ការសាងសង់ពហុកីឡដ្ឋានជាតិមរតកតេជោ ដំណើរការដល់ណាហើយ?

2018-09-12 03:21:30
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា (NOCC) បានឲ្យដឹងថា រហូតមកដល់ពេលនេះ ការកសាងពហុកីឡដ្ឋានជាតិមរតកតេជោ ដែលត្រៀមទទួលកីឡាស៊ីហ្គេមឆ្នាំ២០២៣ បានសម្រេចការសាងសង់ប្រមាណពី ២០ ទៅ ៣០ភាគរយហើយ។

លោកបន្តថា លោក ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជា នឹងចុះពិនិត្យមើលការដ្ឋានសាងសង់ពហុកីឡដ្ឋានជាតិមរតកតេជោ នៅថ្ងៃទី១៥ ខែកញ្ញាខាងមុខនេះ។

ការដ្ឋានសាងសង់ពហុកីឡដ្ឋានជាតិមរតកតេជោ ដែលសម្រេចបានពី ២០ ទៅ ៣០%

សូមបញ្ជាក់ថា ការកសាងពហុកីឡដ្ឋានជាតិនេះ កំពុងស្ថិតក្នុងដំណាក់កាលទី២ បន្ទាប់ពីដំណាក់កាលទី១ ដែលមានអាងហែលទឹក និង Indoor Stadium (សង្វៀនប្រដាល់ បាល់ទះ បាល់បោះជាដើម) ត្រូវបានកសាងរួចរាល់កាលពីឆ្នាំ២០១៧។ ការកសាងដំណាក់កាលទី២នេះ (ទីលានបាល់ទាត់) គ្រោងនឹងបញ្ចប់នៅឆ្នាំ ២០២០។ ហើយបន្ទាប់ពីចប់ដំណាក់កាលទី២ ទើបចាប់ផ្ដើមដំណាក់កាលទី៣។

អាងហែលទឹក ដែលត្រូវបានបញ្ចប់ការសាងសង់ក្នុងដំណាក់កាលទី១

សូមបញ្ជាក់ថា ពហុកីឡដ្ឋានជាតិថ្មីនេះ ត្រូវបានកសាងឡើងក្រោមជំនួយឥតសំណងរបស់ចិន ចំនួនប្រមាណ ១៥៧លានដុល្លារ លើផ្ទៃដី ៨៥ហិកតា ក្នុងសង្កាត់បាក់ខែង ខណ្ឌជ្រោយចង្វារ (ផ្លូវលីយ៉ុងផាត់)៕

ប្រភព៖ Sabay News អត្ថបទ៖ ជាន ចាន់រ៉ា