ​តែងតែមាន​ក្តី​រំពឹង​រៀងៗ​ខ្លួន​ដើម្បី​ជា​សំណើ​សម្រាប់​ឲ្យ​ភាគី​ម្ខាង​ទៀត​ពិចារណា​។

​«យើង​ផ្តើម​ពី​តួលេខ​ខ្ពស់​ហើយក៏​ចុះមក​ម្តង​តិច រីឯ​ភាគី​និយោជក​ផ្តើម​ពី​តួលេខ​ទាប ឡើង​ម្តង​បន្តិច អីចឹង​ខ្ញុំ​គិតថា​តួរ​លេខ​ណាមួយ​ក៏ដោយ​ដែល​បង្ហាញ​ដោយ​ភាគី​នីមួយៗ​ក្រៅផ្លូវការ​ក្នុង​រយៈពេល​ប៉ុន្មាន​ថ្ងៃនេះ នៅ​មិនទាន់​ក្លាយជា​តួលេខ​ផ្លូវ​ការដែល​តំណាង​ឲ្យ​ភាគី​របស់ខ្លួន​នៅឡើយ​ទេ»។ លោក ហេង សួរ បន្ថែម។

​សម្រាប់​​កិច្ចប្រជុំ​ប្រាក់​ឈ្នួល​អប្បបរមា​ផ្នែក​វាយនភណ្ឌ​កាត់ដេរ​ និង​ផលិត​ស្បែកជើង​ឆ្នាំ​២០១៩​ត្រូវបាន​លោក ​អ៊ិត​ សំហេង ​រដ្ឋមន្ត្រី​ក្រសួង​ការងារ ​និង​បណ្តុះបណ្តាល​វិជ្ជាជីវៈ បាន​មានប្រសាសន៍​កាលពី​ថ្មីៗនេះ​ថា ​នឹង​បញ្ចប់​ឱ្យបាន​មុន​ថ្ងៃបុណ្យ​ភ្ជុំបិណ្ឌ ពោលគឺ​យ៉ាងយូរ​បំផុត​ត្រឹម​ថ្ងៃទី​៥ ខែតុលា​ខាងមុខ៕

ប្រភព៖ រស្មីកម្ពុជា ប្រែ​សម្រួល៖ សំភី

អត្ថបទថ្មី
;