Google Earth ពិតជាបង្ហាញរូបរាងវត្ថុម៉្យាង ស្រដៀងនឹងយន្តហោះ ដែលធ្លាក់នៅម្ដុំភ្នំឱរ៉ាល់កម្ពុជា

2018-09-12 07:04:09
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

នារយៈពេលប៉ុន្មានថ្ងៃកន្លងមកនេះ មានសារព័ត៌មានបរទេសជាច្រើនបានចុះផ្សាយថា យន្តហោះ MH370 របស់ម៉ាឡេស៊ី ទំនងជាធ្លាក់នៅក្នុងទឹកដីប្រទេសកម្ពុជា។ យ៉ាងណាមិញ មកទល់នឹងបច្ចុប្បន្ន មិនទាន់មានភស្តុតាងជាក់ស្ដែងបង្ហាញនៅឡើយនោះទេថាវាជាការពិត។

ទោះជាយ៉ាងនេះក្ដី បើតាមរយៈផែនទីដែលបង្ហាញនៅលើ Google Earth វាពិតជាមានរូបរាងវត្ថុម៉្យាងដូចទៅនឹងយន្តហោះប្រាកដមែននៅលើទឹកដីប្រទេសកម្ពុជា។ វត្ថុរាងដូចយន្តហោះនោះស្ថិតនៅម្ដុំព្រៃក្រាស់ នាភ្នំឱរ៉ាល់ ចន្លោះព្រំប្រទល់ខេត្តកំពង់ស្ពឺ និងខេត្តពោធិ៍សាត់។

សូមទស្សនារូបភាពវត្ថុមានរាងយន្តហោះនៅក្នុងព្រៃភ្នំឱរ៉ាល់ ប្រទេសកម្ពុជា ដែលបង្ហាញដោយ Google Earth ដូចខាងក្រោម៖

វត្ថុម៉្យាងរាងដូចយន្តហោះ នៅម្ដុំភ្នំឱរ៉ាល់ ប្រទេសកម្ពុជា (រូបភាពដែល [ខ្លីៗ] កាត់ពី Google Earth)

បើចង់ជ្រាបកាន់តែច្បាស់ អាចចុចតាមរយៈតំណ Link មួយនេះ ដើម្បីចូលទៅកាន់ Google Earth។

សូមរំលឹកថា ពាក់ព័ន្ធនឹងព័ត៌មានដែលថា MH370 ធ្លាក់នៅកម្ពុជា ត្រូវអគ្គនាយកអាកាសចរណ៍ស៊ីវិលកម្ពុជា លោក កែវ ស៊ីវន បានធ្វើការបដិសេធ។ លោក កែវ ស៊ីវន បានបញ្ជាក់ប្រាប់ [ខ្លីៗ] នៅថ្ងៃទី៤កញ្ញាថា ប្រសិនបើនេះជារឿងពិត ទោះ MH370 ធ្លាក់នៅកន្លែងណាក៏ដោយនៅក្នុងប្រទេសកម្ពុជា នោះអាកាសចរណ៍ស៊ីវិលកម្ពុជានឹងរុករកឃើញមិនខាន។ ប៉ុន្តែវាគ្រាន់តែជាព័ត៌មានប្រឌិតតែប៉ុណ្ណោះ។

ព័ត៌មានធ្លាក់ MH370 នៅកម្ពុជា ចាប់ផ្ដើមចុះផ្សាយដំបូងឡើយដោយសារព័ត៌មានអង់គ្លេសឈ្មោះ Daily Star។ Daily Star បានស្រង់សម្ដីលោក Ian Wilson អ្នកជំនាញបច្ចេកវិទ្យាម្នាក់ ដែលអះអាងពីការរកឃើញបំបែកយន្តហោះ MH370 តាមរយៈ Google Maps និង Google Earth។ លោកថា បំបែកនោះត្រូវបានប្រទះឃើញនៅលើតំបន់ព្រៃខ្ពស់មួយ ស្ថិតក្នុងប្រទេសកម្ពុជា។ លោកបានបញ្ជាក់ថា បំបែកនោះមានប្រវែងប្រមាណជា ៧០ម៉ែត្រ ខណៈដែល MH370 មានត្រឹម ៦៣,៧ម៉ែត្រ។ ប៉ុន្តែលោក Wilson ប្រាប់ថា ប្រវែងដែលលើសខ្វះគ្នានេះអាចបណ្ដាលមកពីការបែកបាក់តួខ្លួន និងកន្ទុយយន្តហោះ។

យន្តហោះរបស់អាកាសចរណ៍ម៉ាឡេស៊ី នៅព្រលានយន្តហោះកូឡាឡាំពួរ (រូបថត៖ slideshare.net)

គួរបញ្ជាក់ថា យន្តហោះ MH370 បានបាត់ខ្លួន កាលពីឆ្នាំ២០១៤ ជាមួយមនុស្ស ២៣៩ ដែលនៅលើយន្តហោះ។ យន្តហោះនេះ បានធ្វើដំណើរពីក្រុងកូឡាឡាំពួរ ទៅកាន់ក្រុងប៉េកាំង ប្រទេសចិន ប៉ុន្តែបានបាត់ពីរ៉ាដា ពេលកំពុងធ្វើដំណើរ។ ការបាត់ខ្លួនរបស់ MH370 ត្រូវចាត់ទុកជាអាថ៌កំបាំងដ៏ធំបំផុតមួយ ក្នុងប្រវត្តិសាស្ត្រ៕

អត្ថបទ៖ ឈាង.