ប៉េតង់កម្ពុជា ចេញទៅប្រកួតជើងឯកពិភពលោក នៅទ្វីបអាមេរិក

2018-09-12 13:36:21
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រតិភូកីឡាករប៉េតង់កម្ពុជាបានចេញដំណើរ ដើម្បីចូលរួមប្រកួតប្រជែង មេដាយនៅក្នុងព្រឹត្តិ ការណ៍កីឡាប៉េតង់ជើងឯកពិភពលោកផ្នែកបុរស លើកទី៤៨ នៅទីក្រុង Quebec ប្រទេស កាណាដា ចាប់ពីថ្ងៃទី១៣ ដល់ថ្ងៃទី១៨ ខែកញ្ញា ឆ្នាំ២០១៨។ នេះបើតាមការចុះផ្សាយរបស់ទីភ្នាក់ងារសារព័ត៌មានកម្ពុជា។

ថ្លែងនៅអាកាសយានដ្ឋានអន្តរជាតិភ្នំពេញ កាលពីថ្ងៃទី១១ ខែកញ្ញា ឆ្នាំ២០១៨ លោក អ៊ិន គឹមស្រ៊ុន ប្រធានប្រតិភូ និងជាអគ្គលេខាធិការ សហព័ន្ធកីឡាប៊ូល និងប៉េតង់កម្ពុជាបានគូសបញ្ជាក់ថា សម្រាប់ឆ្នាំនេះសហព័ន្ធបានបញ្ជូនគ្រូបង្វឹកម្នាក់ និងកីឡាករ៤នាក់ រួមមាន កីឡាករ សុខ ចាន់មាន កីឡាករ យឹម សុភ័ណ្ឌ កីឡាករ ថោង ឈឿន និងកីឡាករ ស៊ីន វង់ ដែលត្រូវប្រកួតលើវិញ្ញាសាវាយយកពិន្ទុឯកត្តជន និងវាយ ៣នាក់ទល់ ៣នាក់បុរស។

ប្រតិភូកីឡាករប៉េតង់កម្ពុជាបានចេញដំណើរ ពីព្រលានយន្តហោះអន្តរជាតិភ្នំពេញ កាលពីថ្ងៃទី១១ ខែកញ្ញា ឆ្នាំ២០១៨ (រូបថត៖ AKP)

លោក អ៊ិន គឹមស្រ៊ុន ចាត់ទុកថា ក្រុមប៉េតង់របស់កម្ពុជាគឺជាក្រុមខ្លាំងមួយជាមួយក្រុមថៃ នៅក្នុងទ្វីបអាស៊ី ហើយនៅបណ្តាទ្វីបទាំងអស់មានប្រហែលតែ ២ប្រទេស ក្នុងទ្វីបនីមួយៗ ដែលខ្លាំងៗ។ លោកបានបន្ដទៀតថា ការប្រកួតជើងឯកពិភពលោកនេះ មានតែ ២វិញ្ញាសា ប៉ុណ្ណោះស្មើនឹងមេដាយមាសតែ ២គ្រឿងប៉ុណ្ណោះ ដូច្នេះការឈ្នះទម្រាំបានមេដាយមាស ឬមេដាយ ក្នុងកម្រិតប្រាក់ ឬសំរឹទ្ធិ គឺជារឿងលំបាកបំផុត ដែលមេដាយតែ១ត្រូវប្រជែង ដោយអត្តពលិកមកពីជាង៤០ ប្រទេស។

សូមរំឭកថា ម្ចាស់មេដាយមាសជើងឯកពិភពលោក ឆ្នាំ២០១៦ កីឡាករ សុខ ចាន់មាន ត្រូវលេងលើវិញ្ញាសាវាយយកពិន្ទុ ស្របពេលដែលកីឡាករ ៣នាក់ទៀត គឺ យឹម សុភ័ណ្ឌ កីឡាករ ថោង ឈឿន និងកីឡាករ ស៊ីន វង់ ត្រូវលេងលើវិញ្ញាសា ៣នាក់ទល់៣នាក់៕

អត្ថបទ៖ លាភ.