កម្ពុជា វាយតម្លៃខ្ពស់ចំពោះការចូលរួមរបស់ជប៉ុន ក្នុងការកសាងសហគមន៍អាស៊ាន

2018-11-15 01:55:47
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កម្ពុជា បានវាយតម្លៃខ្ពស់ចំពោះការរួមចំណែកដ៏សំខាន់របស់ជប៉ុន ក្នុងការកសាងសហគមន៍អាស៊ាន និងការធ្វើសមាហរណកម្មអាស៊ាន។ នេះបើតាមការថ្លែងរបស់សម្តេចនាយករដ្ឋមន្រ្តី ហ៊ុន សែន ក្នុងកិច្ចប្រជុំកំពូល អាស៊ាន-ជប៉ុន លើកទី២១ នៅប្រទេសសិង្ហបុរី កាលពីថ្ងៃទី១៤ ខែវិច្ឆិកា ឆ្នាំ២០១៨។

សម្តេចបញ្ជាក់ថា ការរួមចំណែករបស់ជប៉ុននេះ គឺធ្វើឡើងតាមរយៈមូលនិធិជប៉ុនសម្រាប់សមាហរណកម្មអាស៊ាន ក៏ដូចជាក្នុងការបន្តគាំទ្រដល់ការអនុវត្តផែនការមេ តភ្ជាប់អាស៊ាន ២០២៥ និងផែនការការងារទី៣ នៃគំនិតផ្តួចផ្តើមសម្រាប់សមាហរណកម្មអាស៊ាន ២០១៦-២០២០ ដើម្បីកាត់បន្ថយគម្លាតអភិវឌ្ឍន៍ក្នុងតំបន់ ជាពិសេសការគាំទ្រដល់ការកសាងធនធានមនុស្សរបស់អាស៊ាន និងការលើកកម្ពស់ទំនាក់ទំនងរវាងប្រជាជន និងប្រជាជន។

មេដឹកនាំអាស៊ាន-ជប៉ុន ថតរូបអនុស្សាវរីយ៍ក្នុងកិច្ចប្រជុំកំពូលអាស៊ាន-ជប៉ុន លើកទី២១ កាលពីថ្ងៃទី១៤ វិច្ឆិកា ២០១៨។ រូបថត៖ ហ្វេសប៊ុកសម្តេច ហ៊ុន សែន

បើតាមទំព័រហ្វេសប៊ុកសម្តេច ហ៊ុន សែន ឱ្យដឹងថា នៅក្នុងកិច្ចប្រជុំកំពូលនេះ មេដឹកនាំអាស៊ាន និងជប៉ុន បានសម្តែងនូវការរីករាយដោយបានឃើញកំណើននៃទំហំពាណិជ្ជកម្មអាស៊ាន-ជប៉ុន មានទឹកប្រាក់រហូតដល់ ២១៧,៩ពាន់លានដុល្លារ ក្នុងឆ្នាំ២០១៧។ សេចក្តីថ្លែងការណ៍នេះ បានបញ្ជាក់ឲ្យឃើញយ៉ាងច្បាស់ថា ជប៉ុននៅតែជាដៃគូសេដ្ឋកិច្ចដ៏សំខាន់របស់អាស៊ាន។

ជាមួយគ្នានេះ ហ៊ុន សែន បានមានប្រសាសន៍ថា ក្នុងស្មារតីនៃការបង្កើនទំហំក៏ដូចជាពង្រីកវិសាលភាពនៃពាណិជ្ជកម្មអាស៊ាន-ជប៉ុន កម្ពុជា ស្វាគមន៍ចំពោះការចុះហត្ថលេខាលើពិធីសារទី១ ដើម្បីធ្វើវិសោធនកម្មកិច្ចព្រមព្រៀងស្តីពីភាពជាដៃគូសេដ្ឋកិច្ចទូលំទូលាយរវាងអាស៊ាន និងជប៉ុន។

នៅក្នុងកិច្ចប្រជុំកំពូលអាស៊ាន-ជប៉ុន លើកទី២១នេះ មេដឹកនាំនៃប្រទេសអាស៊ាន និងជប៉ុន បានឯកភាពគ្នា ចេញសេចក្តីប្រកាសរបស់ប្រធានកិច្ចប្រជុំកំពូលអាស៊ាន-ជប៉ុន លើកទី២១។ សេចក្តីប្រកាសរួម កិច្ចប្រជុំកំពូលអាស៊ាន ជប៉ុន លើកទី២១ ដើម្បីអបអរសាទរខួបអនុស្សាវរីយ៍៤៥ឆ្នាំ នៃមិត្តភាពនិងកិច្ចសហប្រតិបត្តិការអាស៊ាន-ជប៉ុន។ របាយការណ៍សង្ខេបស្តីពីវឌ្ឍនភាពនៃការអនុវត្តសេចក្តីថ្លែងការចក្ខុវិស័យ អំពីមិត្តភាព និងកិច្ចសហប្រតិបត្តិការអាស៊ាន-ជប៉ុន និងពិធីសារទី១ នៃកិច្ចព្រមព្រៀងស្តីពីភាពជាដៃគូសេដ្ឋកិច្ចទូលំទូលាយរវាងអាស៊ាន និងជប៉ុន៕

អត្ថបទ៖ សំភី