ការរុករកយន្តហោះ MH370 ដែលសង្ស័យធ្លាក់ក្នុងព្រៃកម្ពុជា ចេញលទ្ធផលហើយ

2018-09-15 01:39:54
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អ្នកជំនាញខាងអាកាសចរណ៍ចំនួន១រូប អមដំណើរដោយមនុស្ស២នាក់ផ្សេងទៀត បានជួលឧទ្ធម្ភាគចក្រ១គ្រឿង ដើម្បីជិះស្វែងរកទីតាំងក្នុងព្រៃដែលត្រូវបានសង្ស័យថា ជាទីតាំងដែលយន្តហោះរបស់អាកាសចរណ៍ម៉ាឡេស៊ី MH370 បានធ្លាក់។ ជាលទ្ធផល ក្រុមរបស់អ្នកជំនាញនេះ មិនអាចរកឃើញបំណែកយន្តហោះណាមួយនៅទីតាំងនោះទេ។ នេះបើតាមការចុះផ្សាយរបស់សារព័ត៌មានអង់គ្លេស The Sun កាលពីថ្ងៃទី១៤ ខែកញ្ញា ឆ្នាំ២០១៨។

លោក Zorba Parer ទីប្រឹក្សាអាកាសចរណ៍ អមដំណើរដោយលោក Nara Kang អ្នកជំនួញក្នុងស្រុក និងអ្នករាយការណ៍ព័ត៌មានឈ្មោះ Michael Carr បានជិះឧទ្ធម្ភាគចក្រដែលក្រុមខ្លួនបានជួល ដើម្បីស្វែងរកយន្តហោះនៅក្នុងព្រៃ នៅម្ដុំភ្នំឱរ៉ាល់កម្ពុជា។ យ៉ាងណាក៏ដោយ លោក Parer បានថ្លែងថា៖ «ពួកយើងបានព្យាយាមស្វែងរកបំណែកយន្តហោះ ដែលអាចបែកខ្ចាត់ខ្ចាយ។ ក៏ប៉ុន្តែពួកយើងរកមិនឃើញអ្វីឡើយ។ ពួកយើងមិនអាចរកដាននៃយន្តហោះ ឬក៏សញ្ញានៃសាកសពមនុស្សណាម្នាក់ឡើយ»។

លោក Zorba Parer និងក្រុមរបស់លោក ជួលឧទ្ធម្ភាគចក្រ ជិះស្វែងរកបំណែកយន្តហោះ MH370 ដែលសង្ស័យថា បានធ្លាក់នៅក្នុងព្រៃកម្ពុជា (រូបថត៖ Cambodia Expats Online)

ថ្មីៗនេះដែរ ប្រទេសចិនបានប្រើប្រាស់ផ្កាយរណបដើម្បីផ្ដិតយករូបភាពនៅទីតាំងមួយ នៅក្នុងព្រៃកម្ពុជា ដែលត្រូវបានសង្ស័យ តែជាលទ្ធផល ក៏មិនអាចរកឃើញបំណែកយន្តហោះណាមួយឡើយដែរ។

រូបភាពផែនទីដែលគេសង្ស័យថា ជាទីតាំងដែលយន្តហោះ បានធ្លាក់

សូមបញ្ជាក់ថា ការស្វែងរករបស់ក្រុមលោក Parer បានធ្វើឡើង បន្ទាប់ពីពេលកន្លងទៅ សារព័ត៌មានបរទេសជាច្រើនបានចុះផ្សាយថា យន្តហោះ MH370 របស់ម៉ាឡេស៊ី ទំនងជាធ្លាក់នៅក្នុងទឹកដីប្រទេសកម្ពុជា។ ការអះអាងទាំងនេះ ត្រូវបានពឹងផ្អែកលើរូបថតពីផែនទីលើ Google Earth ដែលបង្ហាញវត្ថុម្យ៉ាង មានរាងដូចយន្តហោះ ស្ថិតនៅម្ដុំព្រៃក្រាស់ នាភ្នំឱរ៉ាល់ ចន្លោះព្រំប្រទល់ខេត្តកំពង់ស្ពឺ និងខេត្តពោធិ៍សាត់។

ពាក់ព័ន្ធនឹងព័ត៌មានដែលថា MH370 ធ្លាក់នៅកម្ពុជា ត្រូវអគ្គនាយកអាកាសចរណ៍ស៊ីវិលកម្ពុជា លោក កែវ ស៊ីវន បានធ្វើការបដិសេធ។ លោក កែវ ស៊ីវន បានបញ្ជាក់ប្រាប់ [ខ្លីៗ] នៅថ្ងៃទី៤កញ្ញាថា ប្រសិនបើនេះជារឿងពិត ទោះ MH370 ធ្លាក់នៅកន្លែងណាក៏ដោយនៅក្នុងប្រទេសកម្ពុជា នោះអាកាសចរណ៍ស៊ីវិលកម្ពុជានឹងរុករកឃើញមិនខាន។ ប៉ុន្តែវាគ្រាន់តែជាព័ត៌មានប្រឌិតតែប៉ុណ្ណោះ។

ព័ត៌មានធ្លាក់ MH370 នៅកម្ពុជា ចាប់ផ្ដើមចុះផ្សាយដំបូងឡើយដោយសារព័ត៌មានអង់គ្លេសឈ្មោះ Daily Star។ Daily Star បានស្រង់សម្ដីលោក Ian Wilson អ្នកជំនាញបច្ចេកវិទ្យាម្នាក់ ដែលអះអាងពីការរកឃើញបំបែកយន្តហោះ MH370 តាមរយៈ Google Maps និង Google Earth។ លោកថា បំបែកនោះត្រូវបានប្រទះឃើញនៅលើតំបន់ព្រៃខ្ពស់មួយ ស្ថិតក្នុងប្រទេសកម្ពុជា។ លោកបានបញ្ជាក់ថា បំបែកនោះមានប្រវែងប្រមាណជា ៧០ម៉ែត្រ ខណៈដែល MH370 មានត្រឹម ៦៣,៧ម៉ែត្រ។ ប៉ុន្តែលោក Wilson ប្រាប់ថា ប្រវែងដែលលើសខ្វះគ្នានេះអាចបណ្ដាលមកពីការបែកបាក់តួខ្លួន និងកន្ទុយយន្តហោះ។

គួររំឭកថា យន្តហោះ MH370 បានបាត់ខ្លួន កាលពីឆ្នាំ២០១៤ ជាមួយមនុស្ស ២៣៩ ដែលនៅលើយន្តហោះ។ យន្តហោះនេះ បានធ្វើដំណើរពីក្រុងកូឡាឡាំពួរ ទៅកាន់ក្រុងប៉េកាំង ប្រទេសចិន ប៉ុន្តែបានបាត់ពីរ៉ាដា ពេលកំពុងធ្វើដំណើរ។ ការបាត់ខ្លួនរបស់ MH370 ត្រូវចាត់ទុកជាអាថ៌កំបាំងដ៏ធំបំផុតមួយ ក្នុងប្រវត្តិសាស្ត្រ៕