សឿយ វិសាល៖ កម្ពុជា នឹងធ្វើបានល្អថែមទៀត ពេល Honda ដឹកនាំ

2018-11-19 04:47:05
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ខ្សែការពារក្រុមបាល់ទាត់ជម្រើសជាតិកម្ពុជា សឿយ វិសាល បានទទួលស្គាល់ថា ពួកគេពិតជាធ្វើបានល្អប្រសើរជាងមុន បន្ទាប់ពីអ្នកចាត់ការទូទៅលោក Keisuke Honda បានត្រឡប់មកដឹកនាំ កាលពីប្រកួតទី២ ពូល A វគ្គសន្សំពិន្ទុ ពានរង្វាន់ AFF Suzuki Cup 2018 ។

Honda បានត្រឡប់មកដឹកនាំក្រុមជម្រើសជាតិកម្ពុជា ក្រោយពីសម្រាកពីភារកិច្ចនៅក្លឹប Melbourne Victory នៅលីគប្រទេសអូស្ត្រាលី។ ក្រោមការដឹកនាំរបស់ Honda ក្នុងប្រកួតទី២ កម្ពុជា បង្ហាញទម្រង់លេងយ៉ាងល្អក្នុង៤៥នាទីដំបូង ដោយបើកការនាំមុខ ១-០ ទៅលើក្រុមជម្រើសជាតិមីយ៉ាន់ម៉ា ទោះបីជាលទ្ធផលចប់ការប្រកួត កម្ពុជាចាញ់មីយ៉ាន់ម៉ា ៤-១ ក៏ដោយ។

ប្រាប់ក្នុងសន្និសីទសារព័ត៌មានមុនការប្រកួតទី៣ រវាងក្រុមបាល់ទាត់ជម្រើសជាតិកម្ពុជា ជាមួយ ឡាវ ខ្សែការពារសឿយ វិសាល បានឲ្យដឹងថា ពេលហ្វឹកហាត់ជាមួយ Honda ជម្រើសជាតិចាប់បានច្រើន។ ចំពោះការប៉ះជាមួយមីយ៉ាន់ម៉ា វិសាល មើលឃើញ ការវិវឌ្ឍល្អប្រសើរ ជាងជំនួបទល់នឹងម៉ាឡេស៊ី។

ខ្សែការពារ សឿយ វិសាល របស់ក្រុមជម្រើសជាតិកម្ពុជា ថ្លែងក្នុងសន្និសីទសារព័ត៌មាន នាពេលកន្លងទៅ

កីឡាករមកពីក្លឹបព្រះខ័នរាជស្វាយរៀង បានបន្តថា កីឡាករក្រុមជម្រើសជាតិ នឹងព្យាយាមបំពេញចំណុចខ្វះខាតពីមុន។ ទោះបីជាឡាវធ្លាក់ចេញពីការប្រកួតដោយស្វ័យប្រវត្តិទៅហើយក្ដី ក៏ជំនួបថ្ងៃស្អែកនេះ មិនមែនជាការងាយស្រួលដែរ ដូច្នេះ កម្ពុជាមិនត្រូវធ្វេសប្រហែសនោះទេ។

គួរបញ្ជាក់ថា កម្ពុជា និងឡាវ ស្ថិតនៅចំណាត់ថ្នាក់លេខ៤ និងលេខ៥ ក្នុងពូល A ។ ក្រោយជួបឡាវ កម្ពុជា នឹងទៅសួរសុខទុក្ខក្រុមជម្រើសជាតិវៀតណាម នៅប្រកួតទី៤ ដែលជាជំនួបចុងក្រោយ នាទីក្រុងហាណូយ នៅថ្ងៃទី២៤ ខែវិច្ឆិកា ឆ្នាំ២០១៨៕

អត្ថបទ៖ លាភ.