Rooney ត្រូវកោះហៅចូលជម្រើសជាតិអង់គ្លេសជាថ្មី ដើម្បីលេងជាលើកចុងក្រោយ

2018-11-05 07:36:17
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

Wayne Rooney នឹងចូលលេងឲ្យក្រុមជម្រើសជាតិអង់គ្លេសជាលើកចុងក្រោយ ក្នុងការប្រកួតមិត្តភាពសប្បុរសធម៌ ទល់នឹងក្រុមជម្រើសជាតិអាមេរិក នៅថ្ងៃទី១៥ ខែវិច្ឆិកា ឆ្នាំ២០១៨ នាកីឡដ្ឋានជាតិអង់គ្លេស។

Rooney អបអរក្នុងការស៊ុតបញ្ចូលទីនៅក្លឹប DC United (រូបថត៖ US Today Sports)

ប្រាប់ទៅកាន់សារព័ត៌មាន The Sun ខ្សែប្រយុទ្ធដែលកំពុងប្រកបអាជីពនៅក្លឹប DC United នៅទឹកដីសហរដ្ឋអាមេរិក បានអះអាងថា ការបង្ហាញខ្លួនលើកនេះ គឺជាការលេងជាលើកចុងក្រោយរបស់ខ្លួននៅក្រុមជម្រើសជាតិអង់គ្លេសហើយ។

លោក Gareth Southgate គ្រូបង្វឹកក្រុមជម្រើសជាតិអង់គ្លេស និងសហព័ន្ធបាល់ទាត់អង់គ្លេស បានសម្រេចកោះហៅ Rooney សាជាថ្មី ដើម្បីជាការផ្ដល់កិត្តិយសចុងក្រោយ។

Rooney ដែលជាអតីតវីរបុរសរបស់ក្លឹប Manchester United បានរកគ្រាប់បាល់ចំនួន ១២គ្រាប់ ក្នុង ២១ប្រកួតនៅក្របខណ្ឌលីគកំពូលអាមេរិក។ នៅជម្រើសជាតិអង់គ្លេស កីឡាករវ័យ៣៣ឆ្នាំរូបនេះ រកបាន ៥៣គ្រាប់ក្នុងការបង្ហាញខ្លួន ១១៩លើក និងជាអ្នកស៊ុតបញ្ចូលទីបានច្រើនបំផុតក្នុងប្រវត្តិសាស្ត្ររបស់អង់គ្លេស៕

ប្រភព៖ The Sun ប្រែសម្រួល៖ លាភ.