ក្រសួង​យុត្តិធម៌ ពន្យល់ពី​ករណី​លោក កឹម សុខា ​ក្រោយ​លោក សម រង្ស៊ី បបួល​សម្តេច ហ៊ុន សែន ភ្នាល់គ្នា

  • 2018-11-11 09:19:06
  • ចំនួនមតិ 0 | ចំនួនចែករំលែក 0

ចន្លោះមិនឃើញ


អ្នកនាំពាក្យ​ក្រសួង​យុត្តិធម៌ នៅថ្ងៃទី​១១ ខែ​វិច្ឆិកា ឆ្នាំ​២០១៨​នេះ បាន​ចេញ​សេចក្តី​ថ្លែងការណ៍​ពន្យល់​អំពី​ករណី​លោក កឹម សុខា ក្រោយ​លោក សម រង្ស៊ី ប្រធាន​ចលនា​សង្គ្រោះ​ជាតិ បាន​បបួល​សម្តេច ហ៊ុន សែន ភ្នាល់គ្នា​រឿង​ទាក់ទង​នឹង​ការ​ដោះលែង​លោក កឹម សុខា។

ពាក់ព័ន្ធ​នឹងករណី​នេះ អ្នកនាំពាក្យ​ក្រសួង​យុត្តិធម៌​ បាន​បញ្ជាក់​ដូចខាង​ក្រោម៖

១. លោក កឹម សុខា ត្រូវបាន​ចោទ​ប្រកាន់​ពីបទ​សន្និដ្ឋិភាព​ជាមួយ​បរទេស ជាប្រភេទ​បទល្មើស​ក្បត់ជាតិ តាម​បញ្ញត្តិមាត្រា៤៤៣ នៃ​ក្រម​ព្រហ្មទណ្ឌ​នៃ​ព្រះរាជាណាចក្រ​កម្ពុជា ដែល​បទឧក្រិដ្ឋនេះ មាន​ទោស​ជាប់ពន្ធនាគារពី ១៥ឆ្នាំ ទៅ ៣០ឆ្នាំ។

២. លោក កឹម សុខា ត្រូវ​បាន​ចៅក្រម​ស៊ើបសួរ​ សម្រេច​ឃុំខ្លួន​កាលពីថ្ងៃទី៥ ខែកញ្ញា ឆ្នាំ២០១៧ ហើយ​ត្រូវបាន​ដោះលែង​ឱ្យនៅក្រៅឃុំ និង​ដាក់ឱ្យ​ស្ថិត​នៅក្រោម​ការ​ត្រួតពិនិត្យ តាមផ្លូវ​តុលាការ​កាលពីថ្ងៃទី៩ ខែកញ្ញា ឆ្នាំ​២០១៨។ យោងតាម​ក្រមនីតិវិធីព្រហ្មទណ្ឌ​នៃព្រះរាជាណាចក្រ​កម្ពុជា ការឃុំខ្លួន​ដែល​សម្រេច​ឡើង​ដោយ​ចៅក្រម​ស៊ើបសួរ​សម្រាប់​បទឧក្រិដ្ឋ គឺអាច​មាន​រយៈពេល ៦ខែ និង​អាច​ពន្យារពេល​ម្តង​បាន ៦ខែ ចំនួនពីរដង។ ការណ៍​ដែលលោក សម រង្ស៊ី ផ្តល់បទ​សម្ភាស​ជាមួយ​វិទ្យុអាស៊ីសេរី កាលពីថ្ងៃទី១០ ខែវិច្ឆិកា ឆ្នាំ២០១៨ ហើយ​និយាយ​ថា ការឃុំខ្លួននេះ នឹងត្រូវបញ្ចប់​យ៉ាង​យូរ​នៅត្រឹម​ថ្ងៃទី៣ ខែមីនា ឆ្នាំ២០១៩ គឺ​ក្រសួង​បញ្ជាក់​ថា ជាការ​អះអាង​ដោយមិនចេះច្បាប់ និង​ខ្វះ​ការយល់​ដឹងអំពីនីតិ​វិធីតុលាការ។

