Leo យកបទពិសោធ ដើម្បីទស្សន៍ទាយក្រុមដែលឈ្នះ ក្នុងជំនួបកម្ពុជា-ឡាវ

2018-11-20 06:33:49
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក Leonardo Vitorino អតីតគ្រូបង្វឹកក្រុមជម្រើសជាតិកម្ពុជា និងក្លឹបបាល់ទាត់ Lanexang United របស់ឡាវ មានជំនឿជាក់យ៉ាងមុតមាំថា ក្រុមកម្ពុជានឹងឈ្នះលើការប្រកួតល្ងាចនេះ ព្រោះតែក្រុមកម្ពុជាមានភាពចាស់ទុំជាងក្រុមឡាវ។ នេះបើតាមការចុះផ្សាយរបស់វេបសាយក្លឹបភ្នំពេញក្រោន នៅថ្ងៃទី២០ ខែវិច្ឆិកា ឆ្នាំ២០១៨។

ក្រុមជម្រើសជាតិកម្ពុជា នឹងបើកទ្វារកីឡដ្ឋានជាតិស្វាគមន៍ក្រុមជម្រើសជាតិឡាវ ក្នុងការប្រកួតវគ្គសន្សំពិន្ទុ ពូល A ពានរង្វាន់ AFF Suzuki Cup 2018 នាវេលាម៉ោង ៦:៣០ នាទីល្ងាច ថ្ងៃទី២០ ខែវិច្ឆិកា ឆ្នាំ២០១៨។

លោក Leonardo Vitorino គ្រូបង្គោលក្លឹបភ្នំពេញក្រោន បច្ចុប្បន្ន

លោក Leonardo បានលើកឡើងថា៖ ***«សម្រាប់ការប្រកួតនៅថ្ងៃនេះ ក្រុមកម្ពុជានឹងឈ្នះ ព្រោះក្រុមឡាវប្រើយុវជនច្រើន ហើយកីឡាករល្អៗរបស់គេបានជាប់បម្រាម ដូចជាកីឡាករ Soukaphone Vongchiengkham មិនអាចចូលលេងក្នុងការប្រកួតនេះបានទេ។ មួយវិញទៀតក្រុមកម្ពុជា ជាក្រុមមួយដែលខ្លាំងនៅពេលដែលពួកគេប្រកួតក្នុងដីម្តងៗ»***។

អតីតគ្រូបង្វឹកក្រុមគោព្រៃកម្ពុជារូបនេះបានបន្តទៀតថា៖ «ខ្ញុំសង្ឃឹមថា ការប្រកួតនៅថ្ងៃនេះ នឹងល្អមើលសម្រាប់ប្រជាជនកម្ពុជា ហើយពួកគេប្រាកដជាត្រឡប់ទៅផ្ទះវិញដោយភាពសប្បាយរីករាយជាក់ជាមិនខាន»។

គួរបញ្ជាក់ថា លោក Leo ធ្លាប់ដឹកនាំក្រុម Lanexang United ឲ្យឈ្នះពានរង្វាន់លីគកំពូលឡាវ កាលពីឆ្នាំ២០១៦។ បន្ទាប់មក លោកត្រូវបានតែងតាំងជាគ្រូបង្វឹកក្រុមជម្រើសជាតិកម្ពុជា រហូតដល់ឆ្នាំ២០១៧។

សូមបញ្ជាក់ថា សម្រាប់ការប្រកួតរបស់ក្រុមជម្រើសជាតិកម្ពុជាពីរលើកក្នុងពានរង្វាន់ AFF Suzuki Cup 2018 គឺចាញ់ទាំងពីរលើកដោយចាញ់ក្រុមម៉ាឡេស៊ីក្នុងលទ្ធផល ១-០ និងចាញ់ក្រុមមីយ៉ាន់ម៉ា ៤-១៕

អត្ថបទ៖ លាភ.