មេធាវី ស្នើលើកលែងការចោទប្រកាន់ ដើម្បីអាចឱ្យលោក កឹម សុខា ទៅព្យាបាលនៅក្រៅប្រទេស

2018-11-15 02:36:19
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ផែង ហេង មេធាវីលោក កឹម សុខា បានស្នើឱ្យតុលាការ លើកលែងការចោទប្រកាន់ ដើម្បីបើកឱកាសឲ្យកូនក្ដីរបស់ខ្លួន មានសិទ្ធិទៅព្យាបាលនៅក្រៅប្រទេស ព្រោះថា ការចោទប្រកាន់កន្លងមកគ្មានភស្តុតាងគ្រប់គ្រាន់ដើម្បីដាក់បន្ទុកឡើយ។ នេះបើតាមការចុះផ្សាយរបស់វិទ្យុអាស៊ីសេរី កាលពីថ្ងៃទី១៤ ខែវិច្ឆិកា ឆ្នាំ២០១៨។

លោក ផែង ហេង បញ្ជាក់ថា ស្ថានភាពជំងឺលោក កឹម សុខា បច្ចុប្បន្នគឺត្រូវការទៅព្យាបាលនៅក្រៅប្រទេសដដែល ក៏ប៉ុន្តែលោក កឹម សុខា នៅរង់ចាំតុលាការទម្លាក់ចោលការចោទប្រកាន់ជាមុនសិន ពីព្រោះថា លិខិតឆ្លងដែនរបស់លោក ក៏ត្រូវបានចៅក្រមដកហូតទុកដែរ។

លោកមេធាវី លើកឡើងយ៉ាងដូច្នេះថា៖ «ក្រៅពីវីដេអូឃ្លីបដែលតំណាងអយ្យការយកមកធ្វើជាភស្តុតាង និងសាក្សីមួយ ចំនួន ដែលតុលាការយកមកសំអាង តែដោយសារតែនៅក្នុងនីតិវិធីស៊ើបអង្កេតខ្ញុំមិនចង់និយាយឲ្យលម្អិតទេ។ តែក្រោយពីមេធាវីត្រួតពិនិត្យមើល គ្មានភស្តុតាងណាដែលតំណាងអយ្យការយកមកចោទប្រកាន់នោះទេ»។

អ្នកតវ៉ាម្នាក់ សុំឱ្យដោះលែងលោក កឹម សុខា ក្នុងពេលតុលាការបើកសវនាការលើសំណុំរឿងលោកនាពេលកន្លងមក

ក្រុមមេធាវី ធ្លាប់បានដាក់លិខិតទៅចៅក្រមស៊ើបសួរសាលាដំបូងរាជធានីភ្នំពេញកាលពីខែមីនា ឆ្នាំ២០១៨ ស្នើសុំលើកលែងការចោទប្រកាន់លោក កឹម សុខា ក៏ប៉ុន្តែមកទល់ពេលនេះ មិនទាន់មានការឆ្លើយតបពីតុលាការនៅឡើយ។

គួររំលឹកថា កាលពីថ្ងៃទី៧ វិច្ឆិកាកន្លងទៅ សម្តេច ហ៊ុន សែន បានបញ្ចេញប្រតិកម្មទៅលោក សម រង្ស៊ី អតីតប្រធាននៃអតីតគណបក្សសង្គ្រោះជាតិ ដែលបបួលភ្នាល់ថា លោក កឹម សុខា នឹងត្រូវដោះលែងនៅចុងខែធ្នូខាងមុខនេះ។ សម្តេច ហ៊ុន សែន ឆ្លើយតបវិញថា "ចាំសេះដុះស្នែង" ទើបលោក កឹម សុខា ត្រូវបានដោះលែង។

លោក កឹម សុខា ត្រូវបានចៅក្រមស៊ើបសួរ សម្រេចឃុំខ្លួនកាលពីថ្ងៃទី៥ ខែកញ្ញា ឆ្នាំ២០១៧ ហើយត្រូវបានដោះលែងឱ្យនៅក្រៅឃុំ និងដាក់ឱ្យស្ថិតនៅក្រោមការត្រួតពិនិត្យ តាមផ្លូវតុលាការកាលពីថ្ងៃទី៩ ខែកញ្ញា ឆ្នាំ២០១៨។ អតីតប្រធានអតីតគណបក្សសង្គ្រោះជាតិរូបនេះ ត្រូវបានចោទប្រកាន់ពីបទសន្និដ្ឋិភាពជាមួយបរទេស ជាប្រភេទបទល្មើសក្បត់ជាតិ តាមបញ្ញត្តិមាត្រា៤៤៣ នៃក្រមព្រហ្មទណ្ឌនៃព្រះរាជាណាចក្រកម្ពុជា ដែលបទឧក្រិដ្ឋនេះ មានទោសជាប់ពន្ធនាគារពី ១៥ឆ្នាំ ទៅ ៣០ឆ្នាំ៕

អត្ថបទទាក់ទង៖