កាំកុងត្រូល ដាក់មន្រ្តី និងឧបករណ៍ពិសោធន៍ ប្រចាំការនៅតាមផ្សារសំខាន់ៗ ក្នុងរាជធានីភ្នំពេញ

2018-10-03 05:09:35
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អគ្គនាយកដ្ឋានកាំកុងត្រូល បានរៀបចំមន្ត្រីជំនាញ និងឧបករណ៍ពិសោធន៍ ចុះប្រតិបត្តិការ និងប្រចាំការតាមទីផ្សារគោលដៅសំខាន់ៗ ចំនួន០៨ ក្នុងរាជធានីភ្នំពេញ។ គោលបំណង គឺដើម្បីត្រៀមធ្វើអន្តរាគមន៍ឆ្លើយតបបន្ទាន់ចំពោះហេតុការណ៍ចាំបាច់ ដោះស្រាយបញ្ហា ឬបាតុភាពជាយថាហេតុណាមួយរបស់ប្រជាពលរដ្ឋ ព្រមទាំងផ្តល់ការអប់រំលើកកម្ពស់ការយល់ដឹង ជូនអ្នកប្រើប្រាស់ អាជីវករ អ្នកលក់ដូរ អំពីបញ្ហាគុណភាព សុវត្ថិភាពផលិតផលទំនិញផងដែរ។ នេះបើតាមការបង្ហោះនៅលើទំព័រហ្វេសប៊ុករបស់អគ្គនាយកដ្ឋានកាំកុងត្រូលនៅថ្ងៃទី៣ ខែតុលានេះ។

ផ្សារសំខាន់ៗទាំងនោះរួមមាន៖ ផ្សារធំថ្មី, ផ្សារអូឬស្សី, ផ្សារដើមគរ, ផ្សារទួលទំពូង, ផ្សារស្ទឹងមានជ័យ, ផ្សារជម្ពូវ័ន្ត, ផ្សារសេនជូរីផ្លាសា និងផ្សារច្បារអំពៅ។

មន្រ្តីកាំកុងត្រូល ដែលនៅប្រចាំការនៅក្នុងផ្សារគោលដៅមួយ ក្នុងរាជធានីភ្នំពេញ។ រូបថត៖ FB អគ្គនាយកដ្ឋានកាំកុងត្រូល

បើតាមអគ្គនាយកដ្ឋានកាំកុងត្រូល ឱ្យដឹងថា ចំពោះការត្រួតពិនិត្យលើផលិតផលម្ហូបអាហារ មន្ត្រីជំនាញអនុវត្តការងារ ដោយប្រើប្រាស់ឧបករណ៍សម្ភារៈពិសោធន៍វិភាគបឋម ឧបករណ៍ខ្នាតរង្វាស់រង្វាល់ និងឧបករណ៍ បច្ចេកទេសចាំបាច់នានា ផ្ទាំង និងខិតប័ណ្ណឃោសនាអប់រំ ធានាធ្វើយ៉ាងណាផ្តល់ភាពសុក្រិត តម្លាភាព យុត្តិធម៌ សម្រាប់ជាប្រយោជន៍ដល់គ្រប់ភាគីពាក់ព័ន្ធ។ កិច្ចការនេះ នឹងឈានទៅរៀបចំនៅតាមបណ្តាផ្សារគោលដៅសំខាន់ ៗ តាមបណ្តាខេត្ត នៅទូទាំងប្រទេសកម្ពុជា ក្នុងពេលឆាប់ៗខាងមុខ។

អគ្គនាយកដ្ឋានដដែលនេះ បានអំពាវនាវឱ្យប្រជាពលរដ្ឋ ដែលមានចម្ងល់ ឬមានបញ្ហាពាក់ព័ន្ធនឹងសុវត្ថិភាពម្ហូបអាហារ គឺអាចទាក់ទងផ្ទាល់ជាមួយមន្រ្តីកាំកុងត្រូល ដែលកំពុងប្រតិបត្តិការនៅតាមបណ្តាផ្សារខាងលើនេះ៕

អត្ថបទ៖ សំភី