ក្រសួង​យុត្តិធម៌​ថា លោក កឹម សុខា ត្រូវបាន​ដាក់​ឱ្យ​ស្ថិត​ក្នុងរបប​នៃការដាក់​ឱ្យស្ថិតនៅ​ក្រោមការត្រួតពិនិត្យ​តាមផ្លូវ​តុលាការ និងមិនស្ថិត​ក្រោមរបប​នៃការឃុំខ្លួនបណ្តោះអាសន្ន ដែល​ទាក់ទងនឹងរយៈពេល​នៃការ​ឃុំខ្លួន​បណ្តោះ​អាសន្ន ដែលមាន​យ៉ាងច្រើន ១៨ខែ​នោះឡើយ។ បើតាម​ក្រសួង​ដដែល​នេះ បាន​ហៅការ​អះអាង​ដែលថា ការឃុំខ្លួន​បណ្តោះ​អាសន្ន​តាមច្បាប់​បារាំង​មាន​រយៈពេល​មិន​លើសពី ២​ថ្ងៃ គឺជា​រឿង​បោកប្រាស់ និងជា​ការ​និយាយ​ដោយ​បំភ័ន្ត។

លោក កឹម សុខា អតីតប្រធាននៃអតីតគណបក្ស​សង្គ្រោះជាតិ ថ្លែងនៅមុខសាលាដំបូងរាជធានីភ្នំពេញ នាពេលកន្លងមក

ទី៣. សំណុំរៀង​ព្រហ្មទណ្ឌ​ទាក់ទងនឹង​ជន​ត្រូវចោទ​ឈ្មោះ កឹម សុខា បច្ចុប្បន្ន កំពុង​ស្ថិតក្នុងសមត្ថកិច្ច​របស់​ចៅក្រម​ស៊ើបសួរ​នៃសាលាដំបូងរាជធានី​ភ្នំពេញ។ ចៅក្រម​ស៊ើបសួរ​ត្រូវសម្រេច​អំពី​ចំណាត់ការ​នានា​លើសំណុំរឿងនេះ តាមឆន្ទានុសិទ្ធិ​ដោយឯករាជ្យ​របស់ខ្លួន និង​ដោយ​ផ្អែកលើ​អង្គហេតុ ភស្តុតាង ព្រមទាំងច្បាប់​នៃព្រះរាជាណាចក្រ​កម្ពុជា ដោយមិន​ទទួល​សម្ពាធ​ពីបរទេស ឬបុគ្គល​ណាមួយ​ឡើយ។

សូម​រំលឹក​ថា កាលពី​ថ្ងៃទី៩ ខែ​វិច្ឆិកា ឆ្នាំ​២០១៨ លោក សម រង្ស៊ី បាន​សរសេរ​នៅ​លើ​បណ្តាញ​សង្គម​យ៉ាង​ដូច្នេះ​ថា៖ «តើលោក ហ៊ុន សែន ហ៊ានភ្នាល់​ជាមួយ​ខ្ញុំទេ? កាលពី​ថ្ងៃទី៧​ វិច្ឆិកា កន្លង​ទៅ​នេះ លោក ហ៊ុន សែន បាន​អះអាង​ថា គាត់មិន​ងាយ​ដោះលែង​លោក កឹម សុខា ទេ ទាល់តែ​ចាំសេះ​ដុះស្នែង។ ខ្ញុំ​នៅតែជឿជាក់​ថា ក្រោម​សម្ពាធ​អន្តរជាតិ លោក ហ៊ុន សែន នឹងត្រូវ​បង្ខំចិត្ត​ដោះលែង​លោក កឹម សុខា ក្នុងពេល​ឆាប់ៗ​ខាងមុខ​នេះ។ អាចថ្ងៃ​២៩ ធ្នូ ២០១៨ ឬក៏​យ៉ាងយូរ​បំផុត ថ្ងៃ​៣ មីនា ២០១៩»។ នេះ​បើតាម​ការ​ដកស្រង់​របស់​អ្នក​នាំពាក្យ​ក្រសួង​យុត្តិធម៌ មក​បង្ហាញ​ក្នុងសេចក្តី​ថ្លែងការណ៍​របស់​ខ្លួន៕

អត្ថបទ៖ សំភី

